¹ Zahay laha nahare tatitsy fa misy fijangajanga aminareo, karaza fandaisa tena tsy mendriky gnazy tsy azo atao amy reo Jentilisa. Gny tatitsy laha hoe misy raiky aminareo miaraky matory amy valy gny babany, ² Nareo laha tena miavonavo! Fa tsy tokony alahelo va nareo? Gny raiky gnazy nanao agn'izay laha tsy maintsy alay aminareo eto. ³ Fa na taha tsy eo amy vata aza aho fa mbo eo amy fagnahy, laha fa nitsara gnazy raiky nanao agn'izay sahady, manahaky gny hoe teo aho. ⁴ Lafa miaraky mivory amy agnaran'i Jesosy Tompotsika nareo, sady gny fagnahiko laha eo koa amy tanjakin'i Jesosy Tompotsika, laha fa nitsara io olo io sahady aho. ⁵ Nataoko zay mba hagnomeza agn'izay johary zay ho agny Satana ho famotea gny nofo, mba ho avotsy gny fagnahiny amy andro gny Tompo. ⁶ Tsy soa gny fiseoseoanareo! Tsy hainareo va fa gny lalivay kelikely laha manova gny mofo iaby? ⁷ Ataovo malio gny tenanareo amy lalivay taloha mba ho avy mofo vaovao nareo, ka mba ho avy mofo tsy misy lalivay. Fa Kristy, gnazy Agnaky Ondrintsika tamy Paska, laha natao soro. ⁸ Roho zay laha ao tsika hanao fety gny hafalia, tsy amy lalivay taloha, gnazy lalivay gny fandaisa tena raty ndraiky faharatia. Fa koa, ao tsika hifety amy mofo tsy misy lalivay gny fahadiavam-po ndraiky fahamarina. ⁹ Zaho laha nanoratsy ho anareo tamy taratasiko mba tsy hiaranareo miasa amy reo olo mpijangajanga. ¹⁰ Kanefa gny tiako ambara laha tsy gny olo mpijangajanga iaby amy tany iaby zao, ndra reo tsy maha taha tena, na reo mpamitaky, na reo mpanompo sampy, fotony mba hiala amindreo laha mila miala amy tany iaby zao nareo. ¹¹ Nefa enaniky zao aho manoratsy ho anareo mba tsy hiaraky hiasa miaraky amy ndra iha ndra iha gnazy akea hoe rahalahy nefa miay agnaty gny fijangajanga, na gnazy maha taha tena, na mpanompo sampy, na mpivola raty, na mamo lava, na mpamitsaky. Ka mihina hany miaraky amy olo manahaky zay. ¹² Fa akory ro ilirako amy fitsara reo gnazy tsy agnaty fiangona? Mifanoitsy amy zay, nareo va tsy tokony hitsara reo gnazy vagnaty gny fiangona? ¹³ Fa Ndragnahary laha mitsara reo gnazy tsy agnatiny. ''Alao aminareo gny olo raty.''