¹ Yug djwidjwi omifutumukagni olwong ti Kristu, lingagni vim a dzug olung, ondii omigneme Kristu ne wum ewuo e Nziam. ² Tsugagni ngindu ignu ne vim a dzug, epa ne vim a buu ve. ³ Djwi omiwagni, luzingu egnu wamiziy le dzug, ondii omog ti Kristu. ⁴ Ntangu eyayia Kristu, nde wur eli luzingu egnu, gnu ko ayayiagnu gna nde ne nkembo. ⁵ Yo yina, limagni ne djung ignu vii ankum apwo a buu ene, kesi akey to kindumba, vii a nsogn, nziya e vim a buu, mpuy e mviya entsign, enkum ene eli mfukumuna biteke. ⁶ Vii ankum ane atsambin wo nkier i Nziam. ⁷ Nteang alekienikignu ne mbug enagn ntangu eledjikignu vii a masumu. ⁸ Kansi opean, fangagni vii ane ankum : nkier, ngindu ipwo, ntwe vear, otuba opwo osikug mpwe n'odzum ognu. ⁹ Yadjimagni oyeang gnug na gnug ve, djwi omilimagni djung iyignu na wo nteang tii etshia ewo. ¹⁰ Omilweragni djung impa, djung elekum mpa ntangu enkum djwi na mazaya i kieleka ikug na ignignig i wur eyoki. ¹¹ Nendien, kaku mugreki, kaku muyuda, kaku wur emibag wo djung na etobag wo djung, kaku wur emitoma, kaku osegni ototomi, kaku wampika to ampfum, kaku ankum kansi Kristu ali vii ankum ye ali ne vii ankum. ¹² Yo yina, oshin olignu vear amison Nziam, olagni vear ande kibeni, aman ande aleangnde, lweragni itura i ndolula, itura iwuo, itura ingiy, itura inkea ngie ne nteang atwung, itura i ndjia nkwung. ¹³ Tshungagni itura mpe lolulagni gnug na gnug. Yug wur abokuta djwi n'ipwo imokie otwung, elomo otshungagni itura mpe ololulagni gnug na gnug oshin omog onagn ko Nkum amololulagni gnu. ¹⁴ Kansi ne dzug i vim ankum ane, tsugagni lutondo, ngagn. Djwi ngagn eli vim esokiragni gnug na gnug ondii omog. ¹⁵ Ngemba e Kristu eywi n'itura ignu. Eli djwi na ngemba enagn, Kristu s'oviagninde djwi oyiagni gnankum djung imog. Kearagninde nsag na viye. ¹⁶ Otuba o Kristu oywi n'itura ignu. Na wagn enkum, longagni mpe peagni ilag gnug na gnug ne mbug i wapisomi ti wankunga i mpeve. Shwagni ne kati itura ignu lim inkeara Nzeam nsag na viye. ¹⁷ Ye vim ankum akiegnu, eyi n'otuba to n'otshia, kiagni inkum ne dzin i Nkum Yezu. Ne mbug ende kearagni nsag na viye na Tea Nziam. ¹⁸ Ankear, lemfukagni gna awum agnu, oshin oleang Nkum Nzeam. ¹⁹ Ampaeam, leangagni avear agnu, ye oyayugagni wo nkier ve. ²⁰ Aman, lemfukagni gna bibuti ignu ne vii ankum, djwi enagn eli wuo ne nteang e Nkum. ²¹ Atea oyapeagni aman agnu nkier ve, djwi akwon ndem djung. ²² Ampfum, lemfukagni gna album agnu a buu ene ne vii ankum, epa ko ne viy awo ve oshin otsankie vear atsanding lokumu, kansi lemfukagni gna wo na itura i masonga. Yiagni na wom o Nkum. ²³ Vim enkum esikiegnu, kiagni wo n'etura emog, kesi okiagni Nkum, epa kesi okiagni vear a buu ve. ²⁴ Ojiagni gnugnun Nkum ayopeagninde ifuta to oleama-nzo. Eli Nkum Kristu esadilagnu. ²⁵ Wur enkum ekie ipwo ayaveande ndola djwi na ipwo ikii nde, ya Nziam kaku ontshey to okab o nseg ve.