¹ Raha nagnatogna an'i Jerosalema Jesosy sy ny mpianany ka nakao Betifaga, aigny an-tanetin'i Oliva, de nandefa mpianatra rôy Jesosy, ² nilaza tamin-jareo hoe: "Mandeana akao am'ze tanana magnaraka akao, akeo iany anareo de hatazana boriky mifatotra ary ny zana-boriky raika miaraka am'azy. Vahao jareo ary ndeso aty Amina. ³ Raha misy mitare an'nareo momba an-zany, de lazao hoe: 'Misy ilan'ny Tompo an'azy reo, ary akeo no eo zany ôla zany de handefa an'azy reo miaraka aminareo." ⁴ Ary nitranga zany mba hatanteraka ze nambara tamin'ny alalan'ny mpaminany. Ozy Izy hoe: ⁵ "Ilazao ny zanaka vavin'i Ziona hoe:' Indro, ny Mpanjakanao magnatona an'nao, Magnetry tegna ary mitaingina boriky- zana-boriky làhy.'" ⁶ Avy teo de lasana reo mpianatra ary nagnano arak'ze nandidin'i Jesosy an'azy reo. ⁷ Noentin-jareo le ampondra sy le zana-boriky ary nametraka ny lamban-jareo teo amin'azy, ka nipetraka teo amin'ny lamba Jesosy?. ⁸ Ny ankamaron'ny vahôka de namelatra ny lambany tamin'ny tany, ary reo hafa nanapaka sampan-kazo ary nagnaparitaka an'zany tamin'ny lalana. ⁹ Avy teo reo vahôka nialô an'i Jesosy sy reo ze nagnaraka an'Azy nitabataba hoe: "Hosana ho an'ny Zanak'i Davida! Isaorana le tonga avy amin'ny agnaran'ny Tompo! Hosana akaigny amin'ny avo indrindra! ¹⁰ Rafa niditra tao Jerosalema Jesosy, de niaika ny iray tanàna ka nagnano hoe: "Iza ma io?" ¹¹ Ny vahôka namaly hoe: "Izy no Jesosy le mpaminany avy aigny Nazareta aigny Galilia." ¹² Avy teo niditra tao an-tempoly Jesosy. Noroasiny daôly reo mpividy sy mpivarotra takao an-tempoly, ary naongany ny latabatr'ireo mpanakalo vola sy ny fipetran'ireo mpivarotra voromelala. ¹³ Ozy Izy tamin-jareo hoe: "Efa vôsoratra hoe: 'Ny tranoko de antsovina hoe tragno fivavahana, kanefa ataonareo efitra fisitrin'ny jiolàhy." ¹⁴ Nony avy teo de nisy jamba sy mandringa nagnatogna an'Azy takao an-tempoly, ka nositragniny zareo. ¹⁵ Fa nony natazagna ny ra-mahagaga nataony ny leiben'ny mpisorogna sy ny mpanora-dalàna, ary rafa reignin-jareo ny zaza madinika nidomaresy tao an-tempoly hoe: "Hosana ho an'ny zanak'i Davida," de sosy mafy zareo; ¹⁶ Ozy zareo tamin'azy hoe: "Reigninareo va zany lazain'reo ôla reo zany?" Namaly an'azy reo Jesosy hoe: "Iôny! Fa tsy mbôla novakinareo miitsy ma ny hoe: 'Avy amin'ny vavan'ny zaza madinika sy ny zaza minono no nandavorarianareo ny fiderana?" ¹⁷ Avy teo de nandao an'azy reo Jesosy ka nande taigny amin'ny tanànan'ny Betania ary nipetraka tao ny alina. ¹⁸ Ary nony ampôlakeka raha niverigna taigny an-tanàna Izy, de nôna. ¹⁹ Natazana aviavy taigny an-tsisin-dalana, de nagnatogna tegny Izy ary tsy natazagna na ino na ino takeo afa-tsy ny raviny. Ozy Izy tamin'azy hoe:"Ôka tsy hisy vô ntsony avy aminao mandrakizay, ary niaraka tam'zay de maigna le aviavy. ²⁰ Rafa natazagna an'zany reo mpianatra, de gaga zareo ary nitare hoe: "Ahôna no nahamaigna avy atraigny ty aviavy ity?" ²¹ N amaly Jesosy ary nilaza an'azy reo hoe: 'Lazaiko marina aminareo, manam-pinôna sy tsy misy fisalasalana nareo, de tsy ze natao tamin'io aviavy io fôgna no hataonareo, fa de hitare amin'ty tanety ty aza hoe: 'miongota ary milatsa aigny an-dranomasina', de ho atao zany. ²² N'ino n'ino angatanareo am-bavaka, am-pinôna, de ho azonareo. ²³ Nony niditra tao amin'ny tempoly Jesosy de nagnatogna an'Azy ny leiben'ny mpisorona sy ny zokiola raha nampianatra Izy ary nitare hoe: "Faefana avy aiza ma no agnaovanao an'ireigny ra reigny, ary iza no nagnome an'nao zany fahefana zany?" ²⁴ Namaly Jesosy ary nitare tamin-jareo hoe: "Hametrako fanontanina