¹ Ishi pe nkenya kumwanya impya havili ninsi impya, she iyavwandilo kumwanya havili iyavwandilo insi yefile, nu sumbi atalipo. ² Ine nkayenya inkaya imfinjile, uYelusalemu umupya, we ahiha kufuma kumwanya kwa Mulungu, ayaniwe ngati wu navwinga akulindilila umulume wakwe. ³ Nkivwa izwi ipiti kufuma ku shitengo shavumwene ukuti, ''Yenya! Uvuzilo vwa kutendama uvwa Mulungu muli avantu, havili alitendama navo. Valiva vantu vakwe, pe nu Mulungu umwenesho alivanavo, havili aliva wu Mulungu wavo. ⁴ Alisyumula lyonti insozi mu minso gavo, pe kutaliva havili imfwa, amo ukuswilimana, pamo ukulila, pamo uvuvavu. She ivintu vyahali vyefie. ⁵ Uno we atendime pashitengo sha vumwene ahayanga, ''Yenya! Nagomba ivintu vyonti vyava vipya.'' Ahayanga, ''Usimbe zinizi mulandu amazwi aga masuvalilwa havili ganalyoli.'' ⁶ Ahayanga kuline, ''Ivintu ivi vyavombwa! Ine ne Alufa havili ne Omega, Ne wavwandilo havili Ne vumalilo. Kuwe alininyota indimupa isha kung'wela ishisita kulipila kufuma mushifula sha minzi gavulanzi. ⁷ Uno we akupota alipyana ivintu vinivi, ine indiva ne Mulungu wakwe, pe aliva mwana wane. ⁸ Nkandi kuve vali nilyoga, avasita lwitiho, avahandamanu avagozi, avaluvembu, avalozu, avaputa malungu havili avaluma ilenga vonti, uvuzilo vwavo vuliva mwe mwa sumbi wa moto wa vibiliti. Iyo ye imfwa ya vuvili.'' ⁹ Woka pa vahavizya 7 ahinza kuline, uno we amile ni mbiga 7 zye zyizuye amasunde agavumalilo 7, pe ahayasnga, ''Nzaga uku ndikulanjizya unavwinga, umushi wa mwana wa Ng'onzi.'' ¹⁰ Ishi pe ahasenda ine mumupepo kuvala kwigamba ipiti havili itali nu kundanjizya ine inaya imfinjile iya Yelusalemu ye yikwiha kufuma kumwanya kwa Mulungu. ¹¹ U Yelusaleu amile nu vushindamu vwa Mulungu, havili ukulama kwakwe ali ngati shibangili sha pamwanya nkani, ngati livwe lya kilisitali- uyasipi umwenesho. ¹² Yamile nu lupiti, ulutali ulwa vilyango 12, navahavizya vamile 12 pa vilyango. Pa vilyango pasimvilwe amazina ga nduho 12 izya vana ava Yisilayeli. ¹³ Kuvutukulo kwamile vitatu ivilyango, kuluvazu ulwa kunyove ya ndilo kwamile ivilyango vitatu, kunyove ya mongo kwamile ivilyango vitatu havili kuvuswelo kwamile ivilyango vitatu. ¹⁴ Uluvumba lwa nkaya yamile ninyalilo 12 havili pamile amazina 12 aga vapositili 12 ava mwana wa Ng'onzi. ¹⁵ Uno we ahayanga nine amile nululisa lwakupimila lwe lwagomvilwe nu golodi ukuti vapimile inkaya, ivilyango vyakwe, nu luvumba lwakwe. ¹⁶ Inkaya yazenzilwe ni nkuto zya kulingana; uvutali vwakwe vwalinginenu vupiti vwakwe. ahapima inkaya nululisa lwa kupimila, 12,000 intambwi muvutali (uvutali vwakwe, uvupiti, nu kwimilila kwakwe mumwanya kwalingine). ¹⁷ Ahapima vulo nuluvumba, 144 amahono, uvupiti ngati muntu (shilingine vulo nuhavizya muhapimile). ¹⁸ Uluvumba vazenjeye uyazipa havili iyene inkaya vazenjeye u golodi umusita kusangania ngati magalasi amazelu. ¹⁹ Ulwalo lwa luvumba vazenjeye ivwe umuhola wonti we wapamwanya. Ilya vwandilo lyamile lyazipa, iya vuvili lyamile u safaya, ilya vutatu lyamile u agati, ilya 4 lyamile wu Emelodi, ²⁰ ilya 5 lyamile wu Onekise, ilya 6 lyamile wu Kanalani, ilya 7 lyamile wu Kesoliti, ilya 8 lyamile wu Bele, ilya 9 lyamile wu Topazi, ilya 10 lyamile wu Amatesiti. ²¹ Ivilyango 12 vwali vwambo 12; ishilyango shonti vagombeye ahavwambo hoka. Utudala twa mu nkaya twamile nu golodi umusita kusangania, ngati magalasi ge gakulangalila. ²² Ntahenya nalimo itempeli munkaya she umwene uMulungu wamaha nu mwana wa Ng'onzi veve matempeli gavo. ²³ Inkaya yitahanzaga izuva pamo umwezi ukuti vye viyilamilaje mulandu uvushindamu vwa Mulungu vuhalamilaga, havili inyale yakwe we mwana wa Ng'onzi. ²⁴ Insi zilijendaga muluhozyo lwa nkaya yila. ava mwene va munsi iya pansi valileta uvushindamu vwavo mumwo. ²⁵ Ivilyango vyakwe vitaliyigalilwa pamusanya, havili kutaliva uvusiko kuko. ²⁶ Valileta uvushindamu havili umushinzi wansi mumwo. ²⁷ Nkandi nashimo ishinyazu she shilitela shinjiye mumo, pope wumo we akuvomba ivihandamanu pamo akuhopeha, nkandi veka vala ve amazina gavo ga simvilwe mwa kalata wa mwana wa Ng'onzi uwa vulanzi.