¹ bLwe zyashila zinizi nkenyelezya, pe nkenya ishilyango ishigule kumwanya. Izwi itanzi lye nkivwa lihayangaga ku kwane ngati nsaji, likuti, ''Zuva uku, pe kwe nkulanjizyaje iwe zye kwe zivombwaje inga zyashila zinizi.'' ² Panapa na panapa nkava mumupepo, pe nkenya kula ishitengo shavumwene vashivisile kumwanya, shili nawumo atendime papo. ³ Woka we atendime papo ahavonehaga ngati yasipa ni salidyoni. Pamile umupingo pingo wazyunguliye ishitengo shavumwene. Umupingopingo wuhavonehaga ngati simalakiti. ⁴ Kuzyungulila ishitengonshavumwened kwamile ivitengo vyavumwene 24, na ve vatendime pa vitengo vya vumwene vamile avasongo 24, vazyaye ivizwalo ivizelu, impumpu inzelu ivya golide kumatwe gavo. ⁵ Kufuma kushitengo shavumwene kuhinza ukunyafuha kwa tumesya, kuvuvula ukujilima ukwa mvula. Inyale zye ziholeleye 7 zihahaga pantanzi pa shitengo sha vumwene, inyale zye zyamile mpepo 7 izya Mulungu. ⁶ Pantanzi pashitengo shavumwene pamile usumbi wa iloli, aholine ni Kilisitali. pakasi pashitengo sha vumwene mwasmile ivipeliwa ivya vuanzi 4, vyonti vyamile naminso konti na konti kuntanzi na kwisinda. ⁷ Ishavwandilo ishipeliwa sha vulanzi shaholine ni Nsama, isha vuvili ishipeliwa isha vulanzi shaholine ningwada, ishavutatu ishipeliwa sha vulanzi shali nisheni ngati sha muntu, nisha 4 isha vulanzi shaholine nizwanga lye likubuluha. ⁸ Ivipeliwa ivya vulanzi 4 shonti shali nivyapa 6, vyizuye aminso pamwanya na muntende. Uvusiku nu musanya vitahalehaga ukuyanga, ''Mufinjile, mufinjile wu Mwene uMulungu umwene maha gonti, we alipo, na alipo, na we aliyinza.'' ⁹ Inga pe ivipeliwa vya vulanzi vikupa uvushindamu, ulushindiho, nu ksalifya ku woka we atendime pashitengo sha vumwene, woka we alipo shima na shima, ¹⁰ avasongo 24 vakugwa pansi pantanzi pa woka we ayihaye pa shitengo sha vumwene nu kumuputa uwene we alipo shima nashima. Vikutenga impumpu zyavo pantanzi pa shitengo sha vumwene, nukuti, ¹¹ ''Uhondeye iwe, Mwene witu havili Mulungu witu, ukuposhela uvushindamu nu mushinzi namaha, she uhapela vyonti ivintu, nukuyanga kwaho vyalipo na vyapeziwe.''