¹ Lwe zyapitilila zinizi nkenya avahavizya 4 vimiliye pa nguto 4 izya nsi, valemile nkani kwisinda kumpepo 4 izya nsi ukuti kutahavanje impepo nayimo iya kuputa pansi, pa sumbi, pamu kuvushila ikwi limo. ² Nkenya uhavizya uwunji akuzuva kufuma kuvutukulo, we alemile ishilemezanio sha Mulungu umulanzi. Ahakuta nizwi nipiti ku vahavizya 4 ve vapelilwe amaha ga kunangania insi nu sumbi: ³ ''Mutahananje insi, usumbi, pamu amakwi mpaka pe twaviha ishilemezanio pa vyeni vya vavomvi va Mulungu wiyu.'' ⁴ Nkivwa imbazyo zya vala avalemezanye: 144,000, ve vali valemezanye kufuma munduho zyonti izya vantu va Yisilayeli: ⁵ 12,000 kufuma kuluho lwa Yuda vali valemezanye, 12,000 kufuma kuluho lwa Lubeni, 12,000 kufuma kuluho lwa Gadi, ⁶ 12,000 kufuma kuluho lwa Asheli, 12,000 kufuma kuluho lwa Nafutali, 12,000 kufuma kuluho lwa Manasi, ⁷ 12, 000 kufuma kuluho lwa Simiyoni, 12, 000 kufuma kuluho lwa Levi, 12,000 kufuma kuluho lwa Yisashali, ⁸ 12,000 kufuma kuluho lwa Zebuloni, 12,000 kufuma kuluho lwa Yosefu, na 12,000 kufuma kuluho lwa benjamini vali valemezanye. ⁹ Lwe zyapitilia zinizi nkenya, havili kwamile impuga impiti ye nawumo angavazya- kufuma munsi yonti, inkolo, avantu, ni njango- vimiliye pantanzi pa shitengo shavumwene na pantanzi pa hang'onzi. vazwaye inkanzu inzelu havili valemile insamba zya makwi munyove zyavo, (ivikambalala), ¹⁰ havili vahitizyaga kwizwi ipiti; i ''Uvuposhi vwe vwa we Mulungu witu, we atendime pashitengo shavumwene, na ku hang'onzi!'' ¹¹ Vonti avahavizya vimiliye ukuzyungulila ishitengo shavumwene havili ukuzyungulila avasongo nivipelwa vyavulanzi 4, havili vahawisyaga ivyeni vyavo kuntanzi kushitengo shavumwene. Vasugamila kwa Mulungu, ¹² Vahati, ''Ameni! ulutimo, uvumwamu, injele, insalifyo, ulushindiho, amaha namaha gavanje kwa Mulungu witu shima na shima! amene!'' ¹³ Pe woka muvaongo ahambuzilizya ine, ''Ve vawenu vanava, ve vazwaye inkanzu inzelu, havili vafumile kwiyi?'' ¹⁴ Nkati kuwuyo, ''Mushindikwa, umanyile wenewe,'' havili ahati kukwane, ''Iva ve vala ve vafumile muvuhamantanilwa uvupiti. Vachafile inkanzu zyavo havili vazigomvile nzelu mwivanda lya hang'onzi. ¹⁵ Pa shifukwa shinishi, vali pantanzi pa shitengo shavumwene isha Mulungu. Havili vakumuputa uwene umusanya nu vusiku mwitempeli lyakwe. wula we ayihaye pashitengo shavumwene alizungulila ihema lyakwe pavavo. ¹⁶ Vataliva ninzala havili, pope nukuva nishinyoto havili. izuva litalivahoma pansi pa vene, pope ukupya kwa hasnya honti. ¹⁷ She ahang'onzi ahapakasi pa shitengo shavumwene hali vadima avene, havili minzi ga vulanzi, pe uMulungu aslivasyumula insozi lyonti kufuma mumino gavo.''