¹ Ie niavy eo le niente i Pilato ty Jesosy naho le jinerae. ² Nandrandrañe satroke fatike iareo maramila. Nasatro iareo ty añambone i Jesosy naho le nampañisie sarimbo volomparasy Reke. ³ Niharine Aze iareo naho le nivolañe te: "Salama, ty mpanjaka ty Jiosy!" Naho le jinera iareo. ⁴ Ie niavy eo niakatse indraike ty Pilato naho le nisaontsy amy iareo te: "Ingo, enteko ama areo alafe ato Reke mba hahafantara areo fa tsy treako ty foto ty hanazeañe Aze." ⁵ Le niakatse ty Jesosy, nañisy fehe añambone fatikey navaho sarimbo volomparasy. Izao ty natao Pilato amay iareo: "Ingo, lahy io!" ⁶ À naho fa nitrea iareo mpisoroñe navaho manambolonahitse ty Jesosy, le nikorake mafe iareo le nivolañe te: "Vonò reke, vonò reke!" Le tihoe ty natao Pilato amy iareo te ie: "Alao areo Reke le vonò, fa tsy treako ty foto ty hamonoañe Aze." ⁷ Namale iareo Jiosy te: "Manan-dily tika, naho le ampo ty lily ao le vonoañe ty fañevae fa manoñe ty vatae ho Anak'Andrianañahare." ⁸ À naho fa nirey i Pilato hoe izao oy, le natahotse Reke, ⁹ le nizilike andampam-panjakañe ao indraike reke naho le nañontane i Jesosy te : "Boakaia iheo?" Fe ie tsy nanoiñe ty Jesosy. ¹⁰ Ie niavy eo ty Pilato nitsara amae te: "Tsy manan-kanoiñañe ahy viheo? Tsy fantao vao te ie manam-pahefañe hamotsorañe Azo raho, navaho fahefañe hamonoañe Azo?" ¹¹ Namale aze ty Jesosy te ie: "Tsy manan-dily Amako rehe katao tsy nimeiñe azo hirike ambone añe zay. Manao izay, ie nañomey Ahy azo le manankakeo bey vata e." ¹² Amy ze toin-tsara zay, le nanao ze hahavotsotse Aze ty Pilato, fe ie le nikorake mafe iareo Jiosy, nanao tihoe: "Naho ho votsorao lahy io, le tsy ho mpirañetse nareo amy Kaisara. Ze manao ty vata e ho manjaka le mandietse i Kaisara." ¹³ Naho naharey ty rehake hoe izao ty Pilato, le niday i Jesosy niakatse naho le nampiambesare e amy ze seza fizakañe atao "lampivato" zay, fa amy ty rehake Hebreo reke le: "Gabata." ¹⁴ Fa avy ty andro fiviñonañe amy ty Paska, tamy ty lera fa eneñe. Izao ty natao Pilato amy iareo Jiosy te: "Ingo, itoy mpanjaka areo!" ¹⁵ Nikorake mafe iareo te: "votsoro Reke, votsoro Reke, vonò Reke!" Izao ty natao Pilato tamy iareo te: "Izaho vao ty fañeva ty hamono ty mpanjaka areo?" Namale iareo lahibey ty mpisoroñe te: "Tsy manañe mpanjaka naho tsy Kaisara izahay." ¹⁶ Ie niavy eo le vinotso Pilato hoe iareo amizao ty Jesosy ho vonoeñe. ¹⁷ Nalae iareo amizao ty Jesosy, naho le niente iareo niakatse Reke, hinday ty hazonajale, ho amy zo toerañe atao: "tanen-karandoha," "Golgota" ty tokavañe aze naho amy saontsy Hebreo. ¹⁸ Añe ty mamonoa iareo Jesosy, navaho le nisy ajalahy roe lahy hafa ka nindre amae, raike isae mbatia mbaroa, naho le ampañivoa iareo amizao ty Jesosy. ¹⁹ Le nanoratse famantarañe ka ty Pilato naho napetae ambone hazonajale eo. Izao ty sorae te: "JESOSY BOAKE E NAZARETA, MPANJAKA TY JIOSY. ²⁰ Maro ty Jiosy namaky aze famantarañe eo fa toe tsy lavitse tanañeo ka ty toerañe namonoañe i Jesosy. Le sinoratse amy ty rehake Hebreo, Latina, navaho Grika o famantarañe eo. ²¹ Ie niavy eo le tihoe ty natao lahibey ty mpisoroñe ey amy Pilato te: "Tsy sorateñe te ie: 'Mpanjaka ty Jiosy, fa anò tihoe: "Izaho ro mpanjaka ty Jiosy." ²² Naho le