¹ Gny fanjaka gny lanitry ka manahaky gny virjiny folo zay gnagala gny jirony ka nandeha tamy gny mpampakatry. ² Adala gny dimy tamy ndreo fa gny dimy koa mahitry. ³ Sady lafa nanday gny jirony reo virjiny adala,tsy nanday soliky niaraky taminy. ⁴ Fa reo virijiny mahitry koa, nanday fanajaria soliky niaraky tamy gny jirony. ⁵ Ka lafa tara gny mpampiakatry, dangon-joro reo iaby ka niroro. ⁶ Fa tamy gny sasak'aly, nisy nikaiky mare hoe: "Indroy, gny mpampiakatry! Miboaha mba hifanojo aminy." ⁷ Bakeo niary reo virijiny iaby ka nikarakara gny jirony. ⁸ Hoy reo adala tamy reo adala mahitry hoe: "Mba omeo ampahany amy gny soliky nareo zahay fa ho naty jironay. ⁹ Fa namaly gnazy mahitry ka nivola hoe: "Tsony tsy ho ampy ho agnay sy ho gnareo, fa mandehana agny amy reo mpivarotry ka miviliana ho agny vatanareo." ¹⁰ Laha nandeha nivanga reo, avy mpampiakatry, ka gnazy fa vono ro niaraky nandeha taminy ho ao amy gny fanokoa mbaly, ka nihily gny vavahady. ¹¹ Lafa afaky izay, avy avao koa reo virijiny sasany ka nivola hoe: "Tompoko, Tompoko, mba vohao zahay." ¹² Ka namaly I ka nivola hoe: "Volaniko aminareo marina io, tsy mahay agnareo aho." ¹³ Ka noho zay miambena,fa tsy hainareo gny andro gna gny lera. ¹⁴ Ka izay, manahaky gny lehilahy raiky zay handeha ho agny amy gny firenena hafa. Nikaiky mpanompony I ka nampitanta azy reo gny hananany. ¹⁵ Gny raiky tamy ndreo nomeny talenta dimy, gny raiky hafa nomeny roa,nvoho gny raiky koa nomeny talenta raiky. Gny tsiraikiraiky samby nandramby talenta arak'izay fahaizany, sady nandeha tamy gny liany amy gny zay lehilahy. ¹⁶ Gny raiky zay nahazo talenta dimy ro nandeha teo noho eo ka nampiasa azy sady nahazo talenta dimy hafa. ¹⁷ Manahaky zay koa raiky nahazo talenta roa nahazo roa hafa. ¹⁸ Fa gnazy mpanompo raiky zay nahazo talenta raiky igny koa, nandeha ka nangaly lavaky tamy gny tany, sady nandevy gny vola gny tompony. ¹⁹ Lafa ela gny fotoa ka nimpoly tompo gny mpanompo reo sady nandamy ndraha tamy ndreo. ²⁰ Nilitry gnazy mpanompo zay nahazo talenta dimy no sady nanday talenta dimy hafa. Hoy i hoe: "Tompoko, nomeanao talenta dimy aho. Intoy, gnanatombo talenta dimy hafa zaho." ²¹ Hoy gny tompony taminy hoe: "Soa izay, mpanompo soa sady mahatoky! Nahatoky tamy gny raha kelikely anao. Zaho hampiandraikitry anao amy gny raha maro. Milira amy gny fifalia gny tomponao." ²² Gnazy mpanompo zay nahazo talenta roa namondry sy nivola hoe: "Tompoko, nomeanao talenta roa aho. Intoy, gnanatombo talenta roa hafa aho." ²³ Hoy gny tompon taminy hoe: "Soa izay, mpanompo soa sady mahatoky! Nahatoky tamy gny raha kelikely anao. Zaho hampiandraikitry anao amy gny raha maro. Milira amy gny fifalia gny tomponao." ²⁴ Avy gnazy raiky mpanompo zay nahazo talenta raiky namondry no sady nivola hoe: "Tompoko, haiko fa lehilahy hentitry anao. Mijinja amy zay tsy namafazanao, no sady