¹ Tafara ze raha zay, le nitsake ranomasigne e Galilia, atao Tiberiasy zay ty Jesosy. ² Nisy ndaty tsiefa nangovovoke nagnorike Aze satria trea iareo famantaragne natao'e tama ze narare. ³ Niheo ambone vohitsey ty Jesosy naho le niambesatsey miharo amo mpiana eo Reke. ⁴ (Fa marine amizay Paska, andro firavoaravoa Jiosy io). ⁵ À naho fa nivazoho niagnambone ty Jesosy aheo naho ndaty tsiefa ro mbama eo, le tihoe ty natao amy Filipo te ie: "Aia ty hiviliantika mofo mba hihinana iareo?" ⁶ (Fa ony i Jesosy anio ty hatao'e, fe ie le niaotsy izay mba hitsoha'e hevetse i Filipo.) ⁷ Le tihoe natao Filipo nanoigne Aze te ie: "Ndra ie mofo roanjato dinaria nio aza ndra kede tsy hahenegne aze kiraidraike aby." ⁸ Ty raike tama mpianaeo, Andrea, roahalahy Simona Petera, ro nivolagne ama i Jesosy te ie: ⁹ " Misy anajalahy raike ty eto managne mofo lime navaho fiagne roe, fe ie a hahainogne ty ndaty lako toa? ¹⁰ Le ty hoe natao i Jesosy te ie: "Ampiambesaro o ndaty reo" (Feno akata ty amo toerañeo eo) Le niambesatse aby maroy, tokoe ho lime arivo eo ty isae. ¹¹ Ie niavy le nangalake mofoy naho fa niavy nisaotse, naho le zinara'e tama iareo ze niambesatse. Le mbe ny hoe izay avao ka ty natao'e tama fiañey, maro mandako ze paiaiareo. ¹² A naho fa nianjañe ndaty, le tihoe ty Natao'e tama mpiana'e reo te ie: " Avorio ze sisa'e tsy nilany, mba tsy hisy ho motso." ¹³ A le navory iareo areke naho le mbe nahafeno haroñe folo roe amby ty nisisa mofo limey ze nipotepote'e nenga iareo nihinañe. ¹⁴ Ie niavy eo, naho fa nahaoniñe ty famantaragne Natao'e ndaty, le tihoe ty natao iareo tie: "Itoy vata'e o mpitoky ho avy ho etoy ama ze kila tane eo." ¹⁵ A naho fa niony i Jesosy fa hoavy iareo hangalake Aze hanandratse Aze an-kery ho Mpanjaka, le nibalike ambone vohitsey irery ndraike Reke. ¹⁶ Ie nihariva androy, le nizotso mba ndranomasigne eo mpianae rey. ¹⁷ Nijoñe amy ty lankan-kede iareo, naho le nitsake ranomasigney hoe Kapernaoma agne. Fa naieñe tamy izay, ndra Jesosy mbe tsy niavy tamy iareo avao. ¹⁸ Ndra nisy talio mafe areke, naho le nañonja ranomasiñey. ¹⁹ Naho fa nivey teo amy ty roapolo lime amby na telopolo stadio eo iareo, le trea iareo ty Jesosy niheo ambone ranomasiñey naho le nihanarine lakan-kede ey, naho le natahotse iareo. ²⁰ Le izao ty natao amy iareo te ie: "Mbe izaho avao nitoy! ko matahotse." ²¹ Ie niavy eo novoño'e iareo ty handrae Aze andakan-kede ao, naho le aniany avao le fa niavy amy tane hombà iareo oy lakañey. ²² Ie ny maray iñe, trea maro nitsangañe añolo-dranomasiñe eo te ie tsy nisy lakan-kede hafa tsy raikey avao, naho toe tsy nindre niditse amy mpianaey ty Jesosy fa nandeha irery mpianarey. ²³ Fe ie, nisy lakan-kede maromaro boaka Tiberiasy añe ty añila tanagne nihinana iareo mofo'oy eo naho fa niavy nisaotse i Tompo. ²⁴ A naho fa nitrea vahoake rey te ie tsy teo na Jesosy na