¹ "Nataliliko anareo ze hene raha mba tsy hilosora areo. Hafaha iareo tsy amy Synagoga nareo. ² Fa avy ty andro fa naho nivetsevetse ze raha hamono anareo iareo le hañomey raha fanjaka ho an' Andrianañahare. ³ Ho atao iareo zay satria tsy mahafantatse ty Rae iareo ndra Izaho zao fantae. Nataliliko anareo ze raha zay mba naho fa avy ty fotoa iareo, le ho tiahy areo fa fanambarako anareo ty momba aze. ⁴ Tsy nambarako anareo laha tamboaloha e ze raha zay, fa mboe tama areo eto Raho. ⁵ Fa henaneo le hiheo amy nañirake Ahy añe raho te anito, fe nareo mbe tsy nisy nañontane Ahy te ie: "Handeha aia o Aho?" ⁶ Satria fa namboarañe anareo ze raha zay, le alahelo ro nameno ty fo areo. ⁷ Fa ambarako anareo, hanao soa ho anareo ty handehanako. Satria naho tsy handeha Raho, le tsy hoavy amareo ty hery mampatanjake, fa naho mandeha Raho, le handefa aze ho ama areo. ⁸ À naho fa avy reke, le ho profoe amy kila raha ty hadisoañe momba ty hakeo, ty fahamareñañe, naho ty fitsarañe--- ⁹ momba ty fahotañe ty hery mampatanjake, satria mino Aze iareo; ¹⁰ momba ty hamareñañe, fa holy Amy ty Rae añe Raho, naho le tsy ho trea areo in-tsasa; ¹¹ naho ty momba ty fitsarañe, satria ty mpandily ze kila raha ro hotsaraeko. ¹² Manan-draha lako hambara amareo Raho, fe tsy ho azo areo ty dikae. ¹³ Fe ie, naho fa avy ie, Fañahim-pahamareñañe, le hitarike anareo ho amy ze raha mareñe aby, satria tsy volañe ambatae reke. Fa hañambara ze raha nirey e, naho hitalily amareo ze raha ho avy zay. ¹⁴ Hañomey volonahitse Ahy reke, satria hirike Amako avao ro hambarae ama areo. ¹⁵ Ze hene raha anaña ty Rae le Ahy. Manao izay, hirehake Raho fa ty Fañahy hangalake amizay Ahy naho le hitalily aze ama areo. ¹⁶ Vita fotoañe tsy ampe le tsy hahatrea Any in-tsasa nareo, naho le vita fotoañe tsy ampe hafa ka le hahatrea Ahy indraike nareo." ¹⁷ Nifampirehake amizao tilae amo mpianae eo te ie: "Ino ze raha tsarae e amantika zay te ie: 'vita andro tsy ampe le tsy ho trea areo in-tsasa Raho naho le vita andro tsy ampe hafa ka le ho trea areo indraike Raho,' navaho tihoekey te: 'satria ho amy ty Rae añe Raho? ¹⁸ Manao izay le tihoe ty natao iareo: "Ino koa raha saontsie eo te ie :vita andro tsy ampe vao?' Le amoa ay vate nio ze teao ho tsaraeñe." ¹⁹ Ony Jesosy nio te fa te hañontane Aze iareo, le tihoe ty natao e: "Izaho vao o añontanea areo teña ao, le ty fitsakorea rehake ty hoe key te: "Vita andro tsy ampe le tsy hahatrea Ahy in-tsasa nareo, navaho vita andro tsy ampe hahatrea Ahy indraike nareo'? ²⁰ Ambarako anareo, fa hitañy nareo naho le hitaraiñe, fe ie le ho fale aby ty ze kila tane. Le ho boseke nareo, fe ie hanjare hafaleañe ze haboseha areo zay. ²¹ Naho fa mihetseke anake ty ampela raike le himoremoretse reke fa avy ty andro e, fa naho samake ka ajajay, le ho tsy tsiaroe in-tsasa ty habosehae te izay hafalea fa nisy ajaja samake ty antane etoy. ²² Le ho boseke nareo te anito, fe ie mbe hifankatrea amareo indraike Raho, naho le ho fale ty fo areo, naho le tsy hisy hañinje anareo amy ty hafalea areo. ²³ Amy ze andro zay le tsy hangatake ndra inoñino Amako nareo. Ambarako anareo, fa naho mangatake ndra inoñino amy ty Rae nareo amy ty añarako, le homey anareo. ²⁴ Fe ie hatra amizao mboe lia areo ho nangatake ndra inoñino amy ty añarako. Mangantahà nareo, le ho meañe mba hifale areo. ²⁵ Fa nambarako anareo tamy ty fañoharañe ze raha zay, fa avy ty fotoañe tsy hirehafako fañoharañe amareo in-tsasa, fe ie hañambara amareo soa ty momba ty Rae. ²⁶ Amy ze andro zay le hangatake amy ty añarako nareo naho le tsy hataliliko anareo te ie hivavake ho anareo amy ty Rae Raho, ²⁷ fa le ty Rae ro tea anareo satria nikokoa areo Raho naho le ninoa areo. ²⁸ Fa hirike amy ty Rae Raho, naho le niavy antane etoy. Fa hañenga ty ze kila tane Raho naho le ho aman-dRaeko añe." ²⁹ Izao ty natao mpianae eo amae te ie: "Heteo, fa nisaontsy mazava soa Rehe te anito naho tsy nanao fañoharañe. ³⁰ Fanta ay henaneo fa fantao aby ze kila raha, naho le tsy misy teao hañontane Azo . Manao izay, le mino zahay fa boake aman' Andrianañahare Rehe." ³¹ Le ty tihoe ty navale Jesosy iareo: "Mino nareo henaneo? ³² Hehake, avy ty fotoañe, ein ein, avy vatae nio, à naho fa hibaratsiake kiraidraike nareo, le sambe hamonje ty traño e aby, le hengà areo irery eto Raho. Fe ie tsy irerike Raho fa mindre amy ty Rae. ³³ Fa nambarako anareo anio ze raha zay mba hiadana areo Amako ato. Miatreke anareo eto ze kila raha, fe ie le mihamafea: fa zo vatako zao le fa nandresy ze kila tane."