¹ À naho fa niony Jesoa te ie rey iareo Fariseo fa nahazo naho nanao batisa mpianatse maro mandako i Jaona Ireke ² (ndre ie tsy vata i Jesosy aza ro nanao batisa fa o mpianaeo), ³ le nisintake ty Jodea ao Reke le niheregne Galilea agne indraike. ⁴ Fa paiae ty magnivakivake Samaria eo. ⁵ Le niavy amy zo tanagne raike Samaria zao Reke, Sykara ty fikavagne aze, agnila ty an-tsasa tane nimey i Jakoba i Josefa ana e. ⁶ Le teo zo fantsaka i Jakoba. Naharey havozake tamy ty fagnavelo ty Jesoa naho le niambesatse amo fantsakagneo eo. Tavoke ho lera faha enegne eo. ⁷ Nisy ampela samaritana raike zay niavy hatsaka rano, le izao ty natao i Jesosy ama te ie: "Mba omeo rano Raho hinomeko." ⁸ Fa mpiana e rey fa nandeha an-tanagnagne mba hivily mahakama. ⁹ Ie avy eo izao ty natao i ampela samaritana ama te ie: "Akore te ihe, Jiosy ,ro mangatake rano kamae amy izaho ampela samaritana?" Fa tsy misy fifankahazoa samaritana ao naho Jiosy io. ¹⁰ Namale ty Jesosy naho le nisaontsy nanao tihoeke te: "Naho nifantao ty fagnomezan'Andrianagnahare, naho mirehake amao te ie: 'Omeo rano hinomeko,' le ihe ka ty ndra nangatake ama e, le ho nimeae rano velogne." ¹¹ Le izao ty natao i ampela ay amae: "Aba, tsy nanam-pitovy niheo naho laleke fantsakagneo. Avaho aia ro hahazoao rano velogne? ¹² À ihe tsy bey, sà, amy ty agnama i Jakoba razambeintika, nagnomey anay fantsakagne naho i vata ey ty nikama amae, manahake o anaeo naho biby eo?" ¹³ Izao ty natao i Jesosy namale aze te ie: "Ze minogne amy ty rano toy aby le mbe harandrano avao, ¹⁴ fa ndra ia ia minogne amy ty rano ho meiko aze le tsy harandrano hatramparae. Fe ie ty rano ho meiko aze le hanjare rano miboboke ampiaie ao, naho le minday aze amy ty fiaignagne mandrakezay." ¹⁵ Izao ty natao i ampela ay amae: "Tompoko, meo amo zo rano raho soa te tsy harandrano naho le hanjare tsy hantaka etoa in-tsasa." ¹⁶ Izao ty natao i Jesosy amy ampelay: "Akia, tokavo ty valio, le miheregna mbetoa." ¹⁷ Namale i ampela ay le nirehake amae te ie: "Tsy manambaly raho." Le tihoe ty navale Jesosy: "Tò nio volagneo zay te ie: "Tsy manambaly raho, ¹⁸ fa toe fa nanambaly in-lime rehe, naho toe le mbe tsy valio ka ndra itobohao henaneo. Tò ze volagneo zay." ¹⁹ Izao ty natao i ampela ay amae: "Ragnandria, treako fa mpitoky Rehe. ²⁰ Iareo razantika le tama ty vohitse toy eto te nivavake, fe ie nareo nitalily te Jerosalema ty toeragne tokoe hivava ze ndaty." ²¹ Fe izao ty natao Jesosy amae: "Minoa Ahy, rampela, fa hoavy ty andro hidera areo ty Rae fe ie tsy ambohitse naho toe tsy e Jerosalema agne ka. ²² Fa nareo miankotrake amy ze tsy fantareo. Izahay ka le miankotrake amy ze fanta ay satria o famonjeagneo le boake amy iareo Jiosy. ²³ Fe ie, ho avy ty andro, naho le anito avao, fe ie hidera ty Rae amy ty fagnahy naho fahamaregnagne nareo mpivavake vatae, satria ndaty manahake izay ty paia ty Rae mpidera Aze. ²⁴ Andrianagnahare le Fagnahy, naho ze ndaty midera Aze le mahay tsy midera amy ty Fagnahy naho fahamaregnagne." ²⁵ Le tihoe ty natao i ampela ay amae: "Fantako fa hoavy ty Mesia (atao tihoeke ey te ie Kristy). À naho fa avy Reke, le hitsakore amantika ze hene raha." ²⁶ Izao ty natao Jesosy amae te ie:" Izaho mirehake amao zao, ro Ie." ²⁷ Tamy ze fotoagne zay le nibalike iareo mpianae. Naho le nagnontane vatagne iareo te ie: Nagninogne Ireke ie misaontsy amo ampela