¹ Hoe izao ro tokoe handraesa'ty ndaty antika, manahake ty mpanompo'i Kristy naho mpiambegne ze fahagagan'Andrianagnahare. ² Am'izay fifandraesagne zay, le lily takeagne am'o mpiabegn'eo ty maha-evae-patokisagne iareo. ³ Fa naho ty amako le kedekede ty tokoe hitsaragne anareo na hitsaran'olombelogne iabike ahy. Fa ndra izaho aza tsy mitsara ty vatako. ⁴ Naho iraho le tsy mahafantatse ze tsikotsiko natao tamako, fa ndra izay tsy midika te ie tsy manan-kakeo raho. Ty Tompo ro mitsara ahike. ⁵ Naho izay reke, ko manognogne fitsaragne ty mahakasike ze raha iaby mialoha'ty fotoagne, mialoha ty hiavia'i Tompo. Ireke le handae ze raha aeta'ty ieke ho ami'ty fahazavagne naho hampiboake ty vetsevetsem-po. Boak'eo ty tsikiraike le handrae ty fikokoae boak'aman'Nagnahare. ⁶ Hanane zao, ry rahalahe, nampihatra o lili'io tamako naho tama'i Apolosy raho noho'ty ama'areo, mba hahafaha'areo mianatse avy ama'ay ty dika'ty saontsy hoeke: "Ko madeha mihoatse ty fa voasoratse." Izay le mba tsy hisy raike ama'areo hiroharoha ty ami'ty fankasitrahagne ty raike noho ty ami'ty hafa. ⁷ Fa ia ty mahita ty tsy fitoviagne ama'areo naho ty hafa? Inogne ro anagna'areo naho tsy niazo'areo maimaimpoagne? Naho niazo'areo maemaempoagne zay, nagninogne nareo vaho miroharoha le hoe tsy nanao ho'izay? ⁸ Fa anagna'areo iaby ze raha paiàve'areo! Fa nanjare mpagnarivo nareo! Le fa nanomboke nanjaka nareo__le tsy boak'ama'ay zay! Raho ka le magniry vatae ty nanjakà'areo, mba hahafaha'ay majaka miarak'ama'areo. ⁹ Fe ie raho mandineke te ie Andrianagnahare le nametrake antikagne ho apostoly miharehare manahake ty farae ami'ty laharagne naho manahake ty ndaty voalily ho mate. Lasa ho fampiboahan-draha ho'ey zao tontolo zao zahay__ho ey'ty anjely, naho ty ho'ey ty olombelogne. ¹⁰ Izahay le gege noho ty ama'i Kristy, fa inareo le mahilala ama'i Kristy ao. Maleme zahay, fa inareo mahery. Inareo le nomeam-boninahitse, fe ie zahay ka tsy nalaem-baraka. ¹¹ Hatra'amizao zahay le mbe kere naho marandrano, misotry fisikignbe, voajera mafe, naho tsy manan-kialofagne. ¹² Miasa mafe zahay, miasa ami'ty tagna'ay avao. Naho fa latsaegne zahay, le miaretse. Naho fa enjehegne zahay, le mitson-drano. ¹³ Naho fa voasara raha raty zahay, le mirehake ami'ty hasoam-pagnahy. Zahay le niova, naho mbe natao ho, fako' ty tane toy naho foka ze kilaraha. ¹⁴ Zaho le nanoratse ze raha reo mba hahamegnats'anareo, fa manoro anareo hoe ty anako ikokoako raho. ¹⁵ Fa ndra te ie managne mpimbegne raialegne ama'i Kristy ao aza nareo, le tsy managne roae tsiefa. Fa izaho le lasa roae'areo ama'i Kristy Jesosy ao tami'ty talilisoa. ¹⁶ Naho zay le mampirisik'anareo raho mba ho mpitsikomby ahy nareo. ¹⁷ Zay ro nandefasako anareo i Timoty, anake ikokoako sady atokisagne am'i Tompo ao. Reke ro hampatsiahy anareo ze lalako am'i Kristy ao, hoe ty ampianareko iareo ndra aia ndra aia naho agnate ty fiangonagne iaby. ¹⁸ Hanane zao le najare miavogne ty ilae ama'areo, le manao tsy ho avy ama'areo agne raho. ¹⁹ Fa marine hoavy ama'areo raho, naho sitrak'Andrianagnahare. Naho tsy hahafantatse ty reha'iareo tena miavogne avao raho, fa hahita ty heri'iareo. ²⁰ Satria ty fanjakan'Nagnahare le tsy mifototse ami'ty rehake fa ami'ty hery. ²¹ Inogne ty mpaiave'areo? Tokoe ho avy ama'areo agne miarak'ami'ty tséra'katae vao raho sa miarak'ami'ty fiteavagne feno falemeam-pagnahy?