¹ Ishilanjizyo ishipiti shihaloleha kumwanya: umwantanda ahazwala izuva, numwezi kuntende kuvinama havili nimpupu ya nzota 12 yali pitwe lyakwe. ² Amile nulwanda, havili ahakutaga kuvuvavu vwa kupapa mu mayimba ga kupapwa umwana. ³ Ilelo ishilanjizyo ishamwavo shihaloleha mu mwanya: yenya! Kwamile ishinjoha ishipiti ishishemamu she shamile namatwe 7 nimpembe 10, pe mwamile impumpu 7 mumatwe gakwe. ⁴ Ulusinda lwakwe luhapyelaga inzota mumwanya mushigavo shoka pa vitatu nukuzigwisya munsi ya pansi.Ishinjoha shihimilila pantanzi pa mwantanda we apalamiye kupapa, ukuti lwe apapa shimilule umwana wakwe. ⁵ Pe ahapapa umulumendo, umwana, umwana umwanavuli, we alilongozya insi zyonti nindisa ya shijela. Umwana wakwe ahasompolwa kwa Mulunguna kushitengo shakwe ishavumwene, ⁶ pe umwantanda ahashimbilila mulugwa, kwe uMulungu asenginie uvuyo vwakwe ukuti asunjililwe kumasiku 1,260. ⁷ Ishi pe kwamile uvulugu kumwanya. U Mikayeli na vahavizya vakwe vahalwa nishinjoha, pe ishinjoha navahavizya vakwe vope vahagalusyaga uvulugu. ⁸ Nkandi ishinjoha shitamile nago amaha ukupota uvulugu. Pe vutalipo kumwanya ukwene uvuyo vwakwe navahavizya vakwe. ⁹ Ishinjoha ishipiti ye njoha ya hali yikwitwa setano, we akuhopeha insi yonti- ahasumbilw munsi ya pansi poka nawo. ¹⁰ Ishi pe nkivwa izwi ipiti mu mwanya: ''Ishi nkwinza ukupokwa namaha havili ishinamwene sha Mulungu witunu vulamulili vwa Chilisiti wakwe.She uwakuvalonjelela avamwitu asumvilwe pansi, wuyo we ahavalonjelelaga venevo kwa Mulungu witu umusanya nuvusiku. ¹¹ Vahamupota wenewo ukujendela mwivanda lya Ng'onzi na mazwi ga nsimishizyo zyavo, she vataganile uvulanzi vwavo napala kuli imfwa. ¹² Ilelo seshelaji, iwe imwanya navonti ve vakwihala mu mwavo! Nkandi ahele kunsi ya pansi namwa sumbi, mulandu usetano ayiha pansi kulimwe! Ayizuye nuvuhali uvwa kogofya mulandu azimanyile ukuti ali nahavalilo ahansi! ¹³ Lwe ishinjoha shazimanya ukuti shasumbilwa munsi ya pansi, shihamuvwima umwandanda we apafile umwana umwanavuli. ¹⁴ Nkandi umwantanda vahamupa ivyapa vyivimba ukuti ashimbile ukuvala kuvuyo vwe vahasengania uvwakwe mulugwa. Uvu vwe vuyo angalelwa, ku havalilo, utuvalilo, na mukasi muhavalilo- ukwepa pe yali injoha. ¹⁵ Injoha, yihita aminzi kufuma mwilomo lyakwe ngati lijenje ukuti agombe lyizule pe limujenzye. ¹⁶ Nkandi insi yihamwavwa umwantanda. Insi yihigula ilomo lyakwa nukumilula ijenje lye ishinjoha shihita kufuma mwilomo lyakwe. ¹⁷ Ishi pe ishinjoha shihavitwa nawo umwantanda nukujenda ukulwa uvulugu ni mpapwa yakwe yonti, vala ve vakwivwila inkomelezyo zya Yesu. ¹⁸ Ishi pe ishinjoha shihimilila pa lusenga lwa muluvazu mwa sumbi.