raika fôgna kô anareo. Raha lazainareo Amina, de holazaiko aminareo ny fahefana anaovako an'ireigny ra reigny. ²⁵ Ny Batsian'i Jaona - avy taiza no niaveny? Avy taigny an-dagnitra sa avy tamin' ôlombelona?" Niady hevitra zareo, nagnano hoe: "Raha miatre tsika hoe, Avy taigny an-dagnitra, de Izy hitare am-tsika hoe: 'Fa magnino zany anareo no tsy nino an'azy? ²⁶ Fa raha mitare tsika hoe: 'avy tamin' ôlombelona', matatra ny vaôka tsika, satria izy daôly de mievitra an'i Jaona ôtran'ny mpaminany." Ka namaly an'i Jesosy zareo ka nitare hoe: "Tsy fantatray." ²⁷ Ary ozy fôgna kô Izy tamin-jareo hoe: "Ary Za kô de tsy hilaza aminareo hoe avy akaiza ny fahefana agnôvako ireigny ra reigny. ²⁸ Fa manakôry ny hevitrareo? Nisy leila raika nagnana zanaka leila rôy. Nande nankaigny am'le vôlony izy ary nagnano hoe: 'Anaka, mandiana miasa aigny amin'ny tanim-bôloboka gniany.' ²⁹ Le zanany leila namaly an'azy hoe: "Tsy ho aigny za," nefa avy teo niova hevitra izy de lasana. ³⁰ Avy teo de nankeigny am'le faharô izy ary nitare ôtran'zany fôgna kô. Namaly izy ka nitare hoe: "Ho aigny za tompoko, nefa tsy nankaigny izy. ³¹ Iza tamin'ireo zanagny roey reo no nagnano ny sitrapon'ny rainy?" Ary ozy zareo hoe: "Le vôlôny." Jesosy nitare an'azy reo: "Lazaiko marina aminareo, reo mpamory hetra sy reo mpivaro-tegna de hiditra ny Fanjakan'Andriamanitra alohanareo. ³² Fa Jaona nagnatogna anareo tamin'ny fahamarinana, fa tsy nino an'azy anareo. Fa reo mpamory hetra sy mpivaro-tegna no nino an'azy. Fa nareo, na de natazagna an'zany aza, de tsy nibebaka sy tsy nino. ³³ Tandrineso ty fanoharana raika ty. Nisy leila raika,tompon-tany. Nagnano tanimbôloboka izy, nobakôny zany, nandavahany famiazana tao agnatiny, nananganany tilikambo, ary nampanofainy tam'reo mpamboly vôloboka. Avy teo de nankaigny amin'ny tanàna hafa izy. ³⁴ Nony nagnakeiky ny taom-pavokarana, de nagniraka ny sasagny tam'reo mpanompo izy ho aigny am'reo mpamboly vôloboka haka ny anjara vokatra. ³⁵ Fa nosamborin'reo mpamboly vôloboka reo mpanompony, notarôny ny raika, novonoiny ny hafa, de mbôla notorahana vato ny hafa. ³⁶ Ary mbôla, nandefa mpanompo hafa ndre le tompo-tany, maro no ny tamin'ny vôloany, fa nataon-jareo salan'zany iany kô. ³⁷ Tafaran'zany, de nagniraka ny zanany lahitokana taigny am'reo ny tompon-tany,nilaza hoe: 'Hagnaja ny zanako zareo.' ³⁸ Fa rafa natazagna le zanaka là reo mpamboly vôloboka, de nikoragna zareo hoe: 'Ty no mpandova. Andao, hovonotsika izy ary alaintsika ny lova.' ³⁹ No zany de nosamborin-jareo izy,natsipy tao agnatin'ny tanim-bôloboka ary novonoina. ⁴⁰ Ary rafa tonga ny tompon'ny tanim-bôloboka, ino no ho ataony am'reo mpamboly vôloboka," ⁴¹ Ozy zareo tamin'azy hoe: "Ho arigana amin'ze fômba mafy miitsy reo ôlon-doza, ary avy akeo hampanofainy am'reo mpamboly vôloboka hafa ny tanim-bôloboka, ôla hagnome an'azy ny anjara voliny amin'ny fotôm-pavokarana." ⁴² Jesosy nitare tamin-jareo hoe: Tsy mbola namaky ny soratra Masina miitsy ma anareo hoe: 'Ny vato nolavin'ny mpagnano tragno no natao vato fehizoro. Avy tamin'ny Tompo zany, ary mahagaga akeo amasontsika'? ⁴³ No zany lazaiko aminareo, alàna aminareo ny fanjakan'Andriamnitra ary hamena ny firenena ze mamokatra reo vôny. ⁴⁴ Na iza na aiza ho lavon'io vato io de ho potipotika. Fa ze hilatsany kosa de ho torotoro. ⁴⁵ Rafa nareigny reo fagnoharana reo ny leiben'ny mpisorogna sy ny reo Fariseo, de azon-jareo fa makasika an-jareo ny ra nikoragniny. ⁴⁶ Nikasa ny hisambotra an'Azy, saingy natatra ny vahôka zareo, satria nataon'ny ôla ho mpaminagny Izy.