¹ Tafara ze raha zay ty Jesosy le niavotse e Galilia añe, fa tsy te ho e Jodia Reke noho ty fipaia o Jiosy io Aze ho vonoeñe. ² Naho toe fa marine ty andro fifalea ty Jiosy ty Tabernakely. ³ Le nisaontsy ama' e amizao roahalahie eo te: "Isintaho ty eto le akia Rehe miavota e Jodia añe, mba hahaia mpianao reo mahatrea ty asa atao ka. ⁴ Tsy misy ndaty nañetake ty raha natao e naho le vatan-teña 'ey ro hijehejehe amity maro. Naho manao ty raha ao nareo, le miboaha Amy ze kila raha. ⁵ Fa ndra roahalahie eo ka toe tsy nino Aze. ⁶ Le nisaontsy iareo amizao ty Jesosy te ie: "Mbe tsy avy ty androko, fa ty anareo ka le miviñona lomoñandro. ⁷ Toe tsy halaiñe anareo ze kila raha, fa Izaho ro heje'e satria mampiboake fa raty ty asa'e. ⁸ Inareo ro miakara amo zo fifaleañe zao; fa Izaho tsy hoañe satria mbe tsy avy ty androko." ⁹ Tafara ty nisaontsia'e ze raha zay ,le nijanoñe e Galilia avao Reke. ¹⁰ A naho fa niheo amy fifaleañe ey añe iareo roahalahie, le niavotse ho mbeo ka Reke naho niavy eo, fe ie tsy niboake fa nietake. ¹¹ Nipay aze tamy fifaleañe ey ao iareo Jiosy naho le nirehake te ie: "Nimbaia Reke?" ¹² Mato ty rehake mioba Aze tañate maro oy ao. Ty ilae mivolagne fa: "Ajalahy vañone Reke." ty ilae ka mivolagne bte ie: "Tsie zay, fa mitarike o maro amy ty himotsoa'e Reke." ¹³ Naho le tsy nisy nahavany nirehake miomba Aze añivo maro naho ty taho o Jiosy io. ¹⁴ Ie nisasake fifaleañe ey, le niheo Añanjomba Nañahare ao ty Jeosy naho le namototse ty fampianarañe. ¹⁵ Ie niavy eo Latsan-draha iareo Jiosy, nivolañe te ie: "Akore ty ahaiza o lahio io ze hene raha zao iaby? ¹⁶ Ie ndra raike tsy mba nianatse." Le tihoe ty natoy Jesosy iareo te ie: "Tsy Ahike fampianarako, fa hirike amy Ie nañirake Ahy. ¹⁷ Naho misy ndaty mañiry te hanao ty zotonarofo e, le hahafantatse miomba fampianarañe eo reke, na hirike aman'Andrianañahare zao, na ty Izaho ambatako avao ro mirehake aze. ¹⁸ Ndra ia ndra ia nivolañe hirike amy ty vatae le mipay ty volonahe ty teñae irery, fa ndra ia ia ro mipay ty volonahe ty nañirake aze, le io ndaty mareñe, naho le tsy misy ankoatse ty hamareñañe ty ama'e ao. ¹⁹ Tsy nañomey lily anareo vao t'i Mosesy? Fe tsy misy ama areo mitandreñe ty lily. À nañino nareo mipay ty hamonoañe Ahy io? ²⁰ Nanoiñe maro oy te: "Misy kokolampoñe ny Iheo. Avaho ia mipay ty hamonoañe Azo?" ²¹ Namale t'i Jesosy naho le nisaontsy te: "Raike avao ty asa Nataoko, naho le ilatsà areo iaby zay. ²² Nimey i Mosesy anareo ty savatse (tsy te ie hirike amy i Mosesy, fa boake Amy iareo razañe), naho le Amy ty tsy fiasañe le manavatse o ndaty nareo. ²³ Naho Amy ty andro tsy iasañe ro anavarañe o ndaty mba tsy handika ty lily i Mosesy, le ino ty ihejea areo Ahy naho mampijangañe ty ndaty raike amy ty andro tsy iasañe Raho? ²⁴ Ko mitsara amy ty lafie ambohoe, fa mitsarà Amy ty hamareñañe." ²⁵ Nisy ty ilae amy iareo hirike e Jerosalema añe mirehake te: "O tsy itoy vao paia iareo ho vonoeñeo? ²⁶ Heteo re, misaontsy miboake Reke, naho le tsy misy nivolañe Aze iareo. Le ho fanta mpinday fanjakañe vatae hoake vao fa Ie zo Kristy zao, sa akore? ²⁷ Fa haintika