ao, fa tsy nisy nirehake te ie: "Inogne eo paiao?" Ndra ie: " Nagninogne Irehe ro mirehake ama eo?" ²⁸ Naho ty agnama izay le nengà ampela ay siny ey, le nandeha reke nibalike an-tanàgnagne agne, le nirehake amy ndaty te ie: ²⁹ "Handeha, hitilike lahilahy nivolagne ty raha nataoko oy. Tsy ho Kristy zay, sà Ie vao koahe? ³⁰ Le nisintake tanagnegney iareo le niheo Amaeo. ³¹ Ampara izay, nandrisike Aze iareo mpianae, le tihoe ty nataoe: "Mpagnanatse, mikamà." ³² Le izao ty Nataoe ama iareo te ie: "Managne hanen-kohanegne nio Aho fe ie tsy fantareo." ³³ Le nifampibisibisike iareo mpianae te ie: "Tsy nisy ndaty niday mahakama ho Aze, sà nisy vao koahe? ³⁴ Izao ty natao i Jesosy amy iareo: "Ty haneko le magnorike ze zoto ty nagnirake Ahy naho le manao ty asae. ³⁵ Tsy Ihe vao nirehake te ie: "Efa-bolagne ty sisa le hoavy faosay? Ambarako anareo, ampagneteo masoareo le henteo ty an-tonda ey, fa masake naho le fa horofota iareo! ³⁶ Ze mahavokatse le mandrae karama naho le hamory vokatse ho amy ty fiaignagne mandrakezay, naho le hiharo gafaleagne mpitongy naho ze mahavokatse. ³⁷ Fa amizay le tò rehake manao tihoekey te ie: 'Ty raike mpitongy, le ty raike ka mpamokatse,' ³⁸ Nagnirake anareo handrae ze tsy nilifosa areo Raho. Tila'e hafa ro nilofo, naho le nareo ro miditse eo amy ze nilofosae." ³⁹ Lako tamy iareo samaritana tamy ze tanagne zay ro niantoke Aze noho ty raha natalily ampelay nambarae te ie: "Sinaontsie amako iaby ze kila raha nataoko." ⁴⁰ À naho fa niharine Aze iareo samaritana, le nihalalea iareo Reke mba hijanogne hindre amy iareo, naho le nijanogne ao roe andro Reke. ⁴¹ Maro hafa ro niantoke naho ty rehae. ⁴² Izao ty natao tamy ampelay: "Tsy noho ze nivolagneo in-tsasa ro hiantofa ay, fa zahay ro fanarey, naho le apota ay te Reke vatae ty Mpagnaha ze kila raha." ⁴³ Tafara roe andro oy, le nisintahae ty ao le niheo e Galilia agne Reke. ⁴⁴ Fa Jesosy ro nagnambara fa mpianaeo le tsy managne ty lanjae amy ty tane'e manokagne. ⁴⁵ À naho fa niavy e Galilia ao Reke, le rinae iareo nte Galilia Reke. Iareo le nahonigne ze hene raha nataoe nte Jerosalema ao tamy andro fifaleagne, satria toe le tagne ka iareo tamy ty andro fifaleagne. ⁴⁶ Le niavy nte Kana e Galilia ao ndrike Reke, tanagne nagnovae ty rano ho divay. Nisy tandampa raike zay nanagnanake lahilahy marare te Kapernaony ao. ⁴⁷ À naho fa nirey e te hoavy e Jodia ho e Galilia agne ty Jesosy, le nimbamy Jesosy eo ka reke naho le nihalale amae mba hizotso mbeo hagnaha ty anae lahahily, naho le fa haito. ⁴⁸ À ie niavy amà nisaontsy tamy iareo ty Jesosy te ie: "Naho tsy mahatrea famantaragne navaho fahagagagne nareo, tsy mba hino vatae." ⁴⁹ Izao ty nata tandampa ay amae: "Ragnandria, mba mizotsoa mialo ty haitoa o anako." Izao ny natao Jeaosy ⁵⁰ tamae te ie: "Mandehàna fa velogne i anaoy." Ninoa ty to raha nisaontsie Jesosy tamae lahilahy, naho le nandeha reke. ⁵¹ À naho fa nizotso reke, le nanalaka aze mpanompo e rey, nitalily te ie velogne iana'ey. ⁵² Le nagnontanea'e iareo ty lera nijangana'e. Le nanoigne aze iareo te ie: "Omale tamy ty lera faha fito ro nialà i tazogney tama'e." ⁵³ Fanta i rae'ey naho niavy eo fa tamo o lera ao ro nisaontsia i Jesosy aze te ie: "Velogne i anao'oy." Naho le nino i vata'ey naho ze hene longo'e. ⁵⁴ Izay ty famantaragne faha roe natao i Jesosy tamy ty Ie nisitse ty e Jodia ao ho e Galilia ao.