¹ Le iraho, ry rahalahy, tsy afake nirehake tama'areo manahake ty ndaty ara-pagnahy, fe ie manahake ty ndaty ara-nofo, manahake ty ajaja am'i Kristy ao. ² Finahako ronono nareo, fa tsy venten-kanegne, satria tsy vognogne tam'izay nareo; ndra ie henane zao aza le mbe tsy vognogne am'izay nareo. ³ Satria mbe ami'ty ty nofotse nareo. Fa ndra aia ndra aia misy fahasarotam-piaro naho fifandieragne ty ama'areo eo, le tsy miaigne ara'ty nofotse vao nareo, naho tsy mandeha ami'ty lili'n'olombelogne? ⁴ Fa naho fa misy raike mirehake hoeke: ''Izaho magnarake i Paoly,'' le ty raike mirehake te hoeke: ''Iraho magnarake i Apolosy,'' le tsy miaigne manahake ty olombelogne avao ka vao nareo? Ia areke ty Apolosy? ⁵ Ia ty Paoly? Mpanompo naho tami'ty alalae ro ninoa'areo, naho nomei'i Andriatompo asa iaby. ⁶ Izaho ro nambole, Apolosy ro nanondrake, fa Andrianagnahare ro nampitombo. ⁷ Le noho izay, na ireke mambole na ireke manondrake le tsy misy dikae. Fa Andriagnanahare ro mampitobo. ⁸ Le ireke ze mambole naho ireke ze manondrake le raike, naho ty kiraike le sambe hahazo ty karamae iaby arakara ty asae. ⁹ Fa izahay le mpiara-miasa aman'Andrianagnahare. Nareo ty sahan'Andrianagnahare, naho anjomban'Nagnahare. ¹⁰ Noho ty fahasoavan'Andrianagnahare naho nameagne ahike manahake ty mpanao tragno mahay, le nametrake ty fototse raho naho hafa ty magnoregne ambone'e eo. ¹¹ Fe ie ze lahilahy tsikiraike tokoe hitandrigne ty ami'ty fomba hagnoregnae ami'izay eo. Fa tsy misy ndaty mametrake fototse naho tsy ty raike fa naoregne, dika'izay, Jesosy kristy. ¹² Hananeke zao naho misy ndaty magnoregne ambone fotots'eo ami'ty volamena, volafoty, vatosoa, hatae, ahitse, na mololo, ¹³ le haboake ty asae, fa ty andro mazava ro hampiboake izay. Satria haboake ami'ty afo z'izay. Ty afo ro hitsapagne ty hasoa'ty natao'ty tsikiraike. ¹⁴ Naho mimaregne ty asa'o ndaty io, le hahazo valesoa reke; ¹⁵ fa naho mae ty asa'o ndaty io, le ho fatiantoke reke, fa ty vatae le ho vonjeagne, manahake ty niboake t'agn'afo ao avao ka. ¹⁶ Tsy fanta'areo vao fa inareo le tempolin'Andrianagnahare naho ty Fagnahin'Andrianagnahare ro mimaregne ama'areo ao? ¹⁷ Naho misy ndaty manimba ty tempolin'Andrianagnahare, le hanimba zey ndaty zay ty Andrianagnahare. Fa masigne ty tempolin'Andrianagnahare, le hoe'izay ka nareo. ¹⁸ Ko engagne ty ndaty hamitake ty vatae. Naho misy ndaty ama'areo eo mihevetse fa mahilala am'izao vanim-potoagne zao, engao reke hanjare ''gege" am'izay reke mete hanjare mahilala. ¹⁹ Fa ty hilala'izao tontolo izao le hagegeagne aman'Nagnahare. Satria voasoratse te ie: "Nahatratse ty mahilala tami'ty poloti'iareo Reke." ²⁰ Naho ty hoe ka: "Ty Tompo le mahafantatse fa ty eretsere ty mahilala le zava-poagne." ²¹ Naho izay reke le tsy misy sasa ty firoharohagne ami'ty ndaty! Fa ty raha-iaby le anareo, ²² ndra i Paoly, ndra i Apolosy, ndra i Kefasy, ndra ty kilaraha iaby, ndra fiaignagne, ndra ty havilasy, ndra raha hananeke, ndra ty raha hoavy. Ze kila-raha iaby le anareo, ²³ le inareo le ey'i Kristy, le i Kristy an'Andrianagnahare.