¹ Aliko mulume muguma ohamagalwa Ananiya, haguma na mukage Safira, baguz'eshwa lyabo, ² bayunvikana na mukage mpu bayorhane kweyo ngulo, n'echindi chigabi achiheker'entumwa. ³ Petero amubwira: Ananiya, chirhumire Lyangombe ayunjul'omurhima gwawe, amakushumika mp'orhebeke Muka muchesibwa wamayorhan'echigabi ch'engulo y'eshwa lyawe? ⁴ Ka lirhaliri lyawe, k'orhaligwerh'obuhashe b'okuliyorhana? N'amango waliguzaga, k'orhaligwerh'obuhashe bw'okukoles'eyo ngulo okolonzeze? Ngahe wakulag'omurhima gw'okujira ntyo? Orharhebeker'abantu, s'aliko Nyamuzinda. ⁵ Eri Ananiya ayunv'eyo myazi, akumbagala, anarhenga mw'omuka. Abayunvaga ntyo boshi bayubaha, ⁶ abana b'emisole, bayumuka, baboha ogomurhumba, baguheka banajiguhamba. ⁷ Ehisanzi hya saa nk'esharhu hyagera, mukage ayinja arhamenyere olwabere. ⁸ Petero amudosa: Ombwire, ka kweyi ngulo eri ntya ku mwaguzaga eshwa lyenyu? Naye amushuza: Nechi, yeyo. ⁹ Na ntyo, Petro amu bwira: kurh'oku mwayunvikene mpu murhebeke Muka ochere wa Nahano? Lola abarhengi hamba balo bali oku mulyango, nawe baguheka. ¹⁰ Honaho, akumbagala oku magulu g'entumwa; arhenga mw'omuka. Bala bana b'emisole, bajir'omunju, babugana amafa; bamuheka, bamuhamba ahaburhambi bw'eba. ¹¹ Eshengero lyoshi lyayubaha bwenene na ngasi boshi bayunv'eyo myazi badirhimana. ¹² Entumwa zalemaga zajir'ebisomerene n'ebimanyiso binene omu lubaga. Boshi balemaga babera haguma omu lugo lwa Solomono; ¹³ na ntawindi muntu wabajiremo; n'olubaga lwoshi lwahabo empundu. ¹⁴ Oluganjo lwabemezi ba Nahano, abalume na bakazi lwayushuka mango oku mango; ¹⁵ Chiro balema balerha abalwala oku chingo n'oku bahir'omunjira, mpu li hano Petro agera, echichuchu chage chigerera ku muguma omubo. ¹⁶ Bantu banene balema barheng'enyunda zoshi, n'omu bishagala by'eburhambi bw'e Yerusalemu, balema balerha abalwala n'abantu bali mw'abazimu, na boshi balema bafuma. ¹⁷ Okuhandi, Omudahwa mukulu nabola aliri haguma nabo, bw'obalala bomu lala gwa Basadukayo, baja mw'obwagalwa ( bongwa), ¹⁸ bafarh'entumwa, bazihir'omu mpamikwa y'abantu boshi . ¹⁹ Bwabere budufu, malayika wa Nahano achingul'enyunvi z'empamikwa, n'eri abahis'embuga ababwira: ²⁰ Mugendage muje omu shengero, muyigiriz'olubaga emyazi yoshi y'akalamo. ²¹ Bayunv'eyo myazi, baj'omu shengero esezi, barhonder'oku yigiriza. Omudahwa mukulu haguma n'abaliri nabo, bahamagal'abashamuka b'ehano likulu na ngasi bagula bw'omu bene Israeli, oku handi barhum'abajilerha entumwa omu mpamikwa. ²² Abo baganda babere bahika, mpu bachingul'empamikwa, babula bo. Bagaluka baderha mpu: ²³ Rhwabuganir'empamikwa echingirwe bwinjabwinja, n'abalanzi bayumangire oku lunvi, s'aliko amango rhwachingulaga, nta muntu rhwashiganiremo. ²⁴ Babere bayunv'eyo myazi, omurambo w'eshengero n'abakulu b'abadahwa, badosana mpu ko gurhe oko lero n'okolo lubanja lwaba. ²⁵ Muntu muguma ayinja ababwira: Tala, okw'abantu mweshwekaga bali omu shengero, banali bayigiriz'olubaga. ²⁶ Ntyo k'omurhambo w'eshengero haguma n'abaganda, alerhabo buzira kubajira kubi, bulala bali yoboher'olubaga, mpu lwaka bashurh'amabale. ²⁷ Babere bahisa bo, mayimanzwa omu kabuga, omudahwa mukulu abadosa ntya: ²⁸ Ka rhurhabaga rhwabahanzize n'obwalagale oku murhayigirizaga mw'elyo zino? Mwabo mwama lumiza enyigirizo zenyu omu Yerusalemu, mwanalonza murhuchumuze eshagama y'oyu muntu! ²⁹ Petero n'ezindi ntumwa bashuza: ku kwanene oku kenga Nyamuzinda kulush'abantu. ³⁰ Nyamuzinda wa badarha afulire Yesu mwayirhaga, amango mu muhanika oku murhi. ³¹ Oyo yi Nyamuzinda, oku buhashe b'okulyo kwage, ajirire Mwami na Muchunguzi, mpu lyo Israeli ahungama an'ababalirhwe ebyaha. ³² Rhwabo rhulibahamirizi b'ebyo, haguma na Muka ochere Nyamuzinda ashobozaga abo bamukenga. ³³ Eri bayunv'eyo myazi, bagaya bwenene chiro balonz'okubayirha. ³⁴ Ali komufarisayo muguma mpu ye Gamaliyeli, mwalimu w'amarhegeko aliri mukengwa omu lubaga loshi, ayumanga ekangombe, abarhegeka mpu barhange bahuluse hityu entumwa. ³⁵ Okuhandi abwir'abagula b'ehano: Bene Israeli, muchirhonde, mumenye bwinja echi muli mwalonza okujirira aba bantu. ³⁶ Bulala harhalizigera siku arhengerera Tenda, aderha mpu ali muntu mukulu, n'abantu bamushimbaga bali nka magana mane, bamuyirha, abamukulikiraga bashandala, baba nka ntacho. ³⁷ Enyuma zage omu siku z'oku yandik'ebarati, Yuda Mugalilaya ayinja, akulul'abandi, naye ahera: Abamukulikiraga bashandala. ³⁸ Lero mbabwirire: Muchikule kwaba bantu, mubaleke,akaba ogu mukolo guli gwa bantu, gwabiha. ³⁹ Aliko akaba gurhenger'emwa Nyamuzinda murhanka gubihya, murhabonekanaga nka bantu bali balwa na Nyamuzinda. ⁴⁰ Bayemer'emyazi yage, bahamagal'enfola miherho, babashurha, bababwira oku barhachiderhag'oku zino lya Yesu; babaleka bagenda. ⁴¹ Nabo barheng'omundeko, bashagalukir'okubona baganjirwe oku balibukire enyanya ly'ezino lya Yesu. ⁴² Na ngasi lusiku, omushengero n'omunju zabo, barhalekag'oku yigiriz'omwazi gw'omurhula gwa Yesu Kristu.