¹ Lafa tamy gny aliky gny Sabata, laha iny gnanomboky maiziky kelikely gny andro voalohany amy gny herinandro, roso gnandeha nijery agny lolo igny Maria Magdalena voho raiky Maria hafa igny. ² Hentea, gnisy horohoron-tany mare, ka gny anjely gny Tompo ro nijotro baka agny an-danitry, avy sady gnanodikody agny vato, noho sady nipetraky tanabo teo. ³ Gny sorakiny manahaky gny tselatry, sady gny akanjony foty manahaky gny oram-panala. ⁴ Gnavozo gnazy mpiamby ka nanjary nanahaky gny lehilahy maty. ⁵ Gnisafa tamy ampela reo anjely igny sady nivola tamy ndreo hoe: "Ka mavozo, haiko fa mila agn'i Jesosy gnareo, gnazy nofantsihy tamy gny hazofijalia. ⁶ Tsy ato I, fa nitsanga, araky gny fa gnosafainy. Avia henteo gny toera zay nandria gny Tompo. ⁷ Mandehana malaky sady volano reo mpianany hoe: "Nitsanga tamy gny maty I. Indroy, fa gnandeha aloha nareo a Galilea I. Agny ro hahitanareo Azy." Indroy, fa gnivolaniko taminareo." ⁸ Gnanenga malaky agny lolo igny sady tamy tahotry voho tamy gny hafalia bevata ampela regny, sady nilay mba hivola agny mpianany. ⁹ Hentea, nifanojo tamy ndreo Jesosy sady nivola hoe: "Arahaba!" Gnamondry ampela regny, nitandraky agny tombokiny sady nidera Azy. ¹⁰ Lafa bakeo Jesosy nivola tamy ndreo hoe: "Ka mavozo. Mandehana mivola amy reo rahalahiko mba hiala ka handeha a Galilia. Agny ro hahita ndreo Ahy." ¹¹ Laha mbo gnandeha igny ampela regny, hentea, gny sasany tamy reo mpiamby gnandeha amy gny tana bevata agny sady nivola tamy gny loha gny mpisoro gny raha iaby zay niseho. ¹² Lafa gnifanojo tamy reo loholona gny mpisoro sady niresaky momba gny olana tamy ndreo, gnanome vola bevata agny reo miaramila reo ¹³ sady nivola azy reo hoe: "Volano amy reo hafa hoe: 'Gniavy tamy andro aliky mpianatr'i Jesosy regny gnangalatry gny vatany laha mbo igny natory zahay.'" ¹⁴ Lafa niavy tamy gny governora zay tatitry zay, ka handresy lahatry azy ntsika sady hangala gny ahiahy aminareo." ¹⁵ Sady nalay gny miaramila gny vola sady gnanao araky zay fa nivolany azy reo. Sady zay tatitry zay ro nupoaritaky tamy reo Jiosy sady mitohy henaniky zao aza. ¹⁶ Nandeha Galilea reo mpianatry raiky amby gny folo, tagny amy gny vohitry zay fa natoron'i Jesosy azy reo. ¹⁷ Lafa nahita Azy reo, ro nidera Azy, fa gny sasany koa nitao. ¹⁸ Gnamondry azy reo Jesosy sady niresaky tamy ndreo sady nivola hoe: "Fa nomea Ahy gny fahefa iaby agny an-danitry voho ety an-tany. ¹⁹ Ka mandehana sady ataovo ho lasa mpianatriko gny firenena iaby zao. Ataovo batisa reo amy gny agnara gny Ray, gny Zanaky, voho gny Fanahy Masina. ²⁰ Ampianaro reo hanenky gny raha iaby zay gnandidiako agnareo. Zaho miaraky aminareo avao, gna hatramy gny fiafaran'izao tontolo zao aza."