¹ Ko masiake amy ty ranagahe. Fe ie ka, anaro manahake ty rao reke. Anaro manahake ty roahalahe o ajalahy tanora'o. ² Anaro manahake ty rene o rakemba'o, le o anjampela'o tanora manahake ty anabave ao amy ty fahaliovagne iaby. ³ Magnajá o mpitanday vatagneo, o ze tena mpinday vatagne. ⁴ Fe ie naho man'agnanake na zafe kedekede ty mpinday vatagne raike, le enga'areo reke aloha hianatse haneho fagnajagne amy ty tokantragno'e ao. Ao iareo hamale babeagne o rae aman-drene reo, satria ankasitrahan'Andrianagnahare zay. ⁵ Fa ty tena mpinday vatagne le napoke ho raike. Mametrake ty fitokia'e aman'Andrianagnahare reke. Miorigne avao ama'ze fanagatahagne reo naho vavake andro aman'alegne. ⁶ Ndre izay aza, ty ampela ze miaigne hoe ty fahafinaretagne le mate, ndre le mbe velogne aza reke. ⁷ Torio ze raha zay mba tsy anagna iareo tsiny. ⁸ Fe ie naho misy ndaty tsy magnome hoe o longoe marine eo, indrindra hoe ze ao amy ty longoe, le nandá ty finoagne reke le raty lavitse no ty tsy mpino. ⁹ Ao hosoratagne ho mpinday vatagne ty ampela ze tsy latsake ty enempolo taogne, ampela raike valy ty lahilahy raike. ¹⁰ Toko'e ho hay noho o asa soa reo reke, na nikarakara avao ka o ajaja reo, na ka nampandroso o mpivahiny reo, na nanasa ty tombo o mpino reo, na nagnamaivagne ty miharovetse, na nanolon-tegna tamy ty kila asa soa iaby. ¹¹ Fe ie hoe o mpinday vatagne mbe tanora ka, le ko magneke ty hanoratse iareo agnate lista ao. Fe ie naho fa mibaboke amy ty fila ty nofotse hanohitse i Kristy iareo, le te-hanambaly. ¹² Amy izay iareo le hahazo fagnasazeagne satria namadike ty fanorolran-tegnae voalohae. ¹³ Ka le lasa zatse malaigne koa iareo. Mandehandeha mitety tragno. Tsy hoe lasa mpitsiko naho mpipay aly avao ka. Mirehake raha ze tsy tokoe ho rehafe iareo. ¹⁴ Naho izay le teako hanambaly o amplea mbe tanora'o, hiterake, hikarakara tokantragno, mba tsy ahafahe magnome hirike ty fahavalo'e hitory anay ho nanao raty. ¹⁵ Fa tila'e fa nivegne sahady hagnorike i Kokolampo. ¹⁶ Naho misy ampela mino managne mpinday vatagne, ao reke hagnampe iareo, mba tsy hagnavesatse ty anjomban'Agnahare, mba hahafa'e magnampe ze tena mpinday vatagne maregne. ¹⁷ Ao ze ndaty ze manapake soa mba ho raisigne ho mendri-bolonahitse mandilatse ty roe, indrindra ze miasa mindre amy ty rehake naho amy ty fampianaragne. ¹⁸ Fe ie hoe ty Soratse Masigne te hoe: "Tsy toko'e hagnisy fehe'e ty vava ty agnombe rehe naho mbe misy voa'e reke." na ka" Ty mpiasa le magneva ty karama'e." ¹⁹ Ko mandray fitoriagne manohetse ty lohologne raike naho tsy misy vavolombelogne roe na telo. ²⁰ Ahitsio eo agnatreha ty kila'o ndaty ze behakeo reo iaby mba hatahotse ty ambe'e ty hafa. ²¹ Mandily azo mafe raho agnatrehan'Andrianagnahare eo naho eo agnatreha'i Kristy Jesosy le o Anjely voafily reo, mba hitazoma'o o lily reo tsy misy fitsaratsaragne naho mba tsy hanaova'o na inogne na inogne amy ty fandieragne. ²² Ko memeke mametra-tagnagne amin'ia na amin'ia. Ko mindre amy ty fahota ty ndaty hafa'o. Tokoe hitazogne ty vatao halio rehe. ²³ Tokoe tsy hinogne rano sasa rehe. Fe ie ka, tokoe handrae divay kedekede rehe hoe ty vavonio naho o arete'o mateteke-miseho. ²⁴ Ty fahota o ndaty ilae le fantatse mibaribary, le iareo le mandeha aloha iareo ao amy ty fitsaragne. Fa ty ota tilae magnarake boake afara toy. ²⁵ Manahake izay avao ka, misy asa soa hay mibaribary, fe ie o ilae'o aza le tsy azo aetake.