¹ Tafara izay le nisy fifalefaleagne i Jiosy io, le niheo e Jerosalema agne ty Jesosy. ² Naho te Jerosalema tagnila lalambein' aondry eo, le nisy saka, atao Betesda zao amy ty Hebreo, naho misy fialofagne lime zay. ³ Maro ty ndaty narare, goa, lendra'e, naho tsy mahay mihetseke niroro ao. (fagnamaregnagne: Ze venten-taratasy taolo nifanjaka vata'e le magnafake ze rehake te ie: "Mandigne ty fiolà o rano") ⁴ (fagnamaregnagne: Ze venten-taratasy taolo soa vata'e le magnafake ze and.4 te ie: "Le nisy Anjely i Andriatompo raike nizotso le nampihetseke rano kindraindraike naho le ndra ia ndra ia miheo ao naho fa mihetse rano oy le jangagne tama ze aretegne ndra ino ndra ino nankarare aze.") ⁵ Le nisy lahilahy raike zay fa narare telopolo valo amby taogne zay areke ty tao. ⁶ Naho fa niony i Jesoa nandre eo reke, naho tafara ty nahatsapa'e fa an-tao'e maro reke te teo, le izao ty Natao'e ama: "Te ho jangagne viheo?" ⁷ Izao ty natoy lahy marare ey aze: "Ragnandria, tsy managne ndra ia ndra ia handrombake ahy agnate dobo ao nio aho naho fa miola rano. À naho fa mandeha raho, le misy misisike alohako ao." ⁸ Le tihoe ty natao i Jesosy ama'e te ie: "Miongaha, indeso fandrea'o, mandehana." ⁹ Le avy le jangagne lahilahy, le rina'e fandrea'ey le ndeha reke. Sabata ze andro zay. ¹⁰ Le izao ty natao Jiosy rey tamy jangagney: "Sabata ty androany tsy azo'o indesegne fandrea'oy". ¹¹ Nanoigne reke te ie: I nahajangagne ahy io nisaontsy amako le tihoe ty natao te ie: "Indeso fandrea'oy le mandehana." ¹² Le nagnontanea iareo reke te ie: "Ia o lahilahy nivolagne ama'o te: 'Indeso ty fandrea'o le mandehanà ao? ¹³ Fe ie, tsy mahafantatse Aze jangagney fa nisintake moramora ty Jesosy fa nisy ndaty lako ty amo toeragneo. ¹⁴ Ie niavy eo, a niony i Jesosy tagnanjomba Nagnahare ao aia reke le izao ty Natao'e ama'e: "Jangagne ihe henaneo! le ko manonta in-tsasa, mba tsy hiavia ty raty ama'o manahake teo'oy." ¹⁵ Niavy eo le nandeha lahilahy nagnambara ama iareo Jiosy fa i Jesosy ro nahajangagne aze. ¹⁶ Le izay avao ty le nagnenjeha o Jiosy reo i Jesosy, satria nanao ze raha zay tamy ty andro Sabata Reke. ¹⁷ Izao ty natoy i Jesosy iareo: "Ty Raeko le miasa avao ndre ie anito aza, ndra Izaho, ka le miasa." ¹⁸ Naho izay, le nindra ty fihàgna iareo Jiosy ty hamonoagne Aze, tsy amy ty agnama ty famenteventea'e ty andro Sabata avao, fa ndra ty fikanjia'e an'Andrianagnehare te ie Rae rery, mampira ty vata'e aman'Andrianagnahare. ¹⁹ À le nanoigne iareo ty Jesosy te ie: "Ambarako ama'areo anio, fa ty Anake le tsy manao ndra inognino ho Aze, naho tsy ze trea'e atao ty Rae avao, fa ndra inognino anoe ty Rae, le atao ty Anake avao ka ze raha zay. ²⁰ Fe ie ze Rae tea Anake naho le manoro aze ze hene raha atao'e vata'ey, le hanoro aze ka ze raha bey mandako iareo Reke latsa nareo. ²¹ Fa manahake ty Rae nampitsangagne naho mamelogne ty mate, le manahake izay ka ty ameloma'e ty Anake tea'e. ²² Fa ty Rae le