¹ Pe nkenya ishinyamana shikufuma mwa sumbi. Shamile nimpembe 10 namatwe 7. Mumpembe zyakwe mwamile impumpu 10, havili itwe lyonti lyamile nizina lya musamu. ² Ishinyamana shinishi she nashenyizye shaholine nunzyela. Ivinama vyakwe vyakwe vyaholine nivinama vya shivuli, havili ilomo lyakwe lyaholine nilomo lya nsama. Pe injoha impiti yihashipa amaha gakwe, ishitengo shakwe isha vumwene nu vulamulili vwakwe uvupiti uvwakulajila. ³ Lyoka mumatwe gashinyamana lyamile nishilonda shavudibe, nkandi ishilonda sha vudibe shapozile. Insi yonti yasukumiye lwe vakushilandata ishinyamana. ⁴ Vope vahayiputa injoha impiti, ye yashipiye ishinyamana uvulamulili vwakwe. Vahashiputa ishinyamana, shope, havili shapitiliye ukuyanga, ''Wunanu we aholine nishinyamana?'' Havili ''Wunanu angalwa nasho?'' ⁵ Ishinyamana shapelilwe ilomo lye lihayangaga amazwi gamabado na gamusamu. Vashitishizizye ukuyezya ukuvomba uvulamulili ku mezi 42. ⁶ Pe ishinyamana shihigula ilomu lyakwe ukuyanga izya kumusamula uMulungu, kusamula izina lyakwe nihema lyakwe, vala ve vakwihala kumwanya. ⁷ Ishinyamana vashitishizizye ukulwa uvulugu na vantu va Mulungu avafinjile nukuvapota venevo. Havili, uvulamulili vwapeliwe kushene kuzyonti inkolo, avantu, injango, ninsi. ⁸ Vonti ve vakwihala munsi valishiputa ishene, uno wonti we izina lyakwe litasimvilwe mwikalata uwa vulanzi, we waha Ng'onzi he havolilwe kufuma kwe kuvwando vwansi. ⁹ Inga wumo we ali nikutwi, we ayivwe. ¹⁰ Inga wumo vakumunyatula muvukungwa, mwe muvukungwa uwene alijrndela. Inga wumo vali mugoga nupanga, nupanga wope aligogwa. Ulu lwe lwito kuvakujimba avatehamu nu lwitiho lwa vantu va Mulungu avafinjile. ¹¹ Pe nkenya ishinyamana shikufuma munsi. Shamili nimpembe zivili ngati ha Ng'onzi havili shikuyanga ngati njoha impiti. ¹² Shihavomba uvulamulili vonti uvwa ishinyamana ishavwandilo paminso gakwe, pe shihagomba insi navala ve vihaye mumo ukuputa ishinyamana ishavwandilo- shila she ishilonda shavudibe shipozile. ¹³ Shihavomba ivisukumizyo ivya maha. Shihagomba nu moto wukwiha pansi kufuma kumwanya pantanzi pa vantu. ¹⁴ Muvimanyisizyo shapelilwe amaha ukushimilila ishinyamana, shihavahopeha vamo ve vahihalaga munsi, ukuvavuzya avene akuti vavihaje shimo ishifwani sha shinyamana- she shavulaye nupanga, loli shashili shilanzi. ¹⁵ Vashitishizizye ukushipa umoji ishifwani sha shinyamana ukuti ishifwani shingayanga nukuvapelela vonti ve vakuhana ukuputa ishinyamana ukuti vagogwaje. ¹⁶ Havili shihavavijilizya vonti, avasulwa na vamaha, avadumbwe na vapina, avasatushe na vazya, ukuposhela ishimanyilo pa nyove indilo pamo pa sheni. ¹⁷ Shali shigomu ku wonti wula ukukala pamo ukukazya peka peka alini shimanyilo isha shinyamana, she, mbazyo yeyikwimilila izina lyakwe. ¹⁸ Ishi shikwitwa injele. Inga aliko we akuzyagania, pe uwene avelenjelaje imbazyo iya shinyamana. she mbazyo iya muntu. Imbazyo yakwe wu 666.