¹ Lafa niavy maraindray, nitetiky hanohitry agn'i Jesosy mba hamono Azy reo lehibe gny mpisoro sy gny loholo iaby. ² I reo namatotry Azy, nitariky Azy tamonto agny, sady nanolotry Azy tamin'i Pilato governora. ³ Sady Jodasy, gnazy namadiky Azy, lafa nahita fa voaheloky Jesosy, nibebaky I sady nanampoly agny volafoty telopolo tamy reo lehibe gny mpisoro sy reo loholo, ⁴ sadynivola hoe: "Gnanota aho tamy gny namadihako lio tsy manan-tsiny." Fa reo nivola hoe: "Ahoanay ino? Nanao zay." ⁵ Ka natorakiny tao an-tempoly volafoty reo sady nandeha, bakeo nananto gny vatany I. ⁶ Reo mpisoro bevata nangala volafoty reo sady nivola hoe: "Tsy araky gny lily gny mametraky ity ao amy gny fanajariam-bola, satria ity vilin-dio." ⁷ Niaraky niresaky gny olana reo sady nivily gny saha gny mpanao vilany tanimanga zay handevena reo vahiny tamy reo vola. ⁸ Sady zay no antony nikeha azy saha zany hoe: "Saha gny lio" mandraky androany. ⁹ Sady tanteraky gny safa nivolany tamy gny mpaminany Jeremia, manao hoe: "Nangala gny volafoty telopolo reo, viliny nanombana reo vahoky Israely Azy, ¹⁰ sady i reo nanome zay ho agny gny saha gny mpanao valany tanimanga, araky gny natoro gny Tompo ahy." ¹¹ Sady Jesosy nintsanga taloha gny governora, bakeo governora nanontany Azy hoe,"Anao va ro mpanjaka ndreo Jiosy?" Jesosy namaly azy hoe: "Voalazanao." ¹² Fa lafa nasara ndreo mpisoro lehibe gny sy reo loholo I,ka tsy namaly na ino na ino. ¹³ Ka nivola taminy Pilato hoe: "Tsy renao va gny fiampanga iaby atao aminao?" ¹⁴ Fa tsy namaly na safa raiky aza I, tseriky mare agny raha zay ny governora. ¹⁵ Sady isaky gny fisinisinia fomba gny governora gny mamototry gadra raiky voafily gny vahoaky. ¹⁶ Tamin'io fotoa io gnana gadra malaza raty nikehy hoe Barabasy reo. ¹⁷ Noho zay lafa gniaraky nivory reo,hoy Pilato tamy ndreo hoe: "Ia ro tianareo halefako ho anareo? Barabasy, sa Jesosy zay kehy hoe Kristy?" ¹⁸ Hainy fa noho gny fialona ro gnanolora ndreo agn'i Jesosy taminy. ¹⁹ Laha nipetraky teo amy gny seza fitsara I, ka nandefa safa amy gny valiny voho nanao hoe: "Tsy mana na ino na ino atao amy gny lehilahy tsy manan-tsiny tya aho. Fa mijaly loatry ao androany noho gny nofy azoko momba Azy." ²⁰ Sady reo mpisoro lehibe sy reo loholo nandresy lahatry gny vahoaky mba hangataky agn'i Barabasy, sady hampamono agn'i Jesosy. ²¹ Gnanontany azy reo gny Governora hoe: "Ia amy ndreo roa ro tianareo halefako ho anareo?" Hoy reo hoe: "Barabasy." ²² Pilato nivola tamy ndreo hoe: "Ino ro tokony ataoko amin'i Jesosy zay kehinareo hoe Kristy?" Reo iaby namaly hoe: "Fantsiho amy gny hazofijalia I." ²³ Ka hoy I hoe: "Manino, ino ro heloky nataony?" Fa voho maiky reo nitoreo mare hoe: "Fantsiho amy gny hazofijalia I." ²⁴ Ka lafa hitan'i Pilato fa tsy afaky hanao na ino na ino I, kanefa fa nanomboky gny tabataba, nangala rano I, nanasa gny tanany taloha gny fokonolo teo, sady nanao hoe: "Tsy manan-tsiny amy lio inty johary tsy manan-tsiny inty aho. Fa asakasakinareo zay." ²⁵ Reo olo iaby nivola hoe: "Ho aminay sy gny gnanakinay gny liony." ²⁶ Ka nalefany ho an-dreo Barabasy, fa namango pilatsy agn'i Jesosy I voho nanome Azy ho fantsihy. ²⁷ Bakeo reo miaramila gny governora nangala agn'i Jesosy ho ao an-dapa sady namory reo vondro gny miaramila iaby. ²⁸ Nangala gny sikiny reo sady nampanao ankajo jaky Azy. ²⁹ Gnanambotry sabaka mboninahitry fatiky reo sady mametraky izay tan-dohany, sady nametraky tehy tamy gny tanany ankavana. Gnandohaliky tanatrehany reo sady nisotraky Azy, nanao hoe: "Arahaba, ry mpanjaka gny Jiosy!" ³⁰ Norofan-dreo I, sady nalain-dreo tehy ka navango Azy im-peno tamy gny lohany. Lafa bakeo nanevoky Azy reo, ka gnangala siky ³¹ lavany sady nampisiky Azy gny sikiny, voho nanday Azy niboaky mba hamantsiky Azy amy gny hazofijalia. ³² Lafa niboaky reo, ka nahita johary raiky baka a Syrena kehy hoe Simona, zay notere ndreo hiaraky amy ndreo mba hampilanjai agny hazofijaliany. ³³ Nandeha amy gny toera atao hoe Golgota reo, zay midika hoe" Toera gny Karandoha." ³⁴ Nome ndreo divay mifangaro amy gny afero I mba hinominy. Ka lafa nandramany zay, tsy nihiho I. ³⁵ Lafa nofantsihy ndreo tamy gny hazofajalia I, ka natao ndreo loka gny fizara reo fisikiny, ³⁶ sady nipetraky reo voho nijano niamby Azy. ³⁷ Tanabo gny lohany ro nametraha ndreo soratry manao hoe gny nanameloha Azy,zay mivaky hoe: "Ity ro Jesosy,mpanjaka ndreo Jiosy." ³⁸ Gnisy dahalo roa nofantsihy niaraky taminy, gny raiky tan-kavana voho gny raiky ankavia. ³⁹ Ireo zay gnandalo ro nanevateva Azy, nanozongozo gny kabesony reo ⁴⁰ sady nanao hoe: "Anao zay handrava gny tempoly voho hanamboatry azy ndraiky anaty telo andro, vonjeo gny vatanao! Laha Anao ro Agnak'Andraignanahary, mijotroa bakeny amy gny hazofijalia!" ⁴¹ Manahaky agnizay koa reo mpisoro lehibe nanevoky Azy, niaraky tamy reo mpanora-dily sy reo loholo, sady nivola hoe: ⁴² "Gnanavotry agny hafa I, fa tsy afaky manavotry gny vatany. I ro mpanjakan'Israely. Engao I hijotro baka amy gny hazofijalia egny, zay vo hino Azy isika. ⁴³ Gnatoky an'Andriagnanahary I, engao Andriagnanahary hamonjy Azy zao, laha mankasitraky gny hanafaky Azy Andriagnanahary. Fa na I aza ro nivola hoe: "Zaho ro Agnak'Andriagnanahary." ⁴⁴ Manahaky izay koa reo dahalo izay nofantsihy niaraky taminy nisafa fanambanimbania taminy koa. ⁴⁵ Lafa nanomboky tamy gny ora faha tsota, nandrakotry gny tany iaby gny aiziky ka hatramy gny ora fahasivy. ⁴⁶ Tamy gny ora fahasivy, nitoreo tamy gny feo mare Jesosy sady nanao hoe: "Ely,Ely, lama sabaktani?" Zay midika hoe: "Andriamanitry, Andriamanitry, nahoa no nanenga Ahy Anao?" ⁴⁷ Lafa re gny sasany reo zay nitsanga teo zay, ka hoy reo: "Mikaiky agn'i Elia I." ⁴⁸ Teo no eo nialy gny raiky tamy ndreo sady nangala spaonjy, nando azy tamy gny vinaingitry, nametraky azy tamy gny tohitohi bararata, sady nanome Azy mba hinominy. ⁴⁹ Gny sasany tamy ndreo nivola hoe: "Engao I. Hitantsika eo laha ho avy hamonjy Azy Elia." ⁵⁰ Ka nitoreo tamy gny feo mare ndraiky Jesosy sady nanolotry gny fanahiny. ⁵¹ Hentea, siky gny tempoly niriatry roa baka anambo ka hatramy gny Ambany, sady nihorohoro gny tany, sady vaky sasaky vatolampy regny. ⁵² Gnisokatry reo lolo, sady gny faty gny reo olon'Andriagnanahatry maro zay maty ka natsanga. ⁵³ I reo ro niboaky bakao amy gny lolo tafarany gny fitsanganany tamy gny maty, nilitry gny tana masy, sady niseho tamy gny maro. ⁵⁴ Sady reo Kapiteny sy reo zay nijery agn'i Jesosy lafa nahita gny horohoron-tany sy reo raha zay niseho, ka nandrary natahotry mare sady nanao hoe: "Agnak'Andriagananahry vatany ty." ⁵⁵ Gnisy Ampela maro zay nanaraky agn'i Jesosy baka Galilia mba hikarakara Azy teo nijery baka lavitry egny. ⁵⁶ Tamy ndreo teo Maria Nagdalena, Maria Nenin'i Jakoba sy Josefa, voho gny neni ndreo agnak'i Zebedio. ⁵⁷ Lafa hariva gny andro, nisy johary raiky mana-karea baka agny Armatia niavy, nikehy hoe Josefa, zay mpianatr'i Jesosy avao koa. ⁵⁸ Namondry agn'i Pilato I sady nangataky gny fatin'i Jesosy. Ka nobaikon'i Pilato omea azy zany. ⁵⁹ Nangala agny faty igny Josefa, namono azy tamy gny siky rongony malio, ⁶⁰ sady nampandry azy tamy gny lolony vaovao zay nolavaha tamy gny vatolampy. Ka nanosiky vato bevata hibaha agny varavara gny lolo i sady niboaky. ⁶¹ Maria Magdalena sy reo Maria hafa ro teo, nipetraky tanilany lolo teo. ⁶² Andro manaraky, gnazy andro afara gny Fanomana, niaraky nivory tamin'i Pilato reo lehibe gny mpisoro sy reo Fariseo. ⁶³ Hoy reo hoe: "Tompoko, tiaronay fa tamy gny mbo velo igny mpamitaky igny, ka zao safany hoe: "Afara gny telo andro, hitsanga ndraiky Aho." ⁶⁴ Ka noho zay, mandidia mba ho ambena gyny lolo hatramy gny andro fahatelo, laha tsy zay gnazy mpiantriny mety ho avy sady hangalatry Azy ka hivola amy olo hoe: "Nitsanga tamy gny maty I," sady gny fitaky farany ro ho raty noho raiky tamy gny voalohany." ⁶⁵ Hoy Pilato tamy ndreo hoe: "Mangala mpiamby. Mandehana sady ambeno soa araky zay vitanareo izay." ⁶⁶ Ka nandeha reo sady niamby gny lolo, nanisy tombo-kase gny vato voho nametraky gny mpiamby.