¹ Lafa vitan'i Jesosy izay safa iaby izay, nivola tamy reo mpianany I hoe: ² "Hainareo fa afaky roa andro ho avy gny Paska, sady hatolotry hahanto amy gny hazofijalia gny Agnak'olo." ³ Bakeo gny lehibe gny mpisoro voho gny loholo niaraky nivory tao amy gny lapa gny mpisoro-be, zay kehy hoe Kaiafa. ⁴ Niaraky gnanao tetiky reo mba hisambora moramora agn'i Jesosy sady hamono Azy. ⁵ Fa hoe reo hoe: "Tsy amy gny fety, mba tsy hisiany gny fiolavan'olo." ⁶ Ka Jesosy lafa ta Betania tao an-tranon'i Simona boka, ⁷ laha nipetraky nihina tamy gny latabatry, ka nisy ampela raiky gnana tavoara alabastara feno menaky lafo vily gnamondry Azy, ka nandraraky izay tamy gny lohany. ⁸ Ka lafa hita ndreo mpianatry izay, ka nasiaky reo ka nanao hoe: "Ino ro antony fandania zao? ⁹ Afaky navarotry lafo sady nomea reo mahantra io." ¹⁰ Ka Jesoy, nahay izay, nivola azy reo hoe: "Nahoa gnareo ro sahiran-tsay an-drampela io? Fa raha soa ro nataony tamiko. ¹¹ Eo aminareo isan-kariva gny mahantra, fa Zaho ro tsy ho eo aminareo isan-kariva. ¹² Ka lafa nandraraky izay menaky manitry izay tamy gny vatako I, nataony ho agny gny fandevena Ahy izay. ¹³ Volaniko aminareo marina, gna ia gna ia hitoria gny safa soa eto amy zao tontolo iaby zao, izay nataon'ity ampela ty ro ho volany koa ho fahatsiarova azy." ¹⁴ Bakeo raik tamin-dreo roa ambinifolo zay nikehy hoe Jodasy Iskariota, nandeha amy gny lehibe gny mpisoro ¹⁵ sady gnanao hoe: "Omenareo ohatrino aho fanolorako Azy aminareo?" Nandanja volafoty maliniky telopolo reo ho azy. ¹⁶ Tamy zay fotoa izay ro nila fahafaha I mba hanolora Azy amin-dreo. ¹⁷ Tamy gny andro voalohany gny mofo tsy misy lalivay ka gnamondry agn'i Jesosy reo mpiantry ka nivola hoe: "Aia ro tianao hanomananay ho anao hihinana gny hany gny paska?" ¹⁸ Gnamaly I hoe: "Milira an-tanana ao misy johary raiky zay ka volano i hoe: 'Hoy Mpampianatry hoe: "Fa mariniky gny fotoanako. An-tranonao ato Aho ro hanao gny paska miaraky amy reo mpianatriko.""' ¹⁹ Gnataony reo mpianatry araky zay nandidian'i Jesosy izay, sady nanoma gny hany gny paska reo. ²⁰ Lafa avy gny hariva, ka nipetraky nihina niaraky tamy gny mpianatry roa ambiny folo I. ²¹ Ka lafa nihina reo, ka hoy I hoe: "Volaniko aminareo marina fa hisy raiky aminareo hamadiky Ahy." ²² Nalahelo reo sady nanomboky nanontany Azy gny tsiraikiraiky hoe: "Tsy ho zaho mihitsy, Tompo?" ²³ Namaly I hoe: "Zay niaraky nanatsoboky gny tanany tamiko tanaty finga ro raiky zay hamadiky Ahy. ²⁴ Handeha gny Agnak'Olo, araky izay fa voasoratry momba Azy. Nefa loza gny olo izay hamadiky gny Agnak'Olo! Soa mare ho agn'izay olo izay gny tsy teraky." ²⁵ Jodasy, zay hamadiky Azy nivola hoe: "Zaho va izay, Raby o?" Hoy I taminy hoe: "Voalazanao." ²⁶ Laha mbo nihina reo, ka nangala gny mofo Jesosy, nisaotry, sady gnanapaky izay. Nomeny reo mpianatry sady nivola hoe: "Rambeso,hano. Ity ro vatako." ²⁷ Nandramby gny kapoaky I ka nisaotry sady nanome azy andreo ka nivola hoe: "Gnareo iaby, inomo ty. ²⁸ Fa ity gny lio gny fanekem-pihavana arotsaky ho agny maro ho