mamory vokatry amy zay tsy nambolenao. ²⁵ Gnatahotry zaho, ka nandeha sady namony gny talentanao tanaty tany tao. Heteo, intoy zay nanao." ²⁶ Ka namaly azy gny tompony ka nanao taminy hoe: 'Iha ry mpanompo raty sady malay, haiko fa zaho mijinja egny amy zay tsy namafazako sy mamory vokatry amy zay tsy namboleko. ²⁷ Noho zay tokony nomenao gny mpanjana-bola gny volako, ka lafa avy aho, nalaiko nahy miaraky amy gny tombony. ²⁸ Noho izay alao aminy agny talenta zao, omeo ho gnany raiky mpanompo zay mana talenta folo izay. ²⁹ Fa zay iaby mana ro homea marere kokoa-mihoatry lavitry aza. Fa ho agny reo zay tsy mana gna ino gna ino koa, gna izay hananany aza ho alay aminy. ³⁰ Ario amy gny maiziky amonto agny mpanompo tsy mendriky, agny ro misy gny fitania sy gny fararia-hy. ³¹ Ka lafa avy amy gny voninahiny gny Agnak'olo sy gny anjely iaby miaraky Aminy, hipetraky eo amy gny seza fihandrihana gny voninahitriny I. ³² Sady gny firenena iaby ro havory alohany eo, sady hanavaky gny olo raiky amy raiky hafa I, manahaky gny mpiamby ondry manavaky gny ondry amy gny osy. ³³ Hametraky gny ondry ho eo ankavanany I, fa gny osy eo ankaviany. ³⁴ Sady gny mpanjaka hivola amy ndreo zay eo an-tanana ankavanany hoe: 'Avia,gnareo zay notahia gny Babako, mandova gny fanjaka zay fa voaoma ho anareo fa izay nanorena agny zao raha iaby zao. ³⁵ Fa mosary Aho ka nomenareo hany; nangetaheta Aho ka nomenareo hinomy; nivahiny Aho ka nampandrosoinareo; ³⁶ Tsy an-tsiky Aho ka nampisikininareo; narary Aho nokarakarainareo; sady tan-gadra Aho ka nandeha Amiko Agny gnareo.' ³⁷ Ka reo marina hamaly sy hivola hoe: 'Tompo,ombia zahay ro nahita Anao mosary ka namaha Anao? Gna nangetaheta ka nampinominay? ³⁸ Ombia Iha ro hitanay nivahiny ka nampandrosoinay? Gna tsy nisiky ka nampisikininay? ³⁹ Ombia zahay ro nahita Anao narary gna nigadra ka nandeha aminao agny?' ⁴⁰ Ka gny mpanjaka namaly sady nivola andreo hoe: 'Volaniko aminareo marina io, zay nataonareo tamy reo rahalahiko maliniky mare regny, ro nataonareo tamiko.' ⁴¹ Sady nivola amy reo zay eo ankaviany hoe: 'Miala amiko, Gnareo zay voahozo, ho agny amy gny motro mirehitry mandrakizay zay fa voaoma ho agn'ny devoly sy reo anjeliny, ⁴² satria mosary Aho, fa tsy nomeanareo hany, nangetaheta Aho, fa tsy nomeanareo hosotroy; ⁴³ nivahiny Aho, fa tsy nampandrosoinareo; nitanjaky Aho, nefa tsy nampisikininareo; narary sy tan-gadra Aho, fa tsy nokarakarainareo.' ⁴⁴ Ka namaly koa reo sady nivola hoe: 'Tompo! Ombia zahay ro nahita Anao mosary, gna gnangetaheta, gna nivahiny, gna tsy nisiky, gna narary, gna tan-gadra, ka tsy gnanompo Anao? ⁴⁵ Ka I hamaly andreo sady hivola hoe: "Volaniko aminareo marina, fa izay tsy nataonareo tamy raiky tamy reo maliniky reo, ro tsy nataonareo tamiko." ⁴⁶ Reo ro halefa ho ao amy gny fanasazia mandrakizay fa reo marina koa ao amy gny fiaina mandrakizay."