¹ À naho fa boake nisaontsy ze raha zay ty Jesosy, le niandrandra niañambone Reke le tihoe ty natao e: "Aba, avy ty andro, asandrato ty Anao mba hanandrata e Azo ka_ ² manahake ty nañomezao Ahy fahefañe ambone ze mofo aby mañomea fiaiñane mandrakezay ho ey ze kila ndaty nimeao Aze. ³ Izao ro fiaiñane mandrakezay: le ty hahafantara iareo Azo, ie Andrianañahare tokañe naho mareñe, naho le niraheo Reke, le Jesosy Kristy. ⁴ Nanandratse Azo Raho te antane etoy. Fa vitako ty asa nampanoe o Ahy. ⁵ Androany, Aba Mamy, le asandrato mindre amao Raho amy volonahitse fa nanañako nindre amao taloha ty namboarañe ze kila raha. ⁶ Nampahafantatse ty tahinao tamy ze ndaty nimeao Ahy aby Raho amy ze kila tane. Azo irery, naho le nimey o Ahy, navaho le niambenae ty saontsy o. ⁷ Fantaiareo henaneo fa nimeio Ahy ze kila raha, naho le boake Amao, ⁸ le nimeiko iareo ka za saontsy nimeio Ahy. Toe le rinae iareo ka io naho le nifatae fa boake Amao vatae Raho, le nino iareo fa Ihe ro nañirake Ahy. ⁹ Mivavake ho ey iareo Raho. Tsy mivavake ho ey ze kila tane Raho fa mivavake ho ey iareo natolo o Ahy, noho ty maha Azo iareo. ¹⁰ Ze hene raha Ahy le Azo aby, navaho ze Azo le Ahy ka, le izay ro hanandrata iareo Ahy. ¹¹ Tsy amy ze kila tane in-tsasa Raho, fa o ndaty reo ro etoy, naho le miharine anareo Raho. Aba Masiñe, tano amy ty tahinao nimeio Ahy iareo mba hiharo raike, manahake ty maha raike Antika. ¹² Tamy ty Izaho mboe tamy iareo eo, le nitañe aze iareo tamy ty tahinao, nimeio Ahy. Niaro iareo Raho, naho le tsy nisy motso ndra raike, naho tsy ze fa ana ty motso avao, mba hilefesa ty Soratse Masiñe. ¹³ Naho le ho Amao añe Raho, fa mañambara ze raha zay amy kila tane Raho mba hilefesa ty hafaleako amy iareo ao. ¹⁴ Fa nimeiko iareo ty saontsy o, naho le iareo ro hasandra ty tane toy satria tsy hirike ama ze kila raha, manahake Ahy tsy ey ze kila raha. ¹⁵ Tsy mangatake Amao amy ty hañafahao iareo amy ty tane toy Raho, fa ty mba hiarovao iareo amy ty raty. ¹⁶ Tsy ey zao tontolo zao iareo, manaheke Ahy avao tsy ey zao tontolo zao ka. ¹⁷ Hamasiño amy ty fahamareñañe iareo. Fa ty saontsy o ro fahamareñañe. ¹⁸ Manahake ty nañirahao Ahy ho amy ze kila raha, ro nañirahako iareo ho amy ze kila raha ka. ¹⁹ Fa noho ty hateako iareo iareo no nañamasiñañe ty vata iareo amy ty fahamareñañe ka. ²⁰ Tsy ho ey iareo ty vavahako, fa ho ey ze mino Ahy ka amy ty alala ty reha iareo te ie ²¹ mba ho raike iareo aby, manahake ihe, Rae, Amako ato, naho le Amao ao ka Raho. Mivavake Raho mba ho amantika ao ka iareo mba hinoa ze kila tane fa nañirake Ahy Rehe. ²² Ze volonahitse nimeio Ahy, le nimeiko iareo ka, mba ho raike iareo, manahake ty maha raike Antika. ²³ Amy iareo ao Raho, naho le Amako ato ka Rehe-- le ho raike vatae iareo, mba ho fanta ze kila raha fa nañirake Ahy Rehe, naho nitea iareo manahake ty niteavao Ahy. ²⁴ Aba, ze nimeio Ahy le teako hindre Amako ndre mbaia mbaia ty misy Ahy, naho hahatrea ty volonahiko, le ty volonahitse nimeio Ahy satria niteao Raho taolo ty namboarao ze kila raha. ²⁵ Aba mamy, tsy nisy nahafantatse Azo ze kila tane, fa Izaho ro nahafantatse Azo; naho le fanta iareo ka fa Ihe ty nañirake Ahy. ²⁶ Navoliliko iareo ty tahinao, naho le mbe hambarako iareo ka mba ho amy iareo ty hatea niteavao Ahy, naho le ho amy iareo ao Raho."