¹ Tamin' izay andro zay, Heroda mpanapaky nandre gny vaovao momba an'i Jesosy. ² Hoy I tamin' ireo mpanompony hoe: "I Jaona mpanao Batisa zay; nitsanga tamin'ny maty I. Noho zay, miasa agnaminy marina ireo hery reo." ³ Fa Heroda nisambotsy any Jaona, namatotsy azy, sady nandefa azy tangadra noho i Herodiasy, valiny Filipo rahalahiny. ⁴ Zao gnataony Jaona hoe: "Tsy ara-dily ho anao gny mana azy ho valinao." ⁵ Nagniry gny hamono azy Heroda, fe nataotsy any vahoaky reo I, fotony nirambesindreo manahaky any mpaminany I. ⁶ Fa lafa niavy gny fitsingereny gny andro nahaterahany Heroda, nitsinjaky tagnivony vahiny nasay gny gnanaky ampelany Herodiasy ka nahafinaritsy any Heroda. ⁷ Ho setriny zay, nampagnategna tamy fianiana I gny hagnome ze hangatahiny na ino na ino. ⁸ Lafa baka notoroany neniny mariky, zao gnataony hoe: "Ameo ahy eto ambonini finga gny lhany Jaona mpanao Batisa." ⁹ Nalahelo mare noho gny fangatahany gny mpanjaka, fe noho gny voadiny voho noho reo iaby niaraky nihina taminy ro nagnome baiko i fa tokony ho vita zay. ¹⁰ Nagniraky ka nanapaky lohany Jaona tangadra tao I. ¹¹ Bakeo nandesy tamy finga gny lohany sady namea zaza ampela sady nandesiny tamy neniny. ¹² Bakeo la niavy mpianatsiny regny, nangala any fatiny, ka nandevy azy. Tafaran'izay, nandeha reo sady nagnambara tamy Jesosy. ¹³ Lafa nahare anizay Jesosy, niala baka tamy sambokely raiky I handea amy toera raiky mitoka. Lafa nahare anizay vahoaky reo, nagnaraky azy antangotsy tamy tana bevata reo. ¹⁴ Bakeo Jesosy nandea talohandreo sady nahita any vahoaky maro be regny. Nahaferignay andreo sady nagnajanga gny aretindreo. ¹⁵ Lafa niavy gny hariva, nandeha taminy teo mpianatsiny regny ka nivola hoe: "Ity ro toera tsy misy, fa tampitsy sahady gny andro. Alefao vahoaky reo mba hahafahandreo mandeha amy tana reo sady hivily hany hoandreo." ¹⁶ Jesosy nivola andreo hoe: "Tsy mila mandeha lavitsy reo. Amenareo raha hany reo." ¹⁷ Zao gnataondreo hoe: "Mofo dimy sy fia roa avao ro anananay." ¹⁸ Hoy Jesosy hoe: "Andeso agnamiko aty zay." ¹⁹ Bakeo Jesosy nibaiko any vahoaky reo mba hipetraky amy akata eo. Nalainy mofo dimy voho fia roa. Niandrandra tandagnitsy tagny, nisaotsy I ka nanapaky any mofo reo ka nameany any mpianatsiny reo, ka mpianatsy reo ro nagnome any vahoaky reo. ²⁰ Nihina iaby reo iaby ka voky. Bakeo nahorondreo gny sisa tsy lany sy gny poti-kany ka nahafeno roambinifolo harona. ²¹ Dimy arivo lahy teo reo nihina, ankoatsy gny zaza voho gny ampela. ²² Tonga de nampandehaniny tantsambokely sady handea alohany ampita egny mpianatsiny regny, laha mbo nandefa any vahoaky regny I. ²³ Tafarany nandefasany any vahoaky reo, nandeha niakatsy raiky tantendrombohitsy tegny I mba hivavaky. Lafa niavy gny hariva, I raiky ro teo. ²⁴ Gny sambo fa lavitsy gny tety, natopitopin'ny onja, fotony nitsoky nanohitsy andreo gny rivotsy. ²⁵ Tamy fiambena fahaefatsy gny aly ro nagnato andreo Jesosy, nandea tambony ranomasy. ²⁶ Lafa nahita azy nandea tambony ranomasy mpianatsy regny, navozo ka nivola hoe: "Angatsy io," sady nitoreotoreo tamy tahotsy reo. ²⁷ Jesosy tonga de nivola tamindreo hoe: "Mahereza! Zaho tiky! Ka mavozo." ²⁸ Namaly azy Petera ka nivola hoe: "Tompo, laha Iha io, apamonjeo anao ambonindrano egny aho." ²⁹ Hoy Jesosy hoe: "Mamonjea." Ka niala tamy sambokely Petera sady nandeha tambony rano mba hamonjy any Jesosy. ³⁰ Fa lafa nahita gny rivotsy Petera ka lasa nataotsy. Laha igny i nanomboky nilentiky igny, nikiaky mare I sady nivola hoe: "Tompo, vonjeo zaho!" ³¹ Jesosy tonga de nagnampatsy gny tagnany, nitazo any Petera sady niteny taminy hoe: "Iha ry kely finoa, fa nagnino iha ro nataotsy?" ³² Bakeo Jesosy sy Petera nandeha namonjy any sambokely, nijano gny rivotsy. ³³ Bakeo mpianatsy tagnatiny sambokely regnyidera any Jesosy sady nivola hoe: "Iha marina ro Gnanakin-Dragnahary." ³⁴ Lafa baka niampita rozy, niavy tantety ta Genesareta. ³⁵ Lafa nahay any Jesosy lelay tamy toera io, nandefa hafatsy tamy faritsy magnodidy iaby, nandesindreo tamy teo ze olo iaby narary. ³⁶ Nitalaho taminy reo mba hahafahandreo mikasiky gny moronakanjony avao, maro reo nikasiky azy ro janga.