mpianae rey, le nijoñe an-dakan-kede iareo naho le etoy ty e Kapernaoma agne hipay Jesosy. ²⁵ À naho fa nitrea iareo añolon-drenerano Reke, le tihoe ty natao iareo tama'e: "Mpañanatse, niavy eto mbia Iheo?" ²⁶ Namale iareo ty Jesosy, nanao tihoeke te ie: " Amabarako anareo anio, fa mipay Ahy nareo, fe ie tsy amity agnama i famantarañey, fa amy ty nihinana areo mofoy naho le nivontsiñe. ²⁷ À ko miasa amity haneñe tsiela rava areke, fa miasà ho ey haneñe maharetse amy fiaiñañe mandrakezay naho le homey Tirin'olombeloñe anareo, satria Andriamañitse Rae ro nañisy tombo-kase tama'e." ²⁸ Ie niavy eo le tihoe ty tanao iareo Tama'e : " À ino ty hatao' ay, mba hanoa' ay ty asa Nagnahare?" ²⁹ Namale ty Jesosy le tihoe ty natao'e tama iareo: "Izao ty asan' Andrianañahare: le ty hiantofa areo ty raike ze nirahe'e." ³⁰ Le izao ty natao iareo tama'e : "Ino areke ty famantarañe ho hatao'o, mba hahita' ay naho le hianoa'ay Azo? Ino ty hatao'o? ³¹ Ty razambey' ay nikama ty mana boake añefetse añe, manahake ty voasoratse te ie: " Nimea'e mofo boake an-dañitse iareo ho kamae'e." ³² Izao ty natoy Jesosy iareo te ie: " Ambarako anareo anio, fa tsy Mosesy ro nañomey anareo ty mofo hirike an-dañitse añe, fa ty Raeko ro nañomey anareo ty tena mofo vata'e boake an-dañitse añe. ³³ Satria ty mofo Andriatompo le mizotso hirike an-dañitse añe naho le mañomey fiaiñañe ho ey ze kila raha." ³⁴ Izao ka ty natao iareo ama'e te ie: " Rañadria, omeo anay lomoñazo zo mofo zao." ³⁵ Le ty hoe ty natao Jesosy any iareo the ie: " Izaho ro mofon-kaveloñeo, ze miharine Ahy tsy ho kere in-tsasa, navaho ze miantoke Ahy ka le tsy ho azo ty arandrano. ³⁶ Fe ie fa nambarako ama areo fa nahatrea Ahy nareo, naho le tsy nino. ³⁷ O maro ze nimey ty Raeko Ahy le ho mbamako mbeto, naho le ze miharine Ahy ka tsy mbian-kariako. ³⁸ Fa nizotso hirike an-dañitse añe raho, tsy mba hanao ze zotoko irery, fa ze zoto Ie nañirake Ahy. ³⁹ Izao ty zoton'arofo Ie nañirake Ahy, le ty tsy hañariako ze kila raha nimey Any, fa hampitsangañe iareo any ty andro fara'e. ⁴⁰ Satria izao ro zoton'arofo ty Raeko, le ty mba hahazoa ty maro ze mahavazoho ty Ana'e naho le mino Aze ty fiaiñañe mandrakezay naho hatsangako amy ty andro fara'e reke. ⁴¹ Ie niavy eo nimonomonoñe miomba Aze iareo Jiosy satria nisaontsy Reke te: " Izaho ro mofo nizotso hirike an-dañitse añe." ⁴² Naho le izao ty natao iareo: "Tsy i Jesosy ana i Josefa vao io, ataoko fantatika ty Rae naho ty Rene'e? À tiaia ty hivolagna'e te ie: "Nizotso hirike an-dañitse añe Raho?" ⁴³ Le izao ty natoy i Jesosy iareo te ie: "Ajanoño fimonomonoñe am-pañivoa areo. ⁴⁴ Tsy misy ndaty afake mañantogne Ahy naho tsy Raeko nañirake Ahy ro mitaoñe aze, naho le hatsangako reke amy ty andro farae. ⁴⁵ Izay ty voa soaratse añate ty boky ty mpitoky te ie: "Hampianare i Adriatompo aby iareo." Navaho ze nianatse naho naharey