famelan-keloky. ²⁹ Fa volaniko aminareo fa tsy mba hino gny vokatry gny voaloboky koa Aho, mandraky hiavia gny finoma vaovao hiarahako aminareo agny amy gny fanjaka gny Babako." ³⁰ Lafa niantsa hira fidera reo, ka nandeha tagny amy gny vohitr'i Oliva. ³¹ Bakeo hoey Jesosy tamy ndreo hoe: "Gnareo iaby ro hanenga Ahy noho gny amiko anio haliky, fa voasoratry hoe: "Hamango gny mpiamby ondry Aho ka hiparitaky gny ondry." ³² Ka afarany gny fitsanganako amy gny maty, ro hialoha lala agnareo a Galilia agny." ³³ Fa Petera nanao taminy hoe: "Na hanenga noho gny aminao aza rozy iaby, zaho tsy mba hanenga mihintsy." ³⁴ Hoy Jesosy taminy hoe: "Volaniko marina aminao, fa anio haliky laha mbo tsy mitoreo akoho, ka handa Ahy intelo iha." ³⁵ Petera nivola taminy hoe: "Gna tsy maintsy ho maty miaraky aminao aza zaho,tsy hanenga anao." Manahaky izay iaby novolan-dreo mpianatry hafa. ³⁶ Jesosy nandeha niaraky tamy ndreo nandeha amy gny toera kehy hoe Getsemane sady nivola tamy gny mpianatriny hoe: "Mipetraha eto fa Zaho mbo handeha eroy hivavaky." ³⁷ Nandesiny Petera voho agnak'i Zebedio roa lahy ka nanomboky nalahelo sy mangonotry. ³⁸ Bakeo hoy I tamy ndreo hoe: "Mijaly gny fanahiko, manahaky gny fa ho maty. Mipetraha eto sady miambena miaraky amiko." ³⁹ Nisitaky tseky I, niondriky sady nivavaky. Hoy I hoe: "Babako, laha azo atao, alao amiko kapoaky ty. Fe, ao tsy araky gny sitrapoko, fa gny sitraponao." ⁴⁰ Gnamondry reo mpianatry I sady nahita azy reo niroro, ka hoy I tamin'i Petera hoe: "Ino, tsy mahavita miamby miaraky amiko gna lera raiky aza va gnareo? ⁴¹ Miambena sady mivavaha mba tsy ho azo gny fakam-panahy gnareo. Mety avao gny fanahy, fa gny nofo ro malemy." ⁴² Mbo nandeha fanindroany I sady nivavaky. Hoy I hoe: "Babako, laha tsy azo alay amiko raha ty laha tsy mino Aho,ho atao agnie gny sitraponao." ⁴³ Nimpoly ndraiky I sady mbo nahita andreo natory, fa navesatry mason-dreo. ⁴⁴ Ka nanenga andreo ndraiky I, nandeha sady nivavaky fanintelony, nivola reo safa reo avao. ⁴⁵ Bakeo Jesosy namondry reo mpianatry ka nanao tamdreo hoe: "Mbo matory sy mangala mokkotry va gnareo? Henteo, fa mariniky lera, sady gny Agnak'Olo ro hatolotry an-tanany reo mpanota. ⁴⁶ Mitsangana, ndao ntsika. Jereo, fa mariniky raiky hamadiky Ahy." ⁴⁷ Laha mbo nivola I, avy Jodasy, raiky amy reo roa amby folo. Gnisy vahoaky maro avy niaraky taminy baka amy gny lehibe gny mpisoro sy reo loholo. Avy niaraky tamy gny meso sy langilangy reo. ⁴⁸ Sady nanome famantara an-dreo raiky lehilahy hamaliky agn'i Jesosy, manao hoe: "Izay horofako, ro I. Samboro I." ⁴⁹ Teo noho eo avao, namondry agn'i Jesosy I sady nivola hoe: "Finaritry, Raby!" Sady nanoroky Azy I. ⁵⁰ Hoy Jesosy taminy hoe: "Nao nama, ataovo zay nandehananao eto." Bakeo aby reo, nanondro tana agn'i Jesosy, sady nisambotry Azy. ⁵¹ Indroy, raiky tamy reo niaraky tamin'i Jesosy nanonjo gny tanany, nanatsoaky gny mesony, nanapaky gny mpanompo gny mpisorobe, ka nahafaky sofiny. ⁵² Bakeo hoy Jesosy taminy hoe: "Ampolio amy gny toerany mesonao, fa reo