nanoiñe ty Pilato te: "adonò ze voasoratse le voasoratse." ²³ Naho fa tinombo iareo miaramila ty Jesosy, le nalae iareo sarimboe ey, naho le zinara iareo efatse, le sambe nanan-kiraikiraike aby iareo; Navaho iakanjoe ey ka. Naho le tsy nisy vitrae akanjo oy, fa tenoñe raike avao. ²⁴ Ie niavy eo nifampirehake amizao iareo te: "Tsy riaten-tika toy, fa andao anoan-tika kizé hahatreavañe ze mahazo aze." Nisy aby zao mba hilefesa ty Soratse Masiñe manao ty hoe te: "Hifanjarà iareo ty lambako naho le hanoa iareo kizé ty akanjoko." Izay ro nanoe iareo maramila. ²⁵ Nitsangañe añila hazonajale i Jesosy eo ty Rene e, roahavave e, Maria tañanjomba i Klopa, navaho Maria Magdalena. ²⁶ À naho nahaoniñe an-dRene e navaho iareo mpianae tea e nitsangañe añila Jesosy eo, le tihoe ty natao aman-dRene te: "Rampela, ingo, ty ana-dahio!" ²⁷ Ie niavy eo le izao ty natao amy iareo mpianae te: "Ingo, reneareo!" Tamy ze lera zay le nalae mpianae rey ho amae añe Reke. ²⁸ Tafara izay, naho fa nahafantatse fa vita iaby ze raha naho mba hilefesa ty Soratse Masiñe, le izao ty natao i Jesosy: "Taliñeren-dRaho." ²⁹ Naho le nisy tavoara feno divay masiake nipetrake ty tamo toerañeo eo, le nisiaiareo divay masiake sipaonjy le nitohiza iareo hysopa naho le napo iareo am-palie eo. ³⁰ Naho fa boake nikama vinaingitra ty Jesosy, le nanao izao te: " Fa vita." Naondre e ty añambone e naho le nilañe ty arofo e. ³¹ Andro Masiñe tamizay, naho le tsy najanoñe an-kazonajale ey amy ty andro sabata (satria ty sabata le andro mana ty lanjae manokañe) ty fañova iareo, fa nihalale amy Pilato amizao iareo Jiosy, mba hanampahañe ty fandia iareo naho le hañafahañe iareo. ³² Ie niavy eo nimbamy raike voalohae ey eo amizao iareo maramila naho le nanampake ty tomboe navaho nanampake faha roe nidre vonoañe amy Jesosy. ³³ À naho fa niharine Jesosy iareo, le te ie fa vilasy ro trea iareo, naho le tsy tanampa iareo ty fandia e. ³⁴ Fe ie, nisy maramila raike nitomboke lefoñe ty vavan'arofo e, naho rano navaho lio ty niakatse hirike ao. ³⁵ Iraike nahatrea aze ey le nitsangañe ho voavolombeloñe, naho toe le nitò ty fañambarae. Fantae fa mareñe ty rinehae mba hinoa iareo ka. ³⁶ Fa ze raha zay ro nisy mba hilefesa ty Soratse Masiñe te ie: "Ndra raike tsy hisy ho tampake ty taola e." ³⁷ Naho le mboe, misy Soratse Masiñe ilae ka mañambara te: " Iareo le hañente ty nitomboha iareo Aze lefoñe ³⁸ Tafara ze raha zay iareo, Josefa boake Arimatia, namototse amy ty naha mpiana i Jesosy aze ( fa tamy ty mangike naho ty fatahorañe iareo Jiosy), nañotanea i Pilato reke te ie ho afake mangalake ty fañova i Jesosy reke. Vinotso Pilato reke. ³⁹ Naho le niavy ty Josefa nangalake ty fañovae. Niavy añe ka ty Nikodemosy, ie ty niavy aolo hañete i Jesosy amy ty hariva iñe. Naho le ninday solimañitse navaho vahoñe reke, vae zato lintatse eo ty fatra e. ⁴⁰ Le nalae iareo ty fañova i Jesosy naho le finehe iareo amy ty sarimbo navaho raha mañitse, arake ty fomba fandeveña ty Jiosy. ⁴¹ Naho le saka tamy toerañe namonoañe Aze; le nisy lonake mboe vao tsy nandevañañe ndaty zay ty teo. ⁴² Satria andro fiomana iareo Jiosy tamy io naho toe le marine lonake ka, le tao ty nandeveña iareo ty fañova i Jesosy.