¹ Eneñe andro miaolo ty Paska, le niavy e Betania ao ty Jesosy, tanà i Lazarosy, natsanga i Jesosy tamy ty havilasy e. ² Tao ty nanoa mahakama ho Aze, naho le Marta ro nanjotso ho ey iareo, fa Lazarosy ka le niambesatse niharo amy i Jesosy an-databatse eo avao. ³ Ie niavy eo ty Maria nangalake solike lintatse raike nitaneheñe amy ty narda lafo vily, naho le nahosoe ty fandia i Jesosy tamy izay, naho le finoe amy volo e fandia ey. Atseke ty hañy solikey tañoy. ⁴ Vaho Jodasy Isakariota, raike Amy ty mpianae, hifotetse Aze, nanao ty hoeke te: ⁵ "Natao solike eo ro tsy navily 300 dinaria le nimeañe ty tsy manañe?" ⁶ À ireke nivolañe izay, naho ty fiferenaiñae ze manañe, fa toe mpangalatse reke: te amy fañajam-bola naho le ho nangalare e ze napoke ao. ⁷ Izao ty natao Jesosy te ie: "Adono reke mba hitañe ze anañe ho amy ty andro handetehañe Ahy. ⁸ Ho amareo eo lomoñandro ze tsy manañe, fa Izaho ka le tsy hiheo ama areo eo lomoñandro." ⁹ Maro amy iareo ndaty Jiosy ro nahafantatse fa teo ty Jesosy, le nimbama mbeo iareo, fa mba hahatrea i Lazarosy natsanga I Jesosy tamy ty havilasy e ka. ¹⁰ Iareo lahibey ty mpisoroñe le namisavisa ty ho mbeo hahaia iareo maniotse i Lazarosy may ty hivilasia ka, ¹¹ fa noho ireke ro foto nahavy ty ankamaroa Jiosy io handeha naho le hino i Jesosy. ¹² Ie ny maraiñe iñe le maro ty ndaty niavy ao amy ty andro firavoravoañe. À naho fa nirey iareo te ho e Jerosalema ao ty Jesosy, ¹³ le nangalake rantsa-drofia naho le niakatse nanalaka Aze tamy ty koike mafe te ie: "Hozanna! Haha ie boake amy ty tahina Andriatompo, mpanjaka ty Isrealy." ¹⁴ À Jesosy nahoniñe anam-birike raike naho le niambesatse ambone eo; ¹⁵ Arake ty voasoratse te ie: "Ko matahotse, ry anakampela i Ziona; heteo, ingo tamy ty mpanjaka areo, naho miambesatse ambone ty anam-birike eo." ¹⁶ Tsy niazo iareo mpianae rahao tamy ty voalohae; fa naho fa nimeam-bolonahitse ty Jesosy, le tiahy iareo fa voasoratse momba Aze o raha ao naho le fa natao iareo tamae ka. ¹⁷ iareo maro nindre amae tamy ty nikanjiae i Lazarosy hiakatse lonakey naho tamy nampitsangañe aze tamy havilasy e le sambe nitsangañe ho voavolombeloñe aby. ¹⁸ Le izay ty foto ty nahavy iareo maro hiakatse hanalaka Aze, satria rey iereo fa nanao ze famantarañe zay Reke. ¹⁹ Iareo Fariseo ka nifamisavisa te ie: "Hateo, ndra inoñino tsy atao areo; hehake, mañorike Aze aby ty ndaty toy." ²⁰ Le nisy Grika tsy ampe ampe ka niakatse hidera amy ty firavoravoañe. ²¹ Nimbamy i Filipo eo iareo, boake e Betsaida e Galilia añe, le nañontane aze, nanao ty hoe: "O aba, mba te hahatrea i Jesosy zahay." ²² Le nandeha ty Filipo nirehake amy Andrea; le nindre amy Filipo ty Andrea, naho le nitalily amy Jesosy iareo. ²³ ty hoe navale Jesosy iareo te ie: "Fa avy ty andro hañomeam-boninahitse ty tirin'olombeloñe. ²⁴ Ambarako anareo, fa naho tsy poke amy ty tane ventem-bareo le mate, le mitoetse amy teñae irerike; fa naho mate zay, le hamoa bey. ²⁵ Ze mitare ty fiaie le ho rereke, fa ie tsy mitare ty fiaie amy kila raha ka, le hitañe aze amy ty fiaiñane mandrakezay. ²⁶ Naho misy manompo Ahy, andono reke hañorike Ahy; naho