¹ Izahay le naharey talily fa misy halakofilagne ty ama'areo eo, karazam-pagnahy tsy eva'e naho tsy azo atao akore am'iareo jentilisa. Ty talily le ty hoeke misy raike ama'areo mandre ami'ty valin-drae'e. ² Inareo le tena miavognavogne! Fa tsy tokoe hiferenaigne vao nareo? Ty raike ze nanao izay le tsy maintsy alaegne ama'areo eto. ³ Fa ndra te ie tsy eo ara-batagne aza raho fe ie mbe eo ara-pagnahy, naho fa nitsara ze raike naho nanao izay sahady, le hoe raha teo raho. ⁴ Naho fa miarake mivory ami'ty agnara'i jesosy Tompontika nareo, naho ty fagnahiko le ho eo ka ami'ty heri'i Jesosy Tompontika, le fa nitsara io ndaty io sahady raho. ⁵ Nataoko zay mba hanoloragne zay lahilahy zay ho ai'i Satana ho famotehagne ty nofotse, mba ho voavonjy ami'ty andro'i Tompo. ⁶ Tsy soa ty firehareha'areo! Tsy fanta'areo vao fa ty lalivae kedekede le magnova ty mofo manontolo? ⁷ Liovo ty tegna'areo ami'ty lalivae taloha mba hanjare mofo vaovao nareo, le naho hanjare mofo tsy misy lalivae. Fa i Kristy, ty Zanak'ondrintika tami Paska, le natao sorogne. ⁸ Naho zay reke le ndao tika hankalaza ty firavoravoagne, tsy ami'ty lalivae taloha, iraike lalivae'ty fagnahy raty naho haratiagne. Fa ie, ndao tika hankalaza ami'ty mofo tsy misy lalivae ty liofo naho fahamarinagne. ⁹ Izaho le nanoratse ho anareo t'ami'ty taratasiko mda tsy hiaraha'areo miasa ama'o ndaty lakofilagne'o. ¹⁰ Fe ie ty teako hambara le tsy ty ndaty lakofilagne iaby ami'ty tane toy, ndra iareo tsy maha'onigne ty vatae, ndra iareo mpisandoke, ndra iareo mpanompo sampy, satria mba hisintahagne am'iareo le mila misintake ami'ty tane toy nareo. ¹¹ Fe ie hanane zao raho manoratse ho anareo mba tsy hitraok'asa ndra ami'ia ndra ami'ia naho fa atao fa rahalahy fe ie ndra miaigne agante'ty halakofilagne, ndra ty tsy maha'onigne ty vatae, ndra manompo sampy, ndra mperehake raty, ndra mpimamo, ndra mpisandoke. Ndra ko mindre mihinagne am'o zao ndaty zao. ¹² Fa akore ty ilirako ami'ty fitsaragne iareo ze tsy agnate ty fiangonagne? Mifanohits'amizay, nareo vao tsy tokoe hitsara iareo ze agnate fiangonagn'ao? ¹³ Fe ie Andrianagnahare le mitsara ireo ze tsy agnate'ao. "Afaho ama'areo eo ze ndaty raty."