tsy mitsara na ia na ia, fa nimey'e ty Anjana'e ze hene fitsaragne ²³ mba hiasia ty maro ty Anake manahake ty niasia iareo ty Rae. Ze tsy miasy ty anake le ts miasy ty Rae nagnirake Aze. ²⁴ Ambarako anareo anio, fa ze maharey ty rehako naho le miantoke ze nagnirake Ahy le izay ty managne ty fiaignagne mandrakezay naho le tsy hibosehagne fa nisitse ho havilasy io reke ho amy ty fiaignagne. ²⁵ Le ataliliko, fa ho avy ty andro, naho le andoany ty hilefea'e, naho fa maharey ty fiaragnana ty Anak'Andrianagnahare ny vilasy, le ho velogne ze maharey. ²⁶ Fa manahake ty Rae manan-kavelogne Ama'e ao, ro nagnomeagne ty anake ka mba hanagna'e fiaignagne Ama'e ao, ²⁷ naho le nomea ty Rae lily hitsara ty Anake mandako Aze ty tirin'olombelogne. ²⁸ Asao tsy ho gaga amizay, fa avy ty andro hahareiza ze kila ndaty ty feo andonake agne ²⁹ naho le hiakatse: iareo ze nanao soa hitsangagne ho amy ty fiaignagne, fa ze nanao ratsy ka le hitsangagne ho amy ty fitsaragne. ³⁰ Tsy afake hanao ndra inognino naho Izaho avao. Naho ze nireiko, ro itsarako, le ho maregne ty fitsarako satria tsy mipay ty zotoko irery Raho fa ty zoto Ireke nagnirake Ahy. ³¹ Naho hagnambara ty momba ty vatako Raho, le tsy maregne ty fagnambarako. ³² Misy raike hafa zay nagnambara ty momba Ahy, naho le fantako fa tò ze fagnambare rehafe'e momba Ahy. ³³ Nirahegne tamy i Jaona agne nareo, naho le nagnambara ty maregne Reke. ³⁴ Fe ie ze fagnambaragne rinaeko le tsy avy ama ondaty. Mitalily ze raha zay Raho mba mete ho voavonje nareo. ³⁵ Jaona le jiro nirehetse navaho nagnazava, naho le nareo nagniry ty hifale tsiela tamy ty fahazava'e. ³⁶ Fe ie ty fagnambarako le bey mandako ty ei Jaona, fa ze asa nemey ty Rae ho vitaeko, ze asa nataoko aby, ro magnambara ty momba Ahy fa nirahe ty Rae raho. ³⁷ Le ty Rae ze ro nagnambara Ahy. Mbe tsy naharey ty fiaragnana'e naho nahatrea Aze ndra indraike nareo. ³⁸ Naho ty saontsi'e tsy mba mitoetse ampiaiareo ao, satria nareo tsy miantoke ze nirahe'e. ³⁹ Mipay Soratse Masigne satria mihevetse nareo fa amy io ao ro anagna areo ty fiaignagne Mandrakezay, naho le Soratse Masigne eo avao ka ro magnambara ty momba Ahy, ⁴⁰ fe ie tsy vogno'e ty hagnorike Ahy nareo mba hanagna areo havelogne. ⁴¹ Tsy mandrae ty laza boake ama ondaty Raho, ⁴² satria fantako fa tsy misy fitiavagne anan'Andrianagnahare ty ama areo ao. ⁴³ Avy amy ty tahina ty Raeko Raho, naho le tsy raese areo. Naho misy hafa amy ty agnara'e irerike, le ho raese areo reke. ⁴⁴ Akore ty hiantofa areo, inareo mandrae ty laza boake amy ty hafa mone izao tsy mapay ty laza boake aman'Andrianagnahare tokagne? ⁴⁵ Tsy hieretseretse naraeo te ie Izaho ro hitsara anareo agnatreha ty Rae. Ze raike hitsara anareo le i Mosesy, naho nampipoha areo ty fagnategna areo. ⁴⁶ Naho mino i Mosesy nareo le toko'e hino Ahy, satria ie ty nanoratse ty momba Ahy. ⁴⁷ Naho tsy miantoke ze sinora'e vao nareo le atao areo akore ty hiantoke ty raha volagneko?