¹ Na Saulo aliyemerere mpu bayirhe Stefano. Kurhengerer'olo lusiku, amalibuko garhondera manene enyanya z'eshengero lyaliri omu Yesrusalema; boshi bashandal'omu chihugo ch'e Yudeya n'e Samariya harheng'entumwa zonyine. ² Abantu barhimanya bahamba Stefano, bamulakira bwenene. ³ Aliko Saulo abihy'eshengero, aja mubuli Nju, akulul'abalume n'abakazi n'oku bakabul'omu mpamiko. ⁴ Abashandalaga baja ngasi hoshi kuyalagaz'omwazi. ⁵ Filipo ayandagala kuger'omuchizungu ch'e Samaria, abayalagaziza Kristu. ⁶ N'olubaga lwayunviriz'oku murhima muguma emyazi Filipo alemaga aderha, bayunva n'okubona ebimenyiso ajiraga. ⁷ Bulal'emyuka mibi yalak'omu mulenge gunene, yarheng'omu bantu banene yalirimo, n'abantu banene babaga baholere, n'entagenda, bafuma. ⁸ Obushagaluke bunene bwaba mw'echo chizungu. ⁹ Muntu mugum'ezino lyage Simoni, aliri mukurungu mw'echo chihugo, alisomez'abantu b'e Samariya, n'okuderha mpw'aba muntu mukulu. ¹⁰ Boshi bamuyunviriza, gurh'oku mwana kuger'oku mukulu, baderha: oyumuntu agwerh'emisi ya Nyamuzinda, charhagwerhe bukulu. ¹¹ Bali muhibire k'omurhima balal'agendagajirira eby'okusomezwa n'obo bukurungu bwage omu siku zinene. ¹² Babere bayemera Filipo, eyagwerh'ayalagaz'omwazi g'omurhula g'obwami bwa Nyamuzinda n'ezino lya Yesu Kristu, b'adubikwa, abalume n'abakazi. ¹³ Simoni naye ayemera, aber'amali dubikwa abera na Filipo: asomerwa okubona, ebimenyiso n'ebisomezo. ¹⁴ N'entumwa zaliri e Yerusalema babere bayunv'oku e Samariya bayemerer'Omwazi gwa Nyamuzinda, barhuma Petero na Yohana baj'emwabo. ¹⁵ Abala, bagerer'e Samaria, babahunira bayankira Muka Ochere. ¹⁶ Bulala barhalizi yandagalirwa chiro n'omuguma wabo, badubikirwe konyine omu zino lya Nahano Yesu. ¹⁷ Babalambulira kw'amaboko, bayankirira Muka Ochere. ¹⁸ Simoni achibon'abantu bayankirira Muka Ochere omu kulamburirwa kw'amaboko n'entumwa abalerher'efuranga, ¹⁹ aderha: ompe nani k'obo buhashe yi ngasi muntu nani nalema nalambulira kw'amaboko abone Muka Ochere. ²⁰ Petero amubwira: oherere hale n'efuranga zawe, k'omenyere okw'eshokano za Nyamuzinda zinagulw'efuranga? ²¹ Orhaherhe chigabi m'ogo Mwazi, bulal'omurhima gwawe guli hale n'okuli kwa Nyamuzinda. ²² Ohungam'echichaha, ohune Nahano, mpu nkaba obabalirwe omu obabalirw'omuganiza g'omu murhima gwawe. ²³ Bula nakubwene woyo, oyunjwir'obubi, oli omu mpamiko y'ebyaha. ²⁴ Simoni ashubiza: mumpunir'emwa Nahano y'ebi mwaderhere chiro n'echiguma birhangereraga. ²⁵ Nabo bamalire kuhamiriza n'oku yalagaz'omwazi gwa Nyamuzinda, bagalij'e Yerusalemu, bayalagaz'engani y'omurhula omu mirhundu minene y'e Samariya. ²⁶ Aliko malayika wa Nahano abwira Filipo, aderha: Rhang'ogend'olunda lw'eshishi omu njir'eyandagere kurheng'e Yerusalemu kugan'e Gaza; nayo eli empinga. ²⁷ Ayandagala agenda, abugana mulamba muguma w'omu Etiopiya aliri mukulu na mwimangizi w'ebikulo bya Kandake Mwamikazi w'e Etiopia; naye eyaj'e Yerusalema kuharamya, ²⁸ aberagaluka, eya yiker'omu mutugari gwage aliherh'asoma echitabu ch'omulebi Isaya. ²⁹ Muka abwira Filipo: shegerer'ogu mutugari. ³⁰ Na Filipo ashegera haguma naye, ayunva y'asoma omuchitabu ch'omulebi Isaya; amubaza: omenyer'eyi myazi ogwerhe wasoma? ³¹ Aderha mpu; gurhe nakagala na ntaye wampugulira? Ayinginga Filipo ashon'omu mutugari bayikale haguma. ³² Echigabi ch'amandiko alemaga asoma chechi: ahekwa nka nganda buzi yajibagwa, nka nganda buzi bali bagugul'amoya enasirire entyo naye arhabumbulag'obunu bwage. ³³ Olubanja lwage balucha n'omugayo. Nde njiwaganj'ebyaha byage? bulal'akalamo kage kakulirw'omu gulu. ³⁴ Ola mulamba ashubiza Filipo aderha: nguhemere, ombwire, enyanya z'oyu mulebi aderhere eyi myazi enyanya zage yenine changw'enyanya z'owindi muntu? ³⁵ Filipo abumbul'obunu bwage, arhonderera kw'ago mandiko gonago, amuyalagaziz'omwazi g'obuholo bwa Yesu. ³⁶ Babere bagendeker'omu njira, bager'ahali amechi. Olala mulamba aderha: talag'amenji, bichi byakachimpanza nta dubikagwa? ³⁷ Filipo aderha: nka wakayemer'oku murhima gwawe goshi wakadubikwa. Ashuza, aderha: nyemerere oku Yesu kristu ali mwana wa nyamuzinda. ³⁸ Ayinging'omutugari guyimange; bayandagala bombi omu menji Filipo noyo mulamba, amudubika. ³⁹ Babere barheng'omu menchi, Muka gwa Nahano gwashamula Filipo, oyo mulamba arhachi mubonaga. Achigendera elyasimire bwenene. ⁴⁰ Aliko Filipo abonekana omu Azoto, agera ayalagaz'omwazi g'obuholo omu bihugo byoshi eger'e Kayisaria.