¹ Ie nitafa i raha maro rey, le nijibogne fitopolo lahy [fagnamaregnagne: Maro amy ty sinora ty taloha fanjaka vatae te ie vakiegne "Fitopolo", fa ty ilae vinaky te: "Fitopolo roe ambe."] hafa ty Andriantompo, le nandefa iareo kiroe kiroe hiaolo Aze amy ze fonga tane naho ty tanàgne hombàe. ² Hoa Reke tamy iareo te: "Maro ty vokatse fe ie tsy ampe ty mpiasa. A izao angataho I mpamokatsey mba handefa mpiasa ho amy vokatsey. ³ Mandena amy ty lala'areo. Vazoho'o, fa aveko manahake o anak'agnodry agnivo amboadia'o nareo. ⁴ Ko minday fisiambola, ndre fisian'etagne,ndre hana, le ko manalama ndaty ndre ia ndre ia andalagney. ⁵ Ze tragno iziliha'areo, rehafo hey te: 'Fiadanagne hoe ty tragno toy!' ⁶ Naho misy ndaty ty fiadanagne ty ao, le hoamae eo vatae ty fiadanagne rehafe'areo, fie naho tsisy le hiheregne ama'areo. ⁷ Mitoboha amo tragno'o avao, homana le minoma ze amea iareo, fa ty miasa magneva ty karama'e. Ko mifindrafindra tragno. ⁸ Zay tanàgne idira'areo, naho mandrae anareo, hano ze afahae anareo, ⁹ le sitragno ze marare ao. Agnombarao iareo te: 'Fa miharine anareo ty fanjakan'Agnahare.' ¹⁰ Nao mbiagne ndre ombiagne nareo mizilike amy ty tanàgne naho tsy mandrae anareo iareo, le miakara andalagney le agnombarao te: ¹¹ 'Ndre ty vovoke ty tanà'areo nahazo ty tombo'ay le ho fafa'ay hanohetse anareo! Fe ie fantaro te: Fa marine ty fanjakan'Agnahare.' ¹² Amabarako anareo fa naho fa avy ty andro ty fitsaragne le ndra ho hay ka ty lefetse ty ey Sodoma te amo zao tanàgne zao. ¹³ Loza ho azo, Korazina! Loza ho azo, Betsaida! Fa nao ty asa bey natao tamao ro natao ta Tyro naho Sidona, le fa niela iareo ty nibebake, nitoboka amy ty lamba fisaonagne naho lavenogne. ¹⁴ Fa ho hay leferegne ka ty Tyro naho Sidona amy fitsaragne noho ty ama'areo. ¹⁵ Ihe, Kapernaomy, mitamà vao iheo fa hasandratse andagnitse agne? Tsie, ndesegne midigne amy Hadesy agne rehe. ¹⁶ Ze mitsanogna anareo le mitsanogna Ahy, ze mandietse anareo le mandietse Ahy, le ze mandietse Ahy ka le mandietse ty nagirak'Ahy." ¹⁷ Niheregne ankafaleagne i fitopolo rey, le nitalily tihoe: "Andriantompo, ndre ty kokolampogne le nagneke anay amy ty agnarao." ¹⁸ Jesosy nagnombara amy iareo te: "Nivazoho an-drekoko nipoke amy lanitsey hoe tselatse Raho." ¹⁹ Henteo, fa natoloko anareo ty fahefagne handia ty bajigne, maingoke, ty halako hery amy ty fahavalo, le ndra ino ndre inogne le tsy misy hahafere anareo amy ze kila raha. ²⁰ Ndre ty eo zay le ko mifale avao amizay, te nagneke anareo ty fagnahy, fa mirebeha nao voasoratse andanitse agne ty agnara'areo." ²¹ Tamy fotoagne zay avao le nifale vatae amy ty Fagnahy Masigne ao Reke. Le nirehake tihoeke: Midera Azo Raho, Rae, Tompo ty lanitse naho ty tane, fa navonio tamy ty mahihitse nao ty mahilala, le nambara amy ty tsy mahafantatse, hoe ty ajaja malineke. Eka, Raeko, fa zao ty soa sitrahegne