tamy ty Rae avao ro mañantoñe Ahy. ⁴⁶ Tsy misy nahatrea ty Rae, naho tsy ze hirike aman'Andrianagnahare, Ie avao ro mahita ty Rae. ⁴⁷ Ambarako anreo anio, fa ze mino ro manañe ty fiaiñañe mandrakezay. ⁴⁸ Izaho ro mofo ty fiaiñañe. ⁴⁹ Ty Raza areo bey nikama ty mana añefetse añe, naho le nivilasy iareo. ⁵⁰ Intoy to mofo nizotso hirike an-dañitse añe, ze nikama ama'e tsy ombia ko vilasy. ⁵¹ Izaho ro mofo veloñe nizotso hirike an-dañitse añe. Naho misy ndaty mihinañe Amy ty mofo toy, le ho veloñe mandrakezay reke. Ty mofo ho meiko ro mofo ho amy ty fiaiña ze kila raha." ⁵² Viñetse iareo Jiosy naho le ty hoe ty nisafiry natao iareo te ie: " Akore ty hahaia o lahio mañomey antika ty onofo'e ho haneñeo? Le ty hoe ty natao I Jesosy amy iareo te ie: ⁵³ "Ambarako anareo anio, fa naho tsy mihinañe ty mofo ty tirin'olombeloñe nareo naho tsy minoñe ty lio e, le tsy hanañe fiaiñañe ama areo ao. ⁵⁴ Ndra ia ia mihinañe ty nofoko naho minoñe ty lioko le manañe ty fiaiñañe mandrakezay, naho le hangako Amy ty andro farae. ⁵⁵ Fa ty nofoko ro tena fiaiñañe, le ty lioko ro tena finomeñe. ⁵⁶ Ze mihinañe ty nofoko naho minoñe ty lioko ro mitoetse Amako ao, naho le ama'e ao ka Raho. ⁵⁷ Manahake ty nañiraha Rae veloñe Ahy, naho le manahake ty hivelomako mandako ty Rae, ze mihinañe Ahy, le ho veloñe ka naho ty Amako. ⁵⁸ Intoy mofo nizotso hirike an-dañitse añe eo, tsy manahake ty Razambey areo nikama naho le nivilasy. Ze mihinañe ty mofo toy le ho veloñe mandrakezay." ⁵⁹ Nisaontsy izay ty Jesosy te Synagoga ao naho fa nampianatse e Kapernaoma ao Reke. ⁶⁰ Naho le maro Amy iareo mpiana'e naharey izay ro nivolañe te ie: "Fampianarañe sarotse zao; ia iaby ty hiantoke izao? ⁶¹ Vaho te Jesosy mahaoniñe te ie mimonomonoñe mpiana'e reo, ro nisaontia e te ie: " Izay vao manikambatse anareo?" ⁶² Avaho akore naho hahita ty tirin'olombeloñe miakatse amy ty nitoera'e taolo nareo? ⁶³ Ty Fañahy ro nañomey fiaiñañe, ty nofo tsy ahazoañe ndra inoñinoñe. Ze rehake nambarako ama areo le fañahy, naho le fiaiñañe ka io. ⁶⁴ Tiila ama areo tsy mino." Fa Jesosy fa mahaoniñe laha tamboaloha'e ze tsy mino naho ze hifotetse Aze. ⁶⁵ Izao ty natao e: "Izay o nañambarako tama areo fa tsy misy ndaty afake mamonje Ahy naho tsy nimey ty Rae aze zay." ⁶⁶ Izay avao, le maro tamy mpiana'e eo ro tsy nañorike ama e in-tsasa. ⁶⁷ Le tihoe natao Jesosy tamy iareo folo roe amby te ie: "Tsy te handeha ka vao nareo? ⁶⁸ Simona Petera ty nanoiñe Aze te ie: "Rañandria, ho amy ia moa zahay io? Ihe ro manañe ty safirin-kaveloñe hatrampara'e, ⁶⁹ a naho mino zahay le hañorike mba hahafantatse fa Ihe ro Masin' Andrianañahare." ⁷⁰ Izao ty natao Jesosy tama iareo: "O vao tsy izaho ro nijonoñe anareo, folo roe amby, naho ty raike amareo le ro raty? ⁷¹ Jodasy ana I Simona Isakariota no saontsie, satria ie, o raike amy iareo folo roe amby, hifotse i Jesosy io.