¹ Pe uhaviya ahandajizya ine ijenje ilya minzi aga vulanzi, gali mpee ngati wu kalisitali. Ilyene lihihaga ukufuma ku shitengo isha vamwene vwa Mulungu na kumwana uwa Ng'onzi. ² Ukudumunsania pakasi pahadala ahamunkaya. Uluvazu lonti ulwinjele lwamile nikwi lya vulanzi, luhahomaga ahavele 12 ava vihomwa, pe lihahomaga ivihomwa umwezi wuli wonti. Amatundu agikwi gakupozezya insi. ³ Kutaliva havili ulutipo nalumo. Ishitengo sha vumwene isha Mulungu nisha mwana wa Ng'ozi shiliva munkaya, na kuvavomvi vakwe valimuvombela wuyo. ⁴ Valishela isheni shakwe, nizina lyakwe lilkiva pa vyeni vyavo. ⁵ Kutaliva havili uvusiku; vataliyanza uvuzelu vwa nyale pamo ukulama kwizuva shifukwa umwene uMulungu walilama pali vavo. valiva valamulili shima na shima. ⁶ Uhavizya ahambuzya ahati, ''amazwi aga masuvalilwa havili ganalyoli. Umwene, uMulungu wa mupepo wa vakuvwi vakwe, ahatuma uhavizya wakwe akuvalanjizya avavomvi vakwe zye zihondeye ukuvombwa shinishi.'' ⁷ ''Yenya kwinza shinishi! Mulotwa uno wenga akugasajila amazwi ga mukivwi mwa kalata wununo. ⁸ ''Ine, Yohani, ne wumo ne nivuye nukuvwenya ivintu vinivi. Lwe nivuye nukuzyenya zyenezyo, nkasugamila pansi nkaputa pa vinama vya havizya we andajizizye ine ivintu vinivi. ⁹ Ahayanga kuline, ''Utavombaje izyo! ine ne muvomvi wamwinyu poka niwe, poka navamwinyu avakuvwi, navonti ve vakuyimvilwa amazwi ga mwakalata wununo. Musugamile uMulungu.'' ¹⁰ Pe ahayanga, ''Utahamatilile amazwi ga vukuvwi aga mwa kalata uno she ahavalilizyo hapalamiye. ¹¹ Umusita vugolosu, muleshe ajendelele ukuvomba uvusita vugolosu. Umuhandamanu, muleshe uwene ajendelele ukuvomba uvuhandamanu. Uno wenga mugolosu, muleshe ajendelele ukuvomba zye ngolosu. Uno we mufinjile muleshe ajendelele ukuva mufinjile.'' ¹² ''Yenya! nkwinza shinishi. Amalipilo gane gali nine, aga kumulipa wonti ukulingana nimbombo zyakwe. ¹³ Ne Alufa ne Omega, Ne wakwanda Ne vumalilo Ne wavwandilo Ne wavumalilo. ¹⁴ Valositwe vala ve vakuchapa inkanzu zyavo ukuti ve valiva nu lusaho ukulya ukufuma kwikwi lya vulanzi nu kwinjila munkaya ukujendela pa shilyango. ¹⁵ Kunzi kuli imbwa, avalozi, avaluvembu, avagozi, nave vakuputa amalungu, nali wonti we aganile nukuvombela ilenga. ¹⁶ Ine, Yesu, ne mutumile uhavizya wane nkuvasimishizya imwe akuyana nivintu vinivi kuvivanza. Ine ne ligululuzi ne luho lwa davidi, ukulama kwa luzota lwa nzanchi.'' ¹⁷ Umupepo nu navwinga vakuti, ''Nzaji!'' leha uno we akwivwa akuti, ''Nzaji!'' Wonti wenga ali ninyota leha uwene ayinze, nawonti wenga akunyonywa genego muleshe uwene agaje muvusatushe ukuva nago aminzi amapela vulanzi. ¹⁸ Nkumusimishizya umuntu wonti wenga akwivwa amazwi aga vukuvwi mwa kalata uno: Inga wumo akonjelezya kugago uMulungu aliyonjelezya kuli wuyo intipo zye zisimvilwe mwa kalata uno. ¹⁹ Inga wumo akwefya mu mazwi ga mwa kalatauno uwa vukuvwi, uMulungu aliyefya ishigavo shakwe ishikwi lya vulanzi na munkaya ifinjile zye simvilwe ukuyana mwa kalata uno. ²⁰ woka we ahasimishizya ku vintu vinivi akuti, ''Mwemumo! Nkwinza shinishi. ''Ameni! ²¹ Nzaga, Mwene Yesu! Uvwila vwa Mwene uYesu vuvalaje nimwe mwenti. Ameni