¹ Lwe zijenzite zinizi ine nkivwa she shalizile ngati lizwi ipiti ilya mbazyo impiti iya vantu kumwnya likuholela, ''Aleluya. Uvuposhi, uvushindamu, namaha ge ga Mulungu witu. ² Uvulonzi vwakwe vwanalyoli havili vugolosu, she umwene amulonzileumuvembu umupiti nkani we ayihopesileinsi nuluvembu lwakwe. Uwene ahatanizya ivanda ilya vavomvi vakwe ukufuma munyove iya muvembu.'' ³ Avene vayanzile ilya vuvivi: ''Aleluya! Ilyosi lihazuva ukufuma ku kwakwe shima na shima.'' ⁴ Avasongo 24 nivipelwa 4 ivya vulanzi vihakupama pansi nukumuputa uMulungu, ve vatendime pa shitengo ishavumwene. Avene vahatinji, ''ameni. Aleluya!'' ⁵ Pe izwi lyinzile ukufuma ku shitengo ishavumwene, lihati, ''Ashindikwaje uMulungu witu, imwe mwenti mwe vavomvi vakwe, imwe mwe mukumunyila uwene, vonti avasulwa na vamaha.'' ⁶ Pe ine nkivwa she shalizile ngati lizwi ilya mbazyo impiti nkani iya vantu, ngati kupoma ukwa minzi aminji, havilu ngati kuzuma ukwa kukuntana ukwa ukwakujilima, likuti, ''Aleluya! she umwene akulongozya, uMulungu witu, uwa maha gonti. ⁷ Nzaji iswe tudovele nukuseshela nukumupa uwene uvushindamu! She uvwinga nukuseshela ukupiti ukwa mwana wa Ng'onzi kwinzile ayisenginie wuyo umwenesho. ⁸ Uwene vamwitishizye ukuzwala ivyakunying'inyila havili vye vizelufile nukupepuha ukwa mwenda umugomu.'' (she ukupepuha ukwa mwenda umugomu zye mbombo ingolosu izya vantu avafinjile ava Mulungu). ⁹ Uhavizya ahayanga kuline, ''Usimbe ishi: Valositwe vala ve visitwe ku luseshelo ulwa vwinga uvwa mwana wa Ng'onzi. ''ahayanga havili kuline, ''Aga mazwi aga nalyoli aga Mulungu.'' ¹⁰ Pe nkakupama pansi pa vinama vyakwe ukumuputa wuyo, nkandi uwene ahayanga kuline, ''Utahavombe ishi! Ine ne muvomvi uwamwinyu poka niwe na vamwinyu ve vakulema insimishizyo ukuyana nizya Yesu. Mupute uMulungu, she ulusimishizyo ukuyana nizya Yesu lwa mupepo uwa vukuvwi.'' ¹¹ Pe ine nkenya kumwanya kwigusile, havili nkenyelezya kula kwali imfalasi inzeli. Nuno we akweleye papo akwitwa musuvalilwa havili wanalyoli. Ishi shili nuvugolosu ukuti uwene akulongaga nakwe kulwa uvulugu. ¹² Aminso gakwe gali ngati moto we akwaha umwakogofya, na pitwe lyakwe pali impumpu inyinji. Uwene ali nizina lye lisimvilwe panwuyo lye nawumo we alimanyile nkandi wuyo weka. ¹³ Akuzyalaga inkanzu ye vayidwivizye mu mavanda,nizina lyakwe likwitwa lizwi ilya Mulungu. ¹⁴ Avalwa vulugu avakumwanya vahamulandata uwene pa mfalasi inzelu, vazwaye amenda amagomu gega pepusile, amazelu havili mpee. ¹⁵ Ukufuma mwilomo lyakwe mukujenda upanga umuhozu konti we akuzigwisizya pansi insi zyonti, havili uwene alivalajila avene nindisa iya shijela. Uwene akuhanya mu shakufinyila ipele isha masepe isha vulanzi uvwa Mulungu uwa maha gonti. ¹⁶ Uwene ali nizina lisimvilwe pa nkanzu yakwe na palupamba lwakwe: ''Umwene uwa vaMwene havili Umupiti uwa Vapiti.'' ¹⁷ Ine namuvonyi uhavizya ayimiliye mwizuva. Uwene ahitizya kwizwi ipiti ku viyuni vyonti vye vikubuluha mu mwanya, ¹⁸ ''Nzaga, vungani poka kuluseshelo ulupiti nkani ilwa Mulungu. Nzaga mulye amavili aga va mwene, na mavili aga vapiti ava vasikali, na mavili aga vantu ava maha, namavili aga mfalasi na ve vakukwela papo, namavili aga vantu vonti, vonti avasatushe navazya, avasulwa na vamaha.'' ¹⁹ Ine nashivonyi ishinyamana na vamwene ava munsi vali navalwa vulugu vavo. Avene vahavunganaga ukuyisengania ukulwa uvulugu na wula we ahajenzyaga imfalasi poka navalwa vulugu vakwe. ²⁰ Ishinyamana shalemilwe poka na wuyo umukumvi uwilenga we ahapelaga ivivonesyoi paminso gakwe. Mwe muvivonesyo vinivi uwene ahavahopeha vala ve vaposheleye ishimanyilo isha shinyamana na ve vahashiputaga ishiholanio shakwe. Vavili vanava vasumbilwe avapma mwasumbi yeyikogofya yeyikwaha ni vibiliti. ²¹ Vonti ve vala vavagozile ukujendela kwa panga umuhozu konti we ahafumaga mwilomo ilya wula we akweleye pa mfalasi. Iviyuni vyonti vyaliye amavili gavo amafwe.