¹ Tamy izay fotoa izay avao ro niavy tamin'i Jesosy reo mpianany sady nivola hoe: "Ia ro bevata mare agny amy gny fanjaka gny lanitry?" ² Jesosy nikaiky zaza kely ho aminy eo,nametraky azy tamin-dreo, ³ sady nivola hoe: "Volaniko marina aminareo, fa laha tsy miova manahaky zaza kely reo gnareo, tsy hisy hevitry gny hidiranareo agny amy gny fanjaka gny lanitry. ⁴ Noho izay, gna ia gna ia manetry tena manahaky gny zaza kely ity ro bevata mare i agny amy gny fanjaka gny lanitry. ⁵ Gna ia gna ia mandramby gny zaza kely manahaky anizao amy gny agnarako ro mandramby Ahy. ⁶ Fa gna ia gna ia mahavy gny raiky amy reto zaza kely reto zay mino Ahy hanota, ro ho sao kokoa ho azy gny hiantonany gny fikosoham-bary bevata ambozony eny, ka halentiky amy gny riaky laliky agny I. ⁷ Loza ho agn'izao tontolo zao noho gny fotoa gny fanafintohia! Fa ilay gny ahavy izay fotoa izay,nefa loza ho agn'olo izay niavian'izay fotoa izay! ⁸ Laha miteraky fanafintohia ho anao gny tagnanao gna gny tombokinao, tapaho izay sady alao aminao eo. Soa mare ho anao gny militry kilemay na mandringa agny amy gny fiaina mandrakizay noho gny ho very agny amy gny motro tsy mety maty amy gny fanana tagna roa gna tomboky roa. ⁹ Laha miteraky fanafitohiana ho anao gny masonao raiky, omboto sady alao aminao eo. Soa mare ho anao gny militry agny amy gny fiaina mandrakizay miaraky amy gny maso ila noho gny hoe tsobo agny amy gny motro tsy mety maty miaraky amy gny maso roa. ¹⁰ Tandremo tsy hanao tsinotsino reo zaza maliniky reo gnareo. Fa mivola aminareo Zaho fa an-danitry agny reo anjeliny ro mijery avao gny sorakiny Babako izay an-danitry agny. ¹¹ [Fanamariha: Gny dikan-tsafa taloha soa mare ro tsy ahita gny fehezanteny izay miboaky manahaky hoe gny v.11. hoe: "Fa gny Gnagnak'Olo ro avy mba hamonjy izay tsobo."] ¹² Ino ro eritreritrinareo? Laha misy mana ondry zato, ka mandeha amy gny lala diso gny raiky amy ndreo, tsy hanenga gny sivy amby sivifolo anabo va I sady andeha hila gnazy raiky zay nandeha amy gny lala diso? ¹³ Laha hitany izay, ka volaniko marina amignareo, fa misinisiny amy izay mihoatry noho reo sivy amby sivifolo gnazy tsy gnandeha amy gny lala diso I. ¹⁴ Manahaky izay koa, tsy to gny Babagnareo an-danitry agny gny hahavery gny raiky amy reo maliniky reo. ¹⁵ Laha manota aminao gny rahalahinao, mandehana sady volano azy gny hadisoany aminao sy reo avao koa. Laha mindrandry agnao I, hifankahazo amy gny rahalahinao ndraiky iha. ¹⁶ Kanefa laha tsy mindrandry anao I, mangala raiky na roa hafa miaraky aminao, amy zay mba amy gny vava ndreo vavolombelo roa na telo no ahafaha manato gny safa iaby. ¹⁷ Sady laha manda gny hijandry azy reo I, volano amy gny fiangona gny raha misy. Laha tsy manenky hijandry gny fiangona avao koa I, ka engao I hanahaky gny Jentilisa sy gny mpamory hetra. ¹⁸ Volaniko aminareo marina io, gna ino gna ino fehezinareo an-tany ety dia ho fehezi an-danitry agny; sady gna ino gna ino enganareo eto an-tany ka ho enga koa zay an-danitry agny. ¹⁹ Sady mbo ho volaniko aminareo avao hoe: "Laha misy roa amignareo manenky en-tany eto gny amy zay raha angatahy ndreo, ka hoa atao ho azy reo izay amy gny alala gny Babako zay an-danitry agny. ²⁰ Fa gna aia misy roa gna telo miaraky mivory amy gny Agnarako, anivondreo reo eo Zaho." ²¹ Bakeo namondry Petera sady nivola tamin'i Jesosy hoe: "Tompo, impiry hanota amiko gny rahalahiko ka hanenga azy aho? Hatramy gny im-pito va?" ²² Jesosy nivola azy hoe: "Tsy mivola aminao Aho hoe im-pito, fa hatramy gny fitopolo im-pito. ²³ Noho izay gny fanjaka gny lanitry mitovy amy gny mpanjaka azaiky zay ta hifandamy ara-bola miaraky amy reo mpanompony. ²⁴ Laha vo nanomboky gny fandamina i,gnisy mpanompo raiky nandesy taminy teo zay gnananany talenta ray aly. ²⁵ Fe satria tsy gnana fomba handoava izay I, ka nandidy gny hamarota azy gny tompony, miaraky amy gny valiny sy reo agnany voho reo hananany iaby, ka ho vita gny fandoavan-trosa. ²⁶ Noho izay niondriky gnazy mpanompo, sady nisoloho talohany teo, sady nivola hoe: 'Tompo, manana fahareta amiko,fa haloako aminao gny raha iaby.' ²⁷ Noho izay gny tompo gnazy mpanompo izay, nahaferinay, ka gnanafaky azy sady nanenga gny trosa taminy. ²⁸ Fa niboaky io mpanompo io ka nahita gny raiky tamy reo mpiara-manompo aminy, izay gnananany dinaria zato. Nosamboriny I, norambesiny tamy gny tendany, sady nivola hoe: 'Aloavo amiko zay nitrosanao.' ²⁹ Nefa nihohoky io mpiaraky manompo amy gny io sady nisoloho taminy,nanao hoe: 'Manana fahareta amiko, fa haloako aminao zay. ³⁰ Kanefa nanda gnazy mpanompo voalohany. Mifanohitry amy gny izay, nandeha I sady nataony tany am-pigadra gnazy mpiara-manompo aminy mandra-pahaloany aminy zay notrosainy. ³¹ Lafa nahita izay niseho reo mpiaraky manompo aminy, nalahelo tokoa reo. Nandeha sady nivola tamy gny tompony zay raha iaby niseho reo. ³² Bakeo nikaiky azy tompon'io mpanompo io, sady nivola azy hoe: 'Iha ry mpanompo raty fanahy, nanenga gny trosa iaby taminao zaho satria iha nisoloho tamiko. ³³ Tsy tokony hana famindram-po amy gny mpiaraky manompo aminao va iha, manahaky gnanako famindram-po taminao?' ³⁴ Nasiaky gny tompony sady nanday azy tany am reo mpampijaly mandraky pahaloany zay raha notrosainy. ³⁵ Manahaky izay koa ro ho atao gny Babako an-danitry agny aminareo, laha tsy manenga gny rahalahiny amy gny fony gny tsiraikiraiky aminareo."