¹ Atwung ame ampeam ti ankear, me ntangu eyiyime etay egnu, nkayidikaka vii ayolongakime djwi vii awo akum wuo, nkokabakagni ve vii ayum ne wagn e vear a buu. Okabagnime vii a masonga ayi ngizuba alir Nzeam. ² Aveyme mokano onkabagni gnu ko vii alir Yezu Kristu ti ewa ende ne kulunsi kansi epa vii amu akiy ve. ³ Ntangu eyikime ma gnu, ajikignu oshin nge ezangikime biuu ne djwung. Ajikignu nde ayugikime wom ye atekitekime na wom djwi na wambeni ime. ⁴ Kansi ayugikignu otuba ome ye ajikignu nde ntangu etubikime ma gnu nkatubaka vii amiwong me nteang ve. Kansi Mpeve e Nzeam oyegnakinde ndenden atubikime viyavi djwi na biuu o bidimbu bikumbwa eyikiki Mpeve ne kati eme. ⁵ Abansikime nde oshin onagn asitsug gnu etura egnu na Nzeam djwi na biuu onde, kansi epa ve djwi na konso vim asikug wo nkie na wagn o vear a buu. ⁶ Opean situba na vear akwikila na Kristu ti na vear amifwe ne lukwikilu ewo. Kansi gnu olagni opean na wagn ye kaku gnu na vim e nkie gna wankum ti waguvenele ili ne buu ene ye afwete ndeg mpe ngwa ne mbiy i ntshu. ⁷ Su silong wagn oyiziy Nzeam tii opean, djwi Nzeam aveynde mokano ewo ne nteang e nkie okir one, akinde ngwign djwi na lokumu esu. ⁸ Kaku ki nkum emog n'okir eyiji wagn onagn o Nzeam. Yug waji wog, wapanadjaka Nkum osiang ne kulunsi ve, kansi anakumisakawo Kristu. ⁹ Kansi ne Masonama Masantu, watuba ngean : " Vim ali kaku wur emog emiyen, kaku wur emog emiyug, kaku wur emog eyitsug ngindu eli vim ayiwong Nzeam djwi na vear oleang nde." ¹⁰ Eli vim penza ayiseyegni Nzeam ne mbug e Mpeve. Djwa Mpeve ayen vii ankum mpe ajia vii ankum. Ajia ata vii a nzig mpe wasekele i ngizuba ilir Nzeam iyi ko Nzeam ndemie wur ejia. ¹¹ Kaku wur emog ve ejia vii abansa wur yug epa mpeve eli ne kati ende. Oshin omog, kaku wur ejia vii a ngizuba a Nzeam yug epa Mpeve e Nzeam ve. ¹² Mpeve eyisepii Nzeam epa eli mpeve eyum n'okir one ve. So aviso Mpeve eyum na Nzeam. Mpeve atsa nsadisande so na ndjia ngrasia inkum itsa nsepia Nzeam na luzolo e nde. ¹³ So silong along ayi vear amilonguka na wagn o buu one wapikug ndjia ve. Along ane, eli ko Mpeve e Nzeam wur etsa ndong wo. Ndug wur esesadisa na ndjia nge eling ntuba along awo. ¹⁴ Wur epijia Nzeam apikug ndjir ve vii ayum na Mpeve e Nzeam. Djwi na wur enagn, vii awo ali kesi along a vear ifara. Eli ko vear ali na wagn oyum na Nzeam vear asikug ndjia vii anagn. ¹⁵ Wur ejia Nzeam abag ewu e vii ankum, kansi kaku vear amu asobag nde ewu ve. ¹⁶ Oshin oyifugn emog kati e waprofeta isu : "Kaku wur emog ejia vii ankum ali ne ngindu i Nzeam ve. Kaku wur ve esikug ndong Nzeam." Kansi su sikug ndjia ngindu kibeni e Kristu.