¹ Amy ty andro miaolo ty firavoravoañe Paska. Ony i Jesosy fa tomotse ty andro hiala e amy ty tane toy holia e amy Rae añe. Naho fa nitea ze mpindre-lia tamae antane etoy Reke, le nikokoa e hatra ampara' e. ² Naho andriabolisy le fa nampipoke izao an-tsay i Jodasy Iskariota ana I Simona ao, mba hifotera e Jesosy. ³ À Ie le fa nahafohiñe fa ze kila raha le fa napetra ty Rae ampità eo fa Ie boake amin' Andrianañahare naho le mbe hihereñe amin' Andrianañahare añe. ⁴ Nitsangañe Reke te amy fikamañey ao naho le nanlolie sarimboe ambone ey. ⁵ Ie niavy eo nangalake lamba hafa naho le nisafoe. Nañiliñe rano ampo siny ao amizao Reke le nanomboke nanasa ty tombo iareo mpianae naho le namotse aze tamy lamba nisafoe ey. ⁶ Nimbamy i Simona Petera eo Reke, naho le tihoe ty natao Peters amae te ie: "Rañandria, le Ihe vao ro hanasa ty tomboko? ⁷ Le ty hoe ty navale Jesosy aze te ie: "Ze ataoko vao le mbe tsy ho haio aby ty antoe, fe ie mbe ho fantao avao naho afara añe." ⁸ Izao natao Petera ama e te ie: "Tsy zo fañovao zao ro hanasa ty tomboko." Izao ty navale Jesosy aze: "À naho tsy Izaho ro hanasa ty tombo o, le tsy hanañe anjara Amako ato rehe." ⁹ Le ty hoe ty natao Simona Petera ama e: "Rañandria, a tsy ty tomboko avao areke ro sasañe, ndra ty tañako naho ty lohako aby." ¹⁰ Le tihoe ty natao Jesosy ama e te ie: "Ze fa niandro tsy mbe hipay izay, naho tsy ze manasa ty tomboe avao, fa ie le fa malio vatae; ihe nio madio, fa tsy ie aby nio koahe." ¹¹ (Mone izao fa arofana i Jesosy te ie hisy hifotetse Aze; izay ro nahavy Aze hisaontsy ty hoekey: "Tsy nareo aby ro malio.") ¹² À naho fa niavy nanasa ty tombo iareo t'i Jesosy le nalae'e indraike sarimboe ey naho le niambesatse, le tihoe ty Natao e amy iareo: "Fantaareo vao ty Nataoko anareo? ¹³ Manao "Rañandria" naho "Mpañanatse" Ahiko nareo, naho toe le tò ty nambara areo, fa toe izay vatae Raho. ¹⁴ Fa ie naho Izaho, Rañandria ro Mpañanatse, ro manasa ty tombo areo, le inareo ka tokoe hifanasa tomboke. ¹⁵ Fa nañomey fañoharañe ho anareo Raho le tokoe hitsokombe ze nataoko areo ka nareo. ¹⁶ Ambarako anareo, fa ty mpanompo le tsy bey mandako ty tompoe e; naho ze mpinday hafatse le tsy bey mandako nañirake aze ey. ¹⁷ Naho fanta'areo ze raha zay, le ho tahieñe nareo naho mandefe aze. ¹⁸ Tsy nareo iaby ro tsaraeko; haiko ze ny nifalieko---- fa izay le mba hilefesa ty Soratse Masiñe te ie: "Ze mihinañe ty mofoko le hizonjo ty tomie le hifotse Ahiko." ¹⁹ Ambarako nareo amy hinaneo zao miaolo ty hisia e, le mete hino nareo fa Izaho ro Ie. ²⁰ Le ataliliko, fa ze mandrae ty niraheko, le mandrae Ahy, ara ze mandrae Ahy, le mandrae ty nañirake Ahy. ²¹ Naho fa nisaontsy izay ty Jesosy, le nihitikitike ty fañahie. Nitalily Reke naho le nisaontsy te ie: "Ambarako anreo nio, fa tsy raike amareo le hifotse Ahiko." ²² Nifañete iareo mpianatse, nañonatane teña te ie ia koahe saontsie eo. ²³ Nisy raike tamy mpiana eo, ny tea i Jesosy, nipetrake amy tabatse añila i Jesosy eo. ²⁴ Niharinea Simona Petera reke naho le nirehafae te ie: "Añontaneo Aze te ie ia o saontsie eo." ²⁵ Nihereñe niato amy Jesosy reke naho le nirehake amae te ie: "Ia izao, Rañandria?" ²⁶ Ie niavy eo le tihoe navale Jesosy aze te ie: "Ze raike hampijone navaho ho meiko aze ty mofo toy ro ie." À naho fa nalò e mofoy, le i Jodasy ana i Simona Iskariota ro nitolorae aze. ²⁷ Naho fa tafara mofoy, le nimoaha andriabolisy amizao ty, le tihoe ty natao Jesosy ama e te ie: "Anò tsiela ,ze raha hatao'o." ²⁸ Tamizay le ndra iareo an-databatse eo tsy nisy naharendreke ty foto ty nisaotsia Jesosy izay. ²⁹ Ty ilae nivetsevetse te ie, Jodasy nanjitse fisiam-bolay, ro nisaontsia i Jesosy amae te ie: "Vilio ze hene raha paiantika amy ty firavoravoañe," ndra ie tokoe hanolo-draha hoe ze tsy manañe reke. ³⁰ À naho fa niavy nadrae mofo oy ty Jodasy, le nandeha niakatse. Haleñe iandroy tamy io. ³¹ Naho fa niakatse ty Jodasy, le tihoe ty natao Jesosy: "Amy ie henaneo le ho meam-bolonahitse ty tirin'Olombeloñe, naho le ho meam-bolonahitse Amao ka ty Andrianañahare. ³² Hañomey volonahitse Aze am-batae ty Andrianañahare, Ie ka le hañomey volonahitse Aze lahatañe. ³³ Nareo ajaja, fa tomotse andro hiharoako amareo. Ho paia areo Raho, manahake ty nambarako tamy Jiosy io te ie: "Ze ho mbàko, tsy ho azo areo andenà." Naho le mbe ahereko amareo ty anito. ³⁴ Lily vaovao ro meiko anareo, le ty hifankateva areo; manahake ty ny hateako anareo, ro hifampikokoa areo ka. ³⁵ Amizay ro hahafantara ty maro fa mpianako nareo, naho minkatea nareo." ³⁶ Izao ty natao Simona Petera ama e: "Rañandria, hañavelo mbaia Iheo?" Izao ty navale Jesosy: "Ze ombako, tsy hañoriha areo Ahy henaneo, fa mbe horihe areo naho fa afara añe." ³⁷ Le tihoe ty natao Petera ama e te: "Rañandria, nañinoñe o aho ie le tsy hañorike Azo? Foeko ho Azo ty vatako". ³⁸ Le vinale Jesosy te ie: "Foeo ho Ahiko ty teñao? ambarako azo nio, fa mbe tsy mikekeo avao ty akoho te anito te fa in-telo hanao jebe rehe."