agnatreha'areo." ²² Ze kila raha le nafato i Rae Amako, le tsy misy mahafantatse te ia ty Anake ankoatse ty Rae, le tsy misy mahafantatse te ia ty Rae ankoatse ty Anake naho ty nojibone ty Anake hahaonigne Aze." ²³ Boakeo le nipalitse amy mpianatse rey Reke nirehafe'e tsikiraike te: "Haha ze mahaonigne ty raha oni'areo. ²⁴ Ambarako anareo, mpitoky naho mpanjaka maro ro nagniry hahaonigne ty raha oni'areo, fie tsy nahaonigne zao iareo, le haharey ty raha ty raha rey'areo, fie tsy naharey zao iareo."" ²⁵ Le ingo, nisy mpampianatse lalàgna ty Jiosy raike nitsangagne sare nagnontane Aze, nirehake tihoeke: "O mpampianatse, inogne ty tokoe hataoko hahazoako ty fianagne tsy misy fiafarae?" ²⁶ Jesosy nirehaka amae te: "Inogne ty voasoratse agnate ty lily? Manao akore ty famakiao zay?" ²⁷ Nanoigne reke nirehake tihoeke: "Tiavo ty Andriatompo Andrianagnahareo amy ty fo'o, amy ty fagnahio, amy ty herio, amy ty saio, le ze ragneo iabike manahale ty vatao. ²⁸ Jesosy nirehake amae te: "Maregne ty navaleo. Ano'o zay, le hovelogne rehe." ²⁹ Fie mpampianatsey te hanagne ható, le nirehake amy Jesosy tihoe: "Ia ty ragneko? ³⁰ Notohine i Jesosy reke te: "Nisy lahy raike boake Jerosalema handeha ho a Jeriko. Nitrà ty mpitavagne reke nangalake ze fonga raha tamaey, le jinerae, le nagnega aze naho fa ho mate. ³¹ Le nisy mpisorogne nandriogne tamo lalagne zao, le naho nahatrea izao reke, le nitsile amy ila i lalagney. ³² Hoe zao ka ty Levita raike, naho fa nandriogne ka nahatrea izao le nitsile amy lalagne raikey. ³³ Fie nisy Samaritana raike, naho fa nadeha amy ty nihirifae reke, niavy amy ty misy aze. Naho fa nahatrea izao le niferenaigna aze. ³⁴ Le nagnantogna Aze reke namehe ty fere'e, nagniligne menake naho divay. Nandae aze amy ty bibie reke, le nindese'e amy ty tagnombahiny, le nokarakarae. ³⁵ Ny maray inge le nangalake denaria roe reke, natoloe ty nitobea iareo, le nanao tihoeke: "Karakarao reke, le ndre ty hoatrino na hoatrino ty laneo mihoatse, le havahako naho fa miheregne raho.' ³⁶ Ia amy iareo telo, arake ty heveo, ty ragney niazo i mpitavagne rey?" ³⁷ Namale i mpampianatsey te: "I raike niferenaigna azey." Jesosy nirehake amae te: "Mandenà le manoa hoe zay ka." ³⁸ Le naho fa nandeha iareo, le naho fa hilitse amy ty tanàgne raike Reke, le nisy ampela raike atao Marta nampandroso Aze antragnoe ao. ³⁹ Nanagne rahavave atao Maria reke, io nitoboke an-tombo i Andriantompo le nitsagnogne ty rehae. ⁴⁰ Fie Marta mbe sahiragne amy ty fikarakaragne ty mahakama haroso. Le nandeha amy Jesosy eo reke, le tihoe ty natae: "Andriantompo, tsy mampagnahy Azo vao ty enga ty rahavaveko ahy hitorogne raike? Le mba rehafo reke hagnampe ahy." ⁴¹ Le namale ty Andriantompo nanao tihoe: "Marta, Marta, sahiragne ty raha maro rehe, ⁴² mone izao le raha raike avao ro tena ilagne. Maria fa nijibogne ty soa vatae, le ty tsy hoafahagna amae."