¹ Nding ojiagni kibeni mbeagni e biuu nge elelwime djwi na gnu, djwi na vear a Laodise, ye djwi na vear ensign atonzen ntete na viy ve. ² Ndekii biuu djwi nsiamisi itura iwo djwi wayi n' oleang kati e wo n'etura emog, wakug ngya na wagn e djwidjwi e ndjia diswekamo disantu e Nzeam, eling ntuba Kristu. ³ Ne tii ende, kimvwama enkum e wagn ti e mazaya emizuba. ⁴ Ntuba ngwign djwi ekwon ngia na wur ata emog esiyia ondjimagni na otuba oyang. ⁵ Ata me nde etey na gnu n'osugn, kansi ne mulimo nde ma gnu. Nde na kiese ne ngien oshin omiwong gnu vii ankum ne ndwong ti biuu o lukwikilu egnu ya Kristu. ⁶ Oshin omijirgnu gnugnun Yezu Kristu ali Nkum, kienagni gna nde olwong omog. ⁷ Kangamagni na nde kesi oshung ne buu, tsugagni edjuu na itsin ya nde, pikamagni ne lukwikilu e djwidjwi oshin oyolongagniwo ye ntangu enkum peakagni Nzeam ntsag na viye. ⁸ Osugagni wur akayia ondjimagni n'otuba ontiegn avear, oshin olomo lisitwale e vear, oshin olomo vii a buu ene, kansi epa oshin olomo Kristu ve. ⁹ Djwi onen onkum o Nzeam n'osugn oli ne kati e Kristu. ¹⁰ Ye gnu olagni ngiywo na vim ankum ali na nde. Nde wur eli nkum e biuu inkum ti ikub inkum. ¹¹ Na nde obagagniwo mpi djung, kansi epa ngibag i djung na mbwo i vear ve, kansi mbag ngenga eyum na Kristu. ¹² Ne mbug e mbotika, opfugnagniwo gna Kristu olwong. Ye olwong gna nde, omifutumukagni n'ewa n'oshin oyikwikilugnu gnugnun biuu o Nzeam emofutumuka n'ewa. ¹³ Ye gnu, oshin oyiwignu djwi n'ipwo ignu ye djwi n'oshin okobagagniwo djung ve, amokearagni ne luzingu ti nde ye amiselolula n'ipwo inkum iyikisu. ¹⁴ Amibvwo enkeana eyisefugniki mpi eyiselogiki n'ewu, amilima wog mpi amikwog wo ne kulunsi. ¹⁵ Amilima biuu i wankum ti ikub. Amapur ne lien ti ne viy avear djwi na ngiegne oshin emanungande ne mbug e kulunsi ende. ¹⁶ Yo yina, oyajirakagni wur osambisagni ne vii alir vim a nda to a gnwa to djwi na eshuu okina to djwi na ngwon empa to mpi djwi na nshuu i obing. ¹⁷ Vim anagn ali kesi agnigning a vim afwetele ngia, kansi bukieleka e vii awo eli Kristu. ¹⁸ Kaku ata wur emog ve esikug onkumagni ifuta ignu, wur esodjimagni ndenden kakunde na lulendo to esokabagni ndenden asande nsambila banzio. Oshin omog na wur eyindula ko vii ayiyen nde ti elekum omwong djwi na mabanza inde i djwung. ¹⁹ Nde atokangami ve nda ote, nda Kristu eli ote odjung ye etsandey djung opfugn, ye mpi etsansangisa eshim na ekiy djwa djung inkum efwi oshin oleang Nzeam. ²¹ iku kesi avear atoseangi vii a buu ene ve : "oyavey ve, oyala ve, oyakir ve ?" ²² Vim anagn ankum, djwi vear walesadili wo, ali vim afwetele ngwa, oshin elomo nsiku mpe along a vear. ²³ Wansiku inagn imonana kesi along a wagni, along akwon lulendo mpe atum wur na mpea djung mpay. Kansi enkum enagn eli ko mpama, eli ko djwi na ndemfuka ti nsepelisa djung.