¹ Djwi na vear aletongi otshia olekime, ndavura ngean : Me nde ntumwa. Ayenme Yezu Kristu, Nkum esu. Nde na nswa e nkie otshia olekime. Gnu olagni peleve otshia oyikime - olagni otshia omikieme. ² Ata yug vear amuu wabansa wuwun epa nde ntumwa kieleka ve, nde ntumwa e kieleka djwi na gnu. Gnu, olagni peleve nde me nde ntumwa e kieleka djwi na tampo e luzolo e Nkum eli na gnu. ³ Asivurame ya vear aletubi wuwun epa nde ntumwa e kieleka ve n'oshin opilesadilime eker e gnu wandimi elempignu djwi n'otshia ome. ⁴ Yo yina, sili na ntina e nzinga n'eker enagn. ⁵ Sili kibeni na inswa e mveara okristu onkear etay elekien su, oshin olekii wantumwa imuu - kamesi akwom a Nkum esu ti Sefasi. ⁶ Kaku wur emog ve eyitsug nsiku ndenden ko me ti Barnabasi sifwete nkie otshia djwi sizingi n'eker esu semie. ⁷ Kaku wur etsawu mvey n'otshia iyer nkuu djwi ayi nzinga n'eker ende ndemie ve. Kaku wur esikug mfuy evur e vinu mbiy akwon nda mbuma to gnwa vinu iwo. Kaku wur emog ve etsangwunga ngwom to ameme biy akwon gnwa mabele iyum na gnam iwo. ⁸ Ene eli vii ajia mpe abansa wur enkum. Kansi onkwon ko otendula wo wuo. ⁹ Djwi nsiku i Moize ituba ngean : " Yug ngombe elefuy mbeam n'evur, oyotshung odzum ve djwi akwon nda vim ayum n'evur." Vii a nsiku inagn ilir Nzeam. ¹⁰ Nsiku enagn etuba djwi na su. Moize atuba ndenden wur enum ekie otshia afwete nzinga ko n'ikab iyum n'otshia owo. Eli kamesi ngombe ela mbuma ilefuynde. ¹¹ Yug afuysu le kati egnu mbuma i vii a Mpeve, eli epwo yug sifwete mvea eker eyum ya gnu kamesi lisalisi ? ¹² Yug vear amuu wamivea lisalisi eyum ya gnu, eli su vear anayia na nswa e mvea entsign kuluta wo. Kansi kaku vim emijirsu na mvey ya gnu ve, ata ayisu na nswa e mvey wo. Nkutu sileyen mpay eshin n'eshin, kansi situn mpay inagn ikafitshung mbug n'along awuo alir Kristu. ¹³ Ojiagni gnugnun vear atsansadisa na nkie makabu ya Nzeam n'evur e Nzeam atsawo mvea ndambu e vim a makabu djwi na luzingu ewo. Atsawo mvea ikab i vim emikabila wo Nzeam. ¹⁴ Oshin omog, Nzeam apinde nsiku ndenden vear ankum atsa ndong along a Nzeam wafwete mvea ifuta iwo ko n'along anagn. ¹⁵ nnnnnnnKansi me nkaling ata vim emog djwi na me memie. Epa eli ntina emofugnagnime luo ve. Nde n'osiang n'oshin opikugme ngwigna vim ankum ane etay egnu, mpe nde na mfunu e ntshira lulendo egnu yug omfutagni me, ngwign asileangme wuo ngwe ondii o mvey ifuta iyum ya gnu. ¹⁶ Yug ndong oshong owuo, epa ndakie vim esikug me nkie lulendo djwi na wo ve. Ngyug nde na lutomo e ndong oshong owuo. Asiyiame na mpay ti olwi o viey ne viy yug mpikug nkie vim ayimvi Nzeam na nkie. ¹⁷ Yug ndong oshong owuo djwi ndaleang wo, nde na ifuta iwuo. Kansi yug ndalong ko djwi wur emuu alentum na biuu, mpanalongaka ve, djwi Nzeam ampinde odzur o nkie otshia one djwi na nde. ¹⁸ Mbiy ifuta imempea Nzeam ili nge ? Eli ko ntangu elongme oshong owuo, nkie wo nkatu wur amfuti djwi la wo. Kansi ndong along a ngor, nsikug nkie wo nkatu na nding ifuta iyi Nzeam amimpea nswa to mbug na mvey. ¹⁹ Me nde na kimpwanza ne nteang e vear ankum, kansi mijir na nkum mpika e vear ankum djwi ngi na mpila e mvea vera entsign. ²⁰ Ne kati e Wayuda, akum me kamesi muyuda djwi mpwong mvea Wayuda, etay e vear atsandjie nsiku (onkwon), akum me kamesi wur eli ne ngie onkwon (ata yug me memie epa nde ne ngie e nsiku ve) ko djwi na mvea vear ayi le ngie e nsiku. ²¹ Ne kati e vear akwon nsiku, ayime kamesi wur ekwon nsiku (ata yug me memie mpikwon nsiku i Nzeam ve kansi nde ne ngie i nsiku i Kristu) djwi mpwong mvea vir ali kaku nsiku. ²² Ne nkati e vear amilem nteang e bunkoko ti e nsiku, akum me wur emilem djwi nkug mvea vear amilem. Akumikime oshin onkum onagn ko djwi na mveara vear na nkwikila Kristu. ²³ Akiime vii ankum ane djwi na mvea mpila e ndong oshong owuo olir Kristu, nde ko kidimbu e vii awuo aleseveari oshong owuo o Kristu. ²⁴ Opijiagni ve gnugnun vear atsankim iveang ne kati e sitadi atsawo nkim vear entsign, kansi ko wur emog mpama esinunga mpe esivey ifuta ? Gnu ko kimagni djwi oveyagni ifuta. ²⁵ Vear ankum atsandwa mbaagn, atsawo nken vim amuu, atsawo nkie ngwign ko djwi wavii ifuta i lukumu ipitsu ngwumela ve ; kansi su, sikiagni djwi n'ifuta isiyia etean (esiwumela). ²⁶ Me penza yug ndekim, epa ndekim n'oshin ikagn ve, yug ndenag ankom, epa ndenag n'opepe ve. ²⁷ Kansi ndepii djung ime mpay, ntokitula mpika djwi alemfukiki ne nsiku ime. Ntun ndong oshong owuo ya vear amuu mpe nkwon mvea ifuta djwi nkakug ve na nkie vii entum nde na nkie.