¹ Naho fa ni-mbama'areo mbeo raho, ry rahalahe, le tsy niavy nindre ami'ty lahatse na fahendreagne naho nagnombara ty misitery momba an'Andrianagnahare. [Fagnamarihagne: Ty dika-teny maro hafa le vakiegne te hoeke: ''Naho nagnombara ty fijoroagne vavolombelogne momban'Andrianagnahare raho.''] ² Fa nanampakevetse tsy hahafantatse na inogne na inogne raho naho fa t'ama'areo eo, naho tsy Jesosy Kristy, naho Reke voatraboke. ³ Naho nindre tama'areo raho t'ami'ty falemeagne, le tami'ty tahotse, naho tami'ty fihoritan-kolitse. ⁴ Le ty hafako naho ty fagnombarako le tsy tami'ty fahaiagne mirehake naho hilala. Fe ie, tami'ty fanoroa'ty Fagnahe naho hery, ⁵ mba tsy ho ami'ty fimarena ty olombelogne ty finoa'areo, fa ami'ty herin'Andrianagnahare. ⁶ Hananeke zao le mirehake fahendreagne am'iareo mahilala tikagne, fa tsy ty hilala'izao tontolo izao, na ty ey'iareo mpagnefets'andro, naho mandalo avao. ⁷ Fe ie, magnombara ty fahendrean'Andrianagnahare ami'ty fahamarinagne mietake tinkagne, ty fahendreagne mietake jinibon'Andrianagnahare mialoha taloha'o andro iabikeo ho voninahintika. ⁸ Tsy nisy tam'iareo mpagnefetse o andro zao ro nahafantatse o fahendreagne'o, fa naho nahatakatse izay iareo tam'izay fotoagne zay, le tsy ho trinobo'iareo ty Tompo'ty voninahitse. ⁹ Fa manahake ty voasoratse te hoeke: ''Ze raha tsy nisy maso nahatrea, tsy nisy sofigne naharey, tsy nisy eretseretse nahazo an-tsaigne, ze raha naho nomanen'Andrianagnahare ho ey'iareo ze tea Aze.'' ¹⁰ Io ro raha natoron'Andrianagnahare tama'ay tami'ty alala'ty Fagnahy. Fa ty Fagnahy ro mimpay ty raha iaby, ndra ty raha laleken'Andrianagnahare aza. ¹¹ Fa ia ty mahafantatse ty fisia'ty ndaty raike naho tsy ty fagnahy ty ndaty ama'ao? Naho izay ka, tsy misy mahafantatse ty raha laleken'Andrianagnahare naho tsy ty Fagnahen'Andrianagnahare. ¹² Fa tsy nandrae ty fagnahe'izao tontolo zao tinkane, fa ty Fagnahy boak'aman'Andrianagnahare ao, mba hahafahantika mahafantatse ty raha omeagne antika maimaimpoagne boak'aman'Nagnahare. ¹³ Mirehake momba o raha'o ami'ty saontsy tsy hai'ty fahendrea'ty olombelogne ampianaregne zahay, fa ze ampianare'ty Fagnahy anay. Ty Fagnahy ro mandika ty saontsy ara-pagnahy miarak'ami'ty fahendreagne ara-pagnahy. ¹⁴ Ty ndaty tsy ara-pagnahy le tsy mandrae ze raha ey'ty Fagnahin'Andrianagnahare, satria hagegeagne amae reo. Tsy afake mahafantatse ireo reke satria famantaragne ara-pagnahe reo. ¹⁵ Ze ara-pagnahy le mitsara ty raha iaby, fa tsy iapara'ty fitsara'ty ndaty hafa reke. ¹⁶ ''Fa ia ty afake mahafantatse ty fisia'ty Tompo, naho ho afake hampianatse Aze?'' Fa managne ty fandineha'i Kristy zahay.