ze hitobeako, le ao ka ro hitobea ze mpanompoko ka. Naho misy mañorike Ahy, le hañomey volonahitse ty Rae. ²⁷ Henane zao le mangorohoro ty fañahiko ino koa ty ho tsaraeko vao? "Aba, rombaho amy ty lera toy Raho? Mone izao, izay ty foto ty niaviako amo andro zao. ²⁸ Aba, asandrato ty tahinao." Ie niavy eo le nisy feo hirike an-dañitse nanozañe aze te ie: "Fa nasandrako naho toe le mbe hasandrako indraike." ²⁹ Iareo maro nitsangañe eo naharey aze le nivolañe fa nisy hotroke ty teo. Tiilae nivolañe te ie: "Nisy anjely nisaontsy ama e." ³⁰ Le namale ty Jesosy naho nisaontsy te: "Ze feo zay le tsy avy ho Ahiko fa ho anareo. ³¹ Avy henaneo ty fitsarañe ze kila raha: Naho le ho roaheñe ty mpanampake ze hene raha. ³² Naho fa hasandratse hisintake ty tane toy Raho, le hitaoñe anreo kiraike hañorike Ahy." ³³ Nisaontsy izay Reke mba hanoroae te ie karan-kavilasy manao akore ro hahavilasy Aze. ³⁴ I maroy le nanoiñe Aze te ie: "Nirey ay tamy ty lily fa Kristy le hijanoñe mandrakezay. Akore ty ahaia areo mivolañe te ie: "Mahay tsy hasandratse ty tirin' Olombeloñe? Ia o tirin' Olombeloñe eo? ³⁵ Le nitsara Amy iareo ty Jesosy te: "Ty hazavañe le mboe hindre ama areo añate ty andro boribory. Mandenà amy ie mbe manan-kazavañe eo, mba tsy hialohà ty maieñe anareo. Ze handeha amy ty maieñe le tsy nahafantatse ty lalan-kombae. ³⁶ Naho mbe manan-kazavañe nareo, le minoa ze mba ho ana ty mazava. Nisaontsy ze raha izay ty Jesosy ie niavy eo le tsy nitrea naho nietake aze iareo. ³⁷ Ndre ie nanao famantarañe maro miatreke iareo ty Jesosy, le mbe tsy nino iareo mba ³⁸ hilefesa ty toky ty mpitoky Isaia, nañambara te ie: "Rañandria, ia ro nino ty talily ay, navaho ia ro hanoroañe ty fañova i Andriatompo?" ³⁹ Le izay avao ty foto ty tsy ninoa iareo, nanahake ty nambara Isaia te ie: ⁴⁰ "Nigoa e ty maso iareo, naho le nihamafese e ty arofoe; mifamotetse amy zay iareo le te hahatrea amy ty maso e naho le hahazo amy ty fo e, le hitolike, naho Izaho ro hampijangañe iareo." ⁴¹ Nisaontsy ze raha izay ty Isaia fa vazoho e ty volonahy i Jeosy naho le ty momba Aze ro nisaontsie e. ⁴² Fe ie ndra izay, le maro amy iareo mpandily ro nino i Jeosy; fa noho iareo Fariseo le tsy hasosoke izay iareo mba tsy voasakañe amy ty Synagoga ao. ⁴³ Ikokoa iareo ty fiderañe hirike ama ondaty mandako ty fiderañe boake aman' Andrianañahare ⁴⁴ Nikoike mafe ty Jesosy naho le nisaontsy te ie: "Ze raike mino Ahy, le ko ty vatako irerike fa ao ka ie nañirake Ahy, ⁴⁵ ara ze mahatrea Ahy le mahatrea ty nañirake Ahy. ⁴⁶ Niavy manahake ty mazava amy ty tane toy eto Raho, mba tsy hiroñe amy ty maieñe ze mino Ahy. ⁴⁷ Naho misy mitsañe ty saontsiko fe tsy miambeñe aze, le tsy hitsara aze Raho, satria tsy avy hitsara ze kila tane Raho fa hañavotse aze. ⁴⁸ Ze mandietse Ahy naho tsy hitsanoñe tsy saontsiko, le manañe ty hitsara aze. Trasa nataliliko oy ro hitsara aze amy ty andro farae. ⁴⁹ Fa mivolañe ho Ahy o Aho, fa ty Rae nañirake Ahy, ze nañomey ahy ty lily amy ze hambara e naho havolily. ⁵⁰ Fantako fa ty lily e le ty fiaiñane mandrakezay, fa ze ataliko le ambarako manahake ty navolily ty Rae Ahy."