¹ Lwe umwana wa Ng'onzi ayigula ishilemezanio isya vu 7, mumwanya mwamile myaa kuhavalilo pakasi pahavalilo. ² Pe nkenya avahavizya 7 ve vimiliye pantanzi pa Mulungu, namasaji 7 gapeliwe kuli vavo. ³ Ahinza uhavizya uwamwavo, alemile munyove uluviga lwa sahabu ulwa vyakusushizya, ahimilila kushifinjilo isha kusushizya. Vihapeliwa ivyakusushizya ivyinji kuliwuyo ukuti avasanganie poka nimputo zya vantu avafinjile vonti ava Mulungu pashifinjilo sha golide ishakusushizya pantanzi pa shitengo sha vumwene. ⁴ Ilyosi ilya vya kusushizya- lihazuva poka nimputo izya vafinjile- ukufuma munyove izya vahavizya we ali pilongolela ilya Mulungu. ⁵ Uhavizya ahasenda uluviga ulwa vakusushizya ahalwizuzya lwenelo nu moto ukufuma kushifinjilo. ahalutaga lwenelo pansi, pe ukupulana ukwa kung'anta, nukung'anta, nutumesya, nivizumanzi. ⁶ Avahavizya 7 vevali namasaji 7 vahasengania ukuhoma genego. ⁷ Uhavizya uwavwandilo ahahoma isaji lyakwe, pe kwamile imvula iya mavwe nu moto we asangine namavanda. Pe ivyene vihasumbwa pansi pe nishigavo shakwe isha vutatu shihapya, isha vutatu isha makwi shihapya, nalyonti isole ivisi lihapya. ⁸ Uhavizya wa vuvili ahahoma isaji lyakwe, pe shimo shali ngati ligamba ipiti lihapyanga nu moto shihatajilwa mwa sumbi. ⁹ Ishigavo sha vutatu isha sumbi shihagalunkana ukuva mavanda. ishigavo isha vutatu kuvipeliwa vwa mwa sumbi vihafwa, nishigavo shoka pa vitatu isha meli shihananjiha. ¹⁰ Uhavizya wavutatu ahahoma isaji lyakwe, pe uluzota ulupiti luhagwa ukufuma kumwanya, luhahaga ngati wu tochi, kushigava shoka pa vitatu ivya majenje nividuda vya minzi. ¹¹ Izina ilya luzota- lusonsi lwa mwikwi. Ishigava shoka ku vitatu ivya minzi vihagalunkana lusonsi lwa mwikwi, pe avantu avinji vahafwa ukufuma kuminzi ge gahavavaga. ¹² Uhavizya uwa vu 4 ahahoma isajilyakwe, pe ishigavo shoka pa vitatu ishizuva shihahomwa, vunuvo nishigava shoka pavitatu isha mwezi ni shigava shoka pavitatu isha nzota. Ni shigava shoka pavitatu shihagalunkana ukuva shisi, nishigava shoka pavitatu ishavusiku nishigava shoka pavitatu isha musanya vitamile nu luhozyo. ¹³ Nkenya, pe nkivwa izwi ipiti ilyi zwanga lye likubuluha pakasi pamwanya likuholela likuti; ye mayiwe, ye mayiwe, kuvonti ve vakwihala munsi shifukwa sha kupoma kwi saji lye lisyalishiye lye avahavizya vatatu vakuvala pakuhoma.''