¹ Bakeo nisy Fariseo sy mpanora-dalana sasantsasany baka any Jerosalema namonjy any Jesosy. Hoy gnataondreo hoe: ² "Nagnino mpianatsy reo ro mandika gny fomban-drazany olo be reo? Fa tsy manasa tagna koa reo la hihinan-kany" ³ Namaly I sady nisafa tamindreo hoe: "Ka nagnino nareo ro mandika gny lilin-Dragnahary noho gny fomban-Drazanareo? ⁴ Zagnahary nivola hoe: 'Hajao gny babanao voho gny neninao,' sady 'Zay mivola raty gny babany na gny neniny ro ho faty tokoa.' ⁵ Nareo mivola hoe: 'Na ia na ia mivola amy babany na neniny hoe: "Na ino na ino fagnampia azonareo baka amiko de fagnomeza hoan-Dragnahary hananizao,"' ⁶ zay olo zay de tsy tokony magnaja gny babany. Amy zay fomba zay ro foananareo gny safan-Dragnahary noho gny tombontsoany fomban-drazanareo reo. ⁷ Ry mpiatsaravelatsihy! To gny faminaniany Isia momba anareo laha nivola I hoe: ⁸ "Vahoaky ty ro magnaja ahy amy vavandreo iaby, fe gny fondreo ro lavitsy ahy. ⁹ Tsy misy dikany gny fiderany ahy fotony reo mampianatsy gny lilin'olombelo manahaky gny fampianarandreo."' ¹⁰ Bakeo nikaiky gny vahoaky ho amindreo eo I sady niteny tamindreo hoe: "Mijanjingna ka mazahoa- ¹¹ Tsy gny militsy ambavan'olo ro mandoto gny olo. Fe ze aloky gny vava ro mandoto gny olo." ¹² Bakeo namonjy mpianatsy reo sady nivola tamy Jesosy hoe: "Hainareo va fa tohy Fariseo reo lafa nahare any safa zay?" ¹³ Jesosy namaly ka nivola hoe: "Raha mitiry ze tsy namboleny babako andagnitsy agny de ho lania ritsy iaby. ¹⁴ Engao reo ho eo fa reo mpitariky gny jamba. Laha misy olo jamba raiky mitariky jamba raiky hafa, samy hivary andavaky reo roa." ¹⁵ Petera namaly ka nivola tamy Jesosy hoe: "Azavao aminay zao fagnohara zao." ¹⁶ Hoy Jesosy hoe: Tsy manam-pahalala avao koa va nareo? ¹⁷ Tsy hitanao va fa ze miditsy amy vava, militsy ankibo sady bakeo haboaky amy kabone? ¹⁸ Fa ze raha aboaky gny vava ro baka amy fo. Reo raha reo ro mandoto gny olo raiky. ¹⁹ Baka amy fo gny hiboahany gny sain-dratsy, gny vono olo, gny fitsangajanga, gny fangalam-balin'olo, gny halatsy , gny fijoroa vavoombelo tsy to, ary gny fivolagnan-draty. ²⁰ Reo raha reo ro mandoto gny olo raiky. Fa gny mihima amy tagna tsy misasa ro tsy mandoto gny olo raiky." ²¹ Bakeo Jesosy niala teo ka nimpoly tamy faritaniny Tyro sy Sidona. ²² Intia nisy ampela Kananita raiky baka amy faritsy io. Nikaiky mare i sady nivola hoe: "Mamindra fo amiko, ry Tompo gnanaky Davida o! Gnanako ampela ampahoriany devoly mare." ²³ Jesosy tsy namaly teny azy. Namonjy any mpaminany ka niamgavy taminy nivola hoe:" Roaho I fa mitabataba mare amintsika." ²⁴ Jesosy namaly sady nivola hoe: "Tsy nirahy ho ania na ia Aho afa-tsy ho any ondry very amy ankohonany Israely." ²⁵ Avy nangataky sady niankohaky tagnatsehany i nivola hoe: "Tompo, vonjeo zaho." ²⁶ Namaly I ka nanao hoe: "Tsy rariny laha alay gny mofon-jaza ka atsipy ho any amboa." ²⁷ Hoy I hoe: "Eka, Tompo, fa na gny amboa aza mba mihina ze ambiambiny latsaky baka amy latabatsy gny tompony." ²⁸ Namaly Jesosy sady nivola taminy hoe: "Rapela, bavata gny finoanao, ho tanteraky aminao araky gny fagnirianao zay." Janga gny gnanaky ampela taminizay fotoa zay. ²⁹ Niala teo Jesosy ka nandea takaikiny ranomasiny Galilia. Bakeo niakatsy tantendrombohitsy raiky tegny i ka nipetsaky teo. ³⁰ Vahoaky maro ro nagnato azy. Nandesindreo niaraky tamindreo gny mandringa, gny jamba, gny moa ,gny kilemaina voho gny maray hafa maro hafa koa. Napetsakindreo tan-tombokiny Jesosy reo, ka nijangany. ³¹ Tandre gny vahoaky laha nahita any moa nivola, gny kilemaina janga, gny malemy afaky mandeha, gny jamba nahiratsy. Nankalaza an-Dragnahariny Israely rozy. ³² Nikaiky mpianatsiny reo mba hamonjy Azy Jesosy sady nivola hoe: "Mangoraky any vahoaky reo zaho fotony telo andro sahady reo ro nipetsaky niaraky tamiko nefa tsy mana hoany. Tsy ta handefa andreo tsy hihina Zaho, tsony ho safotsy andala egny." ³³ Hoy mpianatsy reo taminy hoe: "Aia ro hahitanay mofo ampy any vahoaky maro be reo agnefitsy aty?" ³⁴ Hoy Jesosy tamindreo hoe: "Mofo firy ro aminareo agny?" Hoy reo hoe: "Fito voho hazandrano madiniky kely." ³⁵ Bakeo Jeosy nandidy gny vahoaky mba hipetsaky amy tany. ³⁶ Nandramby gny mofo fito mbaminy hazandriaky I, lafa nisaotsy, namaky gny mofo ka nanolotsy anireo ho amy mpianatsy. Mpianatsy reo ngnome hoany vahoaky iaby. ³⁷ Nihina ka afa-po gy vahoaky iaby. Bakeo reo nanambatsy sobiky fito feno ambiambiny ze tsy lany. ³⁸ Reo ze nihina de efatsy arivo lahy, tsy agnatiny gny zaza voho gnampela. ³⁹ Bakeo Jesosy nagnampoly gny vahoaky ka niondry an-tsambokely sady nandea amy faritsy Magadana.