anio te ie boakaia o lahio. À naho fa avy ty Kristy, le amoa'e te hirike aia Reke?" ²⁸ Ie niavy eo nikoike mafe Añanjomba Nañahare ao ty Jesosy, nampianatse naho le nisaontsy te: " Inareo le sambe mahafantatse Ahy naho le mahay ty nihirifako. Tsy avy noho ty vatako irery o Aho, fa Ie nañirake Ahy le mareñe, naho amoa areo Reke. ²⁹ Fantako Reke fa hirike Ama'e Raho naho le ie ro nañirake Ahy." ³⁰ Nanao ze hitsepahañe Aze iareo, fa tsy nisy nañeba aze satria mbe tsy avy ty andro e. ³¹ Maro amy iareo ty ndaty nino Aze, naho le izao ty natao: "Naho fa avy zo Kristy zao, mbe hanao famantarañe mandako lahio koahe Reke vao?" ³² Naho naharey ty bisibisike natao maro oy miomba i Jesosy iareo Fariseo, naho lahibey ty mpisoroñe le nañirake mpiambeñe hitsepake Aze. ³³ Ie niavy eo le izao ty natao i Jesosy: "Fa tomotse ty andro hiharoako ama areo, le hiheo amy ty ty nañirake Ahy añe Raho. ³⁴ Hipay Ahy nareo fe ie tsy hahatrea Ahy; navaho ze ho mbako, tsy ho azo areo andehanañe." ³⁵ Noho izay avao le nifañitekiteke iareo Jiosy nivolañe te: "Aia hombà o lahio io ro tsy ho vitantika ty hipay Aze? Hiheo amy iareo ze nibaratsiake mbamo Grika mbeo le hañanatse iareo Grika vao? ³⁶ Avaho ino ty dika volañe nambara' ey te ie: "Hipay any nareo fe ie tsy hahatrea Ahy; ze ombako, tsy ask areo ombañe?" ³⁷ Tamy ty fara ty andro fifaleam-bey, le nitsangañe ty Jesosy naho le nikoike made, nanao tihoe: "Naho misy marandrano, adono reke hihovae mbamako mbeto naho le hinoñe. ³⁸ Ze mino Ahy, manahake ty nambara Soratse Masiñe, le hionja añate antroe ao ty raho veloñe." ³⁹ Fa izao ty nambarae miomba ty Fañahy, iareo ze niantoke Aze ro handrae; Fañahy io le tsy nimeñe satria know tsy nahazo Volonahetse ty Jesosy. ⁴⁰ Ty ilae tamy maro rey, naho fa maharey ty saontsy hoe izay, le nivolañe te ie: "Intoy vatae mpitoky io." ⁴¹ Tilae nirehake te ie: "Intoy Kristy io." Fa ty ilae ka le nivolañe te: "O vao boake e Galilia agne ty Kristy? ⁴² Tsy nambara Soratse Masiñe vao fa Kristy le boake any foko i Davida naho mbe toe Betlehema so ka, ty tane nihirifa i Davida? ⁴³ Nivaky roe amizay fokonolo oy noho Reke. ⁴⁴ Ty ilae tamy iareo te te hitsepake Aze, fe tsy nisy nahavany nañeba Aze. ⁴⁵ Ie niavy eo nibalike mbamy lahibey ty mpisoroñe naho Fariseo rey mpiambeñe ey, le tihoe ty natao iareo aze: "Inoñe tsy nindesa areo Aze eo?" ⁴⁶ Izao ty natoy mpiambeñe ey te ie: "Know liae tsy nisy rename nanao izay ndraike." ⁴⁷ Le tihoe ka ty natao Fariseo rey nanoiñe iareo te: "Voafitake ka vao nareo? ⁴⁸ O vao nisy nino Aze tamy iareo mpandily, ndra ty tamy iareo Fariseo? ⁴⁹ Fa maro ro tsy nahafantatse ty lily, nivozoñañe iareo." ⁵⁰ Nikodemosy (raike any iareo Fariseo, niaolo amae añe), nivolañe te ie: ⁵¹ "O vao ty lilintika mizaka ndaty miaolo ty hahareizañe aze navaho hahaiantika ze raha natae? ⁵² Namale iareo naho le nivolañe te ie: "Hirike e Galilia ka viheo? Dineho naho le heteo fa mbe lia tsy misy mpitoky ty hireke e Galilia añe." ⁵³ (Fañamareñañe: Ty dikan-drehake taolo nifanjaka vatae le tsy ahatreavañe Jaona 7: 53-8: 11) [Sambe niheo an-traño añe kiraidraike naho niavy eo].