¹ Mw'ezola siku abigirizwa babere bayushuka, Abagiriki bagay'enyanya z'abayahudi bulala abashumbakazi babo bayibirirw'omuburhabale bwangasi lusiku. ² Balal'ekuminababiri bahamagala banene b'abigirizwa,bababwira mpu: kurhalikwinja rhulek'okuyigiz'omwazi gwanyamuzinda, enyanya z'okugab'ebiryo. ³ Chechirhumire, beneberhu, mulondol'omukagarhi kenyu bantu mushanvu, bayunjwire muk'ochere n'obwenge, n'obushinganyanya rhubahire mwakala kasi. ⁴ Nerhu, rhwachishweker'omukuhuna n'okuyalagaz'omwazi. ⁵ Ogo mwazi gwasimisa boshi baliriho, balondola Stefano muntu waliyunjwir'obwemere na Muka Ochere, na Filipo, Porokoro, Nikanora, Timoni, Parimena, Nikola, mushibirizi we Antiyokiya. ⁶ Babalerh' emalangambere g'entumwa, babere bahuna,babalambulira kw'amaboko. ⁷ Omwazi gwa Nyamuzinda gwagendekera, n'oluganjo lw'abigirizwa lwayushuka bwenene e Yerusalemu,chiro n'abadahwa banene bakeng'obuyemere. ⁸ Naye Stefano aliyunjwir'obuyemere n'obuhashe, ajir'ebisomerene n'ebimenyiso binen'omu lubaga. ⁹ Hayimang' abandi bantu b'omu Sinagogi y' Abalibertino, n'eya Abakurene, n'eya A balesanduriya, n'elala yab'Ekilikiya n'e Aziya, bajir'obuhaka haguma naye. ¹⁰ Aliko barhamuyazag'obwirhonzi bwage na Muka Ochere walemag'aderhera muye. ¹¹ Lero barhebek 'abantu mpu: rhwayunvirhe okwaderh'emyazi y'okujachira Musa na Nyamuzinda. ¹² Bazus'akavulindi omu lubaga, omu bagula n'omu bashamuka b'ehano, n'abandisi bachikweb'okuye bamugwarha, bamuheka emalangambere g'abach'emanja. ¹³ Bahamiriza obubeshi baderha: Oyu muntu arhaleker'okuderh'emyazi mibi enyanya z'ahantu hachesibwa n'enyanya z'erhegeko; ¹⁴ Bulala rhwayunvir'aderha mpu Yesu w'omu Nazareti nj'ashandaza hano,n'okuhindamul' engeso rhwahabwagwa na Musa. ¹⁵ Abo boshi baliyikere bach'emanja babere batirimulira Stefano kw'amesho , babona amalanga gage gali nka ga Malayika.