¹ Naho fa misy raike ama'areo managn'aly ami'ty raike, mahavany hifampitarike am-pitsaragne ama'o mpitsara'o eo tsy mpino vao reke, satria tsy aloha'iareo mpino eo? ² Sa tsy fanta'areo vao fa ty mpino ro hitsara ty tane toy? Naho izay reke, inareo ro hitsara ty tane toy, sa tsy mahavita mandamin-draha malinike vao nareo? ³ Sa tsy fanta'areo vao fa hitsara ty anjely tika? Manao akore, naho izay, ty fihoara'ty fahafahantika mitsara ze raharaha ami'ty fiaignagne toy? ⁴ Naho afake mitsara ty raha misy ami'ty andavanandrom-piaignagne areke rehe, nagninogne rehe ro magnisy karaza-ndraha manahak'izay agnila'ireo tsinontsinogne ami'ty fiangongn'ao? ⁵ Hahamegnats'anareo ro nirehafako izay. Ie vao tsy mba misy ampe hilala ndra ie raike aza ama'areo handamigne ty disadisa ami'ty mpirahalahy? ⁶ Fe ie, misy mpino raike mandeha mifanjo ami'ty mpino raike hafa ami'ty fitsaragn'eo, naho zay raha zay le hatolotse aloha'ty mpitsara eo ze tsy mpino! ⁷ Ty fisia'ty aly ama'areo Kristiana iaby le fa fahareseagne ho anareo sahady. Fe ie tsy aleo vao mijaly ami'ty fahadisoagne? Fe ie tsy aleo vao engagne ho voafitake ty tegne'areo? ⁸ Fe ie nareo le mandiso naho mamitake ty hafa, naho rahalahe'areo avao ka iarey'reo! ⁹ Tsy fanta'areo vao fa ty tsy marigne le tsy handova ty Fanjakan'Andrianagnahare? Ko magneke ty vande. Iareo vetaveta, iareo mpanompo sampy, iareo lakofilagne, iareo lahilahy mpivaro-tegna, ¹⁰ iareo mpangalatse, iareo tsy mahay mitoboke, iareo mpimamo, iareo mpagnaraty, iareo mpanao an-kere'e__tsy misy ndra raike am'iareo handova ty fanjakan'Andrianagnahare. ¹¹ Manahak'izay ty ilae ama'areo. Fe ie fa voalio nareo, nihamasinegne nareo, naho voamarigne tama'Nagnahare eo nareo tami'ty agnara'i Tompo Jesosy Kristy naho tami'ty Fagnahin'Andrianagnaharentika. ¹² "Ty raha iaby le ara-dalàgne amako," fe ie tsy ze raha iaby le mahasoa. "Ty raha iaby le ara-dalàgne amako," fe ie tsy ho andevoze'ty raike ami'io raho. ¹³ "Ty hanegne le ho ei'ty troke, le ty troke natao ho ey'ty hanegne," fa Andrianagnahare le hamafa iarey roe reo. Ty vatagne tsy natao ho ei'ty halakofilagne. Fe ie, ty vatagne le natao ho ei'i Tompo, naho ty Tompo ro hagnomey ho ei'ty vatagne. ¹⁴ Andrianagnahare le fa nanangagne i Tompo sady hanangagne antikagne ami'ty heri'e ka. ¹⁵ Tsy fanta'areo vao fa ty tegna'areo le rantsam-bata'i Kristy? Le handeseko vao zany ty rantsam-bata'i Kristy naho hampitraoke iareo ami'ty mpivaro-tegna? Lonike tsy hisy zay! ¹⁶ Tsy fanta'areo vao fa ze mindre ami'ty mpivaro-tegna le manjare nofotse raike amae? Manahake ty voasaontsy ty Soratse Masegne hoeke: "Ho nofotse raik'avao iarey roe." ¹⁷ Fa ireke naho mitraok'ami'i Tompo le manjare raike Amae. ¹⁸ Isintaho ty halakofilagne! Ty hakeo hafa iabike naho atao'ty ndaty le fa tsy aman-tegna, fa ty ndaty lakofilagne le magnosotse hakeo ami'ty vatae avao. ¹⁹ Tsy fanta'areo vao fa ty vata'areo le tempoli'ty Fagnahy Masigne, naho mitoetse agnate'areo ao, naho azo'areo boak'aman'Andrianagnahare? Tsy fanta'areo vao fa tsy anareo ty vata'areo? ²⁰ Fa ndaty voavily nareo. Naho zay reke le mankalazà an'Andrianagnahare ami'ty tegna'areo.[fagnamarihagne: ze dika-teny taloha ilae le mivaky manao ty hoeke: "Naho zay reke mankalazà an'Andrianagnahare ami'ty tegna'areo naho ami'ty fagnahi'areo, fa an'Nagnahare io." Fa ty dika-teny tena soa le tsy mivake hoe'io.]