zay mandramby meso ro ho vonoy amy gny meso. ⁵³ Mieritreritry va nareo fa tsy afaky miakaiky agny Babako Zaho, sady I afaky mandefa ho Ahy tafik'anjely mihoatry noho gny roa ambi folo? ⁵⁴ Fa atao akory izay ro hahatanteraky gny Soratry Masina, izay mivola fa tsy maintsy hiseho izay?" ⁵⁵ Tamy zay andro zay Jesoy nivola tamy vahoaky hoe: "Avy miaraky amy gny meso sy langilangy hisambotry Ahy manahaky dahalo va gnareo? Isan'andro Zaho mipetraky tan-tempoly teo, fa tsy nosamborinareo. ⁵⁶ Fa iza iaby zay ro niseho mba hahatanteraky zay voasoratry ndreo mpaminany." Bakeo nanenga Azy mpianatry iaby regny nilay. ⁵⁷ Nandesy ndreo tagny amin'i Kaiafa mpisorobe Jesosy, zay nivoria ndreo mpanora-dalana sy loholo. ⁵⁸ Fa Petera nanaraky Azy baka lavitry nandeha amy gny kianja gny mpisorobe. Nilitry tanatiny I sady nipetraky niaraky tamy reo mpiamby raharaha mba hahita izay hiafarany. ⁵⁹ Ka reo lehibe gny mpisoro sy reo Synedriona iaby nila fiampanga tsy marina manohitry agn'i Jesosy, mba mety ahafaha ndreo mamonon Azy. ⁶⁰ Tsy nahita gna ino gna ino reo, na nisy mpijoro vavolombelo maro tsy marina avy aza teo. Lafa kelikely teo nisy roa avy namondry reo ⁶¹ sady nivola hoe:"Io johary io ro nivola hoe: 'Afaky mandrava gny tempolin-Driagnanahary Aho sady mananga izay ndraiky afaky telo andro."' ⁶² Nitsanga raiky mpisorobe ka nanao taminy hoe: "Tsy mana havaly va Iha? Ino zay hiampanga ndreo Anao izay?" ⁶³ Fa nangina Jesosy. Hoy mpisorobe taminy hoe: "Mandidy Anao amy gny alalan-Dragnahary velo aho, volano aminay la Iha ro Kristy,Agnak'Andriagnanahary." ⁶⁴ Jesosy namaly azy hoe: "Voasfanao. Fa volaniko aminareo, manomboky zao ho hitanareo gny Agnak'Olo hipetraky an-tagna ankavana gny Hery, sady ho avy amy gny raho gny lanitry." ⁶⁵ Bakeo gny mpisorobe nanataky ankajony sady nivola hoe: "Nisafa raty I! Manino ntsika ro mbo mila mpijoro vavolombelo?Intoy, renareo gny safa raty zao. ⁶⁶ Ino ro hevitry nareo?" Namaly reo sady nanao hoe: "Mendriky gny ho maty I." ⁶⁷ Bakeo reo nadorta agny terhiny voho namango Azy, sady namofoky tampify Azy, ⁶⁸ sady nanao hoe: "Maminania aminay, Kristy. Ia ro namango Anao?" ⁶⁹ Sady Petera nipetraky amonto gny kianja, sady nisy mpanompo vavy avy namondry azy nivola hoe: "Iha koa niaraky tamin'i Jesosy gny Galilia." ⁷⁰ Fa nanda izay teo aloha ndreo I, manao hoe: "Tsy haiko zay resakinareo zay." ⁷¹ Lafa niboaky gny vavahady I,nisy mpanompo vavy hafa nahita azy sady nivola tamy ndreo teo hoe: "Ity johary ty avao koa ro niaraky tamin'i Jesosy baka agny Nazareta." ⁷² Mbo nanda ndraiky I niaraky tamy gny fianiana hoe: "Tsy haiko izay johary izay!" ⁷³ Lafa afaky kelikely nanontany reo zay nitsanga teo sady nivola tamin'i Petera hoe: "Iha avao koa ro tena raiky amy gny regny, fa gny fomba fisafanao ro mamototry anao." ⁷⁴ Bakeo nanomboky nanoro sy nifanta ka nanao hoe: "Tsy haiko zao johary zay." Sady teo no eo ro nitoreo gny akoho. ⁷⁵ Tiaron'i Petera gny safa nambaran'i Jesosy hoe: "Mbo tsy mitoreo akoho handa Ahy intelo iha." Bakeo I nivoaky sady nitany mare.