¹ Tafara ty nisaontsia i Jesosy ze tsara zay, le niakatse nindre amy mpianae eo Reke hiheo andafe riake e Kidrona ey, nisy saka nidira e navaho mpianae eo. ² Naho le fanta i Jodasy hifotetse Aze ey toerañeo, fa fañaveloa i Jesosy navaho mpianae eo mateteke. ³ Ie niavy eo, le nitariha i Jodasy tafike miaramila navaho mpiamben-drarahara ilae boake amy ty lahibey ty mpisoroñe navaho Fariseo amizao, nadeha mbeo reketse fañilovam-panala navaho kobaim-pialiañe. ⁴ Ie niavy eo ty Jesosy, toe fa fanahaaoniñe ty raha hisy Amae, niheo aloha ao naho le nañontane iareo te ie: "Ia o paia areo?" ⁵ Le ty hoe navale iareo Aze te: "Jesosy boake e Nazareta." Naho le tihoe ty natao Jesosy tamy iareo te: "Intoan-draho." Jodasy, nifotetse Aze, le nitsangañe nindre amy miaramila rey eo ka. ⁶ À naho fa niboake amy iareo Reke te ie: "Izaho ro Ie", le nihemotse iareo naho le nitonta an-tane eo. ⁷ Ie niavy eo le mbe nañontane iareo indraike ty Jesosy te ie: "Ia paia areo?" Naho le mbe nivolañe indraike iareo te: "Jesosy boake e Nazareta." ⁸ Izao ty navale i Jesosy te ie: "Fa nambarako anareo anio fa o Vatako ro Ie. À naho mipay Ahy nareo, le adono toa handeha." ⁹ Izay le mba hifelesa ty saontsy nambara e te ie: "Iareo nimeio Ahy, le tsy nisiako motso ndra raike." ¹⁰ Ie niavy eo ty Simona Petera, nana mesa, naàkae naho le natampae ty sofy mpanompo mpisorombey havàna. ¹¹ Malko ty añara mpanompo oy. Izao ty natao i Jesosy Petera te: "Aidiro antraño e ao mesa oy. O vao tsy hikama ty kapoake nimein-dRaeko Ahy Raho? ¹² Manao izay iareo miaramila navaho kapiteny, le iareo mpiamben-drarahara ty Jiosy, le nitsepake i Jesosy naho le namahotse Aze. ¹³ Niente iareo mbamy i Anasy eo he Reke, fa ie rafozan-dahy i Kaifa, mpisorombey tamy taoñe eo. ¹⁴ Naho Kaifa o nañomey fañahy iareo Jiosy te ndra aleo misy ndaty raike mate ho eo fokonolo. ¹⁵ Niorihe i Simona Petera amizao ty Jesosy, naho le nanao hoe izay aby ka ty mpianae raike hafa. Naho le nifanta mpisorombey ze mpianatse zay, le niditse nindre amy Jesosy ankiririsa mpisorombey ao ka reke; ¹⁶ fa Petera le nitsangañe alafe lalambey ao avao. Manao izay mpianatse hafa raike, fanta mpisorombey, le niakatse naho le nirehake amy mpanompo ampela mpiamben-dalambey naho le niday i Petera niditse. ¹⁷ Ie niavy eo ampela mpanompo, mpiamben-dalambey, nirehake amy i Petera te ie: "Ihe ka vao tsy raike amy ty mpiana lahilahy io?" Le tihoe ty natao e te ie: "Tsy ie raho." ¹⁸ Naho le nitsangañe eo iareo mpanompo navaho iareo mpiamben-drarahara, naho le nameloñ' afo marindray iareo hamindroa e; fa manintsy iandroy. Nitsangañe nindre amy iareo ka are ty Petera naho le namindro ¹⁹ Nañontane ty momba i Jesosy navaho ty fampianara e mpianae eo mpisorombey. ²⁰ Izao ty navale Jesosy aze: "Nitsara ampo ty maro amy ze kila tane Raho. Nampianatse lomoñandro e Synagoga navaho Añanjomba Nañahare Raho nifampitaona ,e Jiosy aby. Tsy nisy nañambarako ankaloke. ²¹ Ino o añontaneao Ahy io? Añontaneo iareo nitsanoñe Ahy ty momba