¹ Atwung ame ampeam ti ankear, ntangu eyikime ma gnu, okakugagni ngyug along a biuu alir Nzeam ve. Atubikime ma gnu kesi vear ali ko ntete aman alieng amiyia ndjie Kristu. ² Olongagnime vii ali pete na ndjia, kesi mea elemelisi aman ande aviyo. Okakugagni ntete na vim a nda a biuu ve. Ata opean, otukugagni ntete ve. ³ Ata olagni akristu, olepieragni kaka kesi vear apikwikili ve. Ndjia vii awo, djwi mingi kati egnu walekii zuwa na ashia,mpe olekiagni vii ko kesi vear atokwikili ntete ve. ⁴ Otikabagni Evur e Nzeam akab akab, djwi amu waletubi wuwun waledji vii ayilong Polo, amuu wuwun waledji vii ayilong Apolosi. Olekiagni kesi avear atokwikili ve. ⁵ Yug similir othsia oninen omikie Nzeam ne luzingu egnu, Apolosi kakunde na mfunu ve. Polo ko kakunde na mfunu ve. Su ankeape sili avear otshia mpe sisadila ko Nzeam emog enagn, konso wur n'oshin otshia oyopi Nzeam. ⁶ Yug me ayime wur enteang eyifuy along a Nzeam ne kati egnu, Apolos wur eyikii nde lukwikilu egnu efwi. Kansi Nzeam ndemie wur eyopeagni gnu biuu o mfwe ne mulimu. ⁷ Ntuba diaka ngean : Vear ayifuy na vear alemwang vay ne vim amifuy wo, kakuwo na ntina ve. Nzeam ndemie wur etsa ngielisa bimenina. Gnu olagni kesi evur evur to masama emifuynde bimenina le kati. ⁸ Wur emifuy na wur emimwang vay wakie k'otshia omog, wur na wur ayaveande ifuta ikug n'otshia o nde. Onen ifuta iwo ekug na oshin otshia okie wur na wur. ⁹ Silekii sankum na biuu o Nzeam ye su sankeape sili vear a Nzeam. Kansi djwi na gnu, Nzeam alokolisagni ne kati evur to masama ende. Eli kesi amokiagni gnu djwi okumagni evuur to ondi onde o mvur. ¹⁰ Nzeam, na luzolo ende, ampiinde otshia onkie djwi na nde. Otshia oyikiime ne kati egnu, oli kesi otshia o wur etsantwung mvur n'onker onkum. Kansi ne mbiy eme, wur ikiy ayia ntwung ne dzug itsin iyitsugme. Kansi wur na wur after ngia n'onker n'oshin ontwung. ¹¹ Djwa kaku itsin imuu ikiy ve esikug wo ntsug, eli ko itsin imog inagn eyitsug wo n'ondii onagn. Itsin iwo eli Yezu Kristu. ¹² Sili kesi vear atwung mvur atsa nson vim a ntsug ne tzug itsin. Amu asison wo wolo, amu atari a mpeme, amu atari isu, amu eshung, amu diaka elieng mpe amu mandala. ¹³ Nzeam ayalirnde otshia osu ye ayayegnende otshia nge eyikii wur na wur djwi na nde. Ayatum nde tshia djwi na meka otshia oyikiisu. Tshia ewo ayalag wo na Nzeam mpay otshia oyikiisu djwi na nde. ¹⁴ Yug otshia eyikii wur ne dzug itsin ekavwo na tshia ve, wur enagn asiveynde ifuta djwi na otshia onde. ¹⁵ Kansi yug otshia onde onkum omilunga na tshia, wur enagn ayawuonde ifuta inde, kansi Nzeam asikugnde diaka ongulusa. Ata yug vim ankum ayitsugnde amishir ndunga na tshia. ¹⁶ Ojiagni gnugnun olagni evuur e Nzeam, olagni ondii otsampier Nzeam. Ojiagni kieleka gnugnun Mpeve e Nzeam atsande mpier ne kati egnu. ¹⁷ Nzeam akab ndenden ayadjagnde wur enkum eyameka mbvwo tempelo ende. Djwi tempelo ende eli ko djwi na nde ndemie. Ye mpi ayobatelagni gnu, ne mbug elag eyopeagninde, djwi olagni opean tempelo ende ye olagni djwi na nde ndemie. ¹⁸ Keba okadjimagni djung ignu gnemie. Yug wur emog kati egnu abansa ndenden vear apikwikili walokumisa djwi na wagn ensign elinde na wo, wur enagn ayi n'onker. Asiyiawo wuo djwi na nde aseangi vim ankum atsandeang vear a buu, ata yug, ekiakande ngwign, wamovey kesi wur ifara. Ntangu esiseangande ndemie vim album anagn, wagn enkagn eli djwidjwi. ¹⁹ Vii atsangyen vear a buu ene kesi wagn eninen, ali vii a ifara djwi na Nzeam. Djwi Masonama masantu etuba ngean : "Nzeam ashira nde ontiegn o vear a buu ne mbug e wagn ipwo iwo wemie". ²⁰ Ye Masonama elong diaka ngean : "Nkum ajia ngindu inkum ankea wagn, ye ajia nsuka i ngindu iwo, ayavidisawo vim ankum. ²¹ Siangagni na ndeang vim aleang vear apikwikili ye siangagni na ngya na kiese e nkie vim anagn. Djwi Nzeam amopeagni vim ankum. Oshin nge esikug wo ntesa vim anagn na vim asikug ompeagni vear apikwikili ? ²² Nzeam wur eyopeagni Polo, nde mpi wur eyopeagni Apolosi, eyopeagni Petelo. Nzeam opeagninde okir one, opeagninde luzingu ti lunungu to evug le dzug ewa. Ye Nzeam amopeagni vim ankum ali le buu ene ti vim ankum ayayia ne mbiy ; vim anagn ankum ali agnu ; ²³ ye gnu olagni gna Kristu ye Kristu ali nda Nzeam.