¹ Nkenya nukwenya umwana wa Ng'onzi ayimiliye pigamba ilya Ziyoni. Poka navo vamile 144,000 ve vamile namazina gavo pe nizina lya Tata wavo lyasimbiwe pa vyeni vwavo. ² Nkivwa izwi ukufuma kumwanya likulila ngati kuvuluma kwa minzi aminji nu kuzilimisya ukupiti. Nukulila kwe nkivya kope kwali ngati mulizya lipango akulizya amalipango gavo. ³ Vahimba ulwimbo ulupya pantanzi pashitengo sha vumwene na pantanzi pavipeliwa 4 ivilanzi na vasongo. Nanti wumo wenge ahamanyila ulwimbo veka vala 144,000 ve vakazilwe ukufuma munsi. ⁴ Vevano ve vatayihandaminie veka navantanda, she vayisunjile vavo veka ukuva vazelu. Vevano veka ve vakulandata aha Ng'onzi konti kwe hakuvala. Iva ve vaposilwe ukufuma pakasi pa vantu akuva vihomwa vya kwanda kwa Mulungu na kuha Ng'onzi. ⁵ Nanti limo ilenga lye lihajikwa mwilomo lyavo; she vasimazota. ⁶ Nkenya uhavizya uwunji akubuluha pakasi pamwanya, we amali ninongwa izya shima nashimapa kulumbilila kuvala ve vakwihala munsi- kunsi zyonti, inkolo, ninjango, na vantu. ⁷ Ahitizya nizwi ipiti, ''Munyile uMulungu nukumupa uvushindamu. She ahavalilo hakwe ahavulonzi hinzile. Mumusugamilile wuyo, uno we ahapela kumwanya, napansi, nusumbi, nivifula vya minzi.'' ⁸ Uwamwavo uhavizya- nuhavizya uwavuvili- ahalandata, ahayanga, ''agwa, agwa u Babeli umupiti, we ahavapatishizyaga insi yonti pakung'wela ipelelyakwe ilya luvembu lwe likuvava.'' ⁹ Uwamwavo uhavizya- uhavizya uwa vutatu- ahavalandata venevo, akuyanga nizwi ilyakukwezya, ''Inga wumo akushiputa ishinyamana ni shifwani shakwe nu kuposhela ishimanyilo pantanzi pa sheni shakwe pamo panyove. ¹⁰ We wope aling'wela ipele lyavuhalazu vwa Mulung, ipele lye lyitilwe shisita kusungulusya mushikombe ishavuhalazu vwakwe. Umuntu we akung'wela we aliyimviwa mu moto nivibiliti pantanzi ve vahavizya va Mulungu umufinjile napantanzi pa Hang'onzi. ¹² Ilyosi kufuma kukuyimviwa kwavo ukuvala kumwanya shima nashima, pe vatali nukutuzya umusanya nuvusiku- iva avahaputa vashinyamana nishifwani shakwe, navonti ve akuposhela ishimanyilo ishizina lyakwe. ¹¹ Ipa pe pali ukwitizya ukwa ve vapole nukunjimbilila ukwa vantu va Mulungu avafinjile, vala ve vkusunga inkomelezyo zya Mulungu nulwitiho lyavo mwa Yesu.'' ¹³ Pe nkivwa izwi kufukwa kumwanya ukuti, ''Simba ishi: Vasayiha avafwe ve vakufwila mwa Mwene.'' ''Ena,'' akuyanga umupepo, ''Pakuti vatuzyaje ukufuma kumaligo gavo pakuti imbombo zyavo zilivalandata venevo.'' ¹⁴ Nkenya, pe kwamile ivingo izelu. We amihaye pivingo amile ngati mwana wa Muntu. Amale nimpumpu iya golide pitwe lyakwe nishakwakwa she shahozile munyove yakwe. ¹⁵ Pe uwavwavo uhavizya ahinza ukufuma mwa tempeli nukuholela izwi ipiti kuve amihaye pivingo: ''Senda ishikwakwa shaho yanda pakuvuna. Pakuti ahavalilo hakuvuna hinzile, pakuti inyinula yansi yitonile.'' ¹⁶ Pe wula we ahihalaga pivingo ahajenzya ishikwakwa munsi, pe ninsi yihavuniwa. ¹⁷ Uhavizya uwamwavo ahinza ukufuma mwa tempeli kwe kumwanya; wope amile nishikwakwa she shahozile. ¹⁸ Pope vulo uwamwavo uhavizya ahinza ukufuma pashifinjilo isha kususizya, we amile nuvulamulili pa moto. Ahitizya nizwi ipiti kuwula we amile nishikwakwa ishakuhola, ''Senda ishikwakwa shaho ishihozu navunganiha ivihomwa vya mapensya ivya munsi, pakuti apapensya gavo ishi gatonile.'' ¹⁹ Pe uhavizya ahajenzya ishikwakwa shakwe munsi nukuvuna ivihomwa vya mapensya aga munsi. Ahasumba vyenevyo mushakufinyila amapensya ishipiti isha vuhalazu vwa Mulungu. ²⁰ Pe amapensya gahafinyiwa munchelenjekunkaya kunzi. pe nivanda lihitishila kunzi ukufuma kushisho poka kushijengo sha mfalasi, pakuti uvutali vwali 1,600.