ty raha nataliliko. Heteo, o ndaty henaneo le mafahantse ze raha nambarako iaby ²² Naho fa niavy nisaontsy izay ty Jesosy, le nisy raike amo mpiamben-drarahara nitsangañe eo nanakapike i Jesosy naho le nivolañe te: "Izao vao ty toin-drehake avale eo ty mpisorombey?" ²³ Izao ty navale Jesosy aze te : "Naho diso ty nambarako, mitsangàna ho voavolombeloñe amy ze diso, fe ie naho mareñe amà, ino ty foto ty anakapihao Ahy?" ²⁴ Ie niavy eo ty Anasy namotsotse Aze hifehe amy Kaifa mpisorombey añe. ²⁵ À naho fa nitsangañe ty Petera le namindro. Le tihoe ty natao ndaty ama eo te : "Tsy raike amo mpianae eo ka viheo? Nandietse reke naho le nivolañe te ie: "Tsy ie raho." ²⁶ Raike ama ty mpanompo mpisorombey, longo lahy tinampa Petera ty sofy 'ey, nirehake te: "Tsy Ihe vao nitreako nindre amae antsaka ao? ²⁷ Naho le mbe niliere Petera avao, le nikekeo ty akoho. ²⁸ Ie niavy eo le tinantaly iareo boake amy Kaifa ao ty Jesosy hiheo añate rova ao. Mbe maraindraim-bey tsikiake tamy zay, naho le tsy niditse ampo rova ao iareo mba tsy haloto fa hinanñe amy ty Paska. ²⁹ Naho le niakatse ama iareo amizao ty Pilato le nisaontsy te: "Hein ty anto ty indesa areo lahy io toy?" ³⁰ Le namale iareo naho le nivolañe te: "Naho tsy mpanao raty lahy io tsy natolo'ay azo." ³¹ Manao izay le nitsara ty Pilato te ie: "Ento areo Reke, le zakao areo amy ze lily areo." Le tihoe ty natao iareo Jiosy amae te: " Tsy añate ty lily ay ty mañomey ndaty ho vonoeñe." ³² Nitsara izay iareo mba hilefesa ty saontsy nambara Jesosy ty hoekey te karazan-kavilasy manao akore ro hivilasia e. ³³ Ie niavy eo le nimoake ampo rova ao ndraike ty Pilato naho le nitoka i Jesosy nañontanea e te: "Ihe vao mpanjaka ty Jiosy io?" ³⁴ Izao ty natoy Jesosy aze: "Mañontane amy ty vatao viheo, sa nisy ndaty hafa nivolañe amao ty momba Ahy?" ³⁵ Le tihoe ty natao Pilato: "Tsy Jiosy nio aho, sa tsy izay vao? O fokonolo o navaho lahibey ty mpisoroñe eo nanolotse azo amako. Ino ty natao o? ³⁶ Le namale ty Jesosy te: "Ty fanjakako le tsy boake amy ze kila raha. Fa naho mba tañate ty zao tontolo zao ty fanjakako, le ho niaro Ahy mpanompoko mba tsy hanolorañe Ahy o Jiosy io. Fa henaneo ty fanjakako le hirike etoy." ³⁷ Ie niavy eo ty Pilato nitsara amae te: "Mpanjaka zane ihe henaneo?" Izao ty natoy Jesosy te: "Ein mpanjaka Raho". Fa hikendre izay ro nisamahañe Ahy, navaho izay ty foto ty niaviako etoy, mba nitsangañe voavolombeloñe amy ty fahamareñañe amy ze kila tane. Iareo aby ze amy ty fahamareñañe le mitsanoñe ty feoko." ³⁸ Nisaontsy amae ty Pilato te: "Ty manao akore mareñe eo?" Naho fa boake nitsara izay reke, le niake indraike naho nisaontsy amy iareo Jiosy te: "Tsy treako ty foto ty hanazeañe lahy io. ³⁹ Fa nareo manañe ty lily hamotsorako ndaty raiko ho ama areo amy ty Paska. Manao izay zoto areo vao ty hamotsorako ama areo ty mpanjaka ty Jiosy?" ⁴⁰ Ie niavy eo iareo le nikorake mafe indraike naho le nivolañe te ie: "Tsy o lahy io, fa Barabasy." Mpangalatse o Barabasy io.