¹ Ao ze amabany ty zioga ao manahake o andevo mba hanao ty tompoe hagneva ty haja iaby. Iareo le tokoe hanao zay mba tsy hirehafagne raty ty tahinan'Andrianagnahare naho ty fampianaragne. ² O andevo ze managne tompo mino le tsy tokoe hanao tsinotsinogne iareo satria mpirahalahe amae. Fe ie ka, iareo le tokoe hanompo hatragne hatragne. Fa o tompo ze nampianatse tamy ty asa iareo le mpino sady teagne. Ampianaro le amabarao o raha reo. ³ Hevero fa ty ndaty le mampianatse amy ty fomba hafa le tsy magneke ty fanoroantika ara-pinoagne, zay, saontsy i Jesosy Kristy Tompontika. Hevero fa iareo le tsy magneke ty fampianara ze minday amy ty toeragne arake an'Andrianagnahare agne. ⁴ Ze ndaty zay le mirehareha le tsy mahalala na inogne nainogne. Fe ie ka, reke le adala o alihevetseo naho o fandresen-dahatse mahakasike o rehakeo. O rehake reo le miterake fialognagne, fagnevetavetagne, ahiahy araty, ⁵ le ty fifandonagne eo amy o ndaty maloto fisaignagne. Misintake amy ty maregne iareo. Mihevetse reke fa ty toetra arake an'Andrianagnahare ro fomba hiaviagne ho mpanan-karena. [Fagnamarignagne: Ty fandikagne taloha tilae le magnampe te hoe: "Misintaha amy ty raha manahake izay." Fa ty fandikagne taloha soa vatae le tsy magnampy zay.] ⁶ Le ty toetra arake an'Andrianagnahare mindre amy ty fahafaham-po le tomboe bey. ⁷ Satria tika le tsy ninday na inogne na inogne am'izao tontolo zao. Tsy hahavita hinday na inogne na inogne tika. ⁸ Fe ie ka, ao tika ho afa-po amy ty hanegne naho ty fihaminagne. ⁹ Hoe iareo ze te ho lasa mpanan-karena le latsake agnate ty fakam-pagnahy ao, ao aganate ty fandrike. Tafilitse tagnate ty hadalagne naho o filágne mampidi-doza tsiefa iareo, naho ka o ilae mandeteke o ndaty io amy ty faharavagne o naho ty fandriganagne'o. ¹⁰ Satria foto o karazan-dratio iaby io ty fitiavam-bola. Ty ndaty ilae ze magniry zay le fa voavily nisintake tamy ty finoagne le nitomboke ty vata iareo tamy ty fahoriagne bey ¹¹ Fe ie rehe, ry lahilahin'Andrianagnahare, milaisa o raha reo. Miezaha mipay ty fahamarignagne, ty toetra arake an'Andrianagnahare, ty fahatokisagne, ty fitiavagne, ty faharetagne naho ty hasoam-pagnahy. ¹² Mialia ty aly soa ty finoagne. Tazomo ty fiaignagne mandrakizay fa ho am'izay ro hitokava'e azo. Izay le mahakasike ty nitsanganao tagnatreha o vavolombelogne tsiefa'o tamy ze soa. ¹³ Iraho le magnome azo ze lily zay eto anoloan'Andrianagnahare, izay nahavy ty raha iaby ho velogne, le agnatreha i Kristy Jesosy eo, i nirehake ty marigne tagnatreha i Pontio Pilato teo: ¹⁴ Ahajao soa ty lily, tsy manan-tsiny, mandra-boaha ty Tompontika Jesosy Kristy. ¹⁵ Andrianagnahare le manoro ty fiboahae amy ty fotoagne tokoe ho ie_Andrianagnahare, i raike ze nitahiegne, i hery tokagne, i Mpanjaka ze manjaka, nao i Tompo ze manapake. ¹⁶ Reke raike avao ro managne ty tsy fahafatesagne le mitoboke amy ty hazavagne eo tsy azo hatognegne. Tsy misy olombelogne mahatrea aze na afake magnete Aze. Ho aze ty volonahitse naho ty hery mandrakizay. Amena. ¹⁷ Rehafo ty mpanan-karena amin'izao tontolo zao mba tsy hirehareha, le magnategna ty harena, ze tsy azo antoke. Fe ie ka, tokoe hagnantegna an'Andrianahare iareo. Magnomey atika ty hareagne maregne iaby Reke mba hahafalifaly antika. ¹⁸ Rehafo iareo mba hanao ty soa, mba hanan-kareagne amy ty asa soa, mba halala-tagnagne, le vognogne hizara. ¹⁹ Amy ze fomba zay, le hahaja iareo ty fehe soa hoe ty vatae amy ze ho avy, ka hitazomae ty tena fiaignagne. ²⁰ Ry Timoty, arovo ze natolotse azo. Sintaho ty rehake gege naho ty fandresen-dahatse mifanohetse mahakasike ty fitokavagne diso ty amy ze atao toe fahalalagne. ²¹ Ty ndaty ilae le mitalily ze raha zay ka le tsy nahatsiaro ty finoae iareo. Ho amareo anie ty fahasoavagne