¹ Oku Petero na Yohana bachiherhe babwira olubaga, barhogera abadahwa bakulu, n'omurhambo w'eshengero, n'abasadukayo, ² bagayire okwenge baliherhe bayigiriza olubaga, n'okubamanyisa Yesu wafukire omu bafu. ³ Babafarha, babakabula omu mpamikwa kuhika esezi. ⁴ S'aliko, babene mu balala bayunvirhe og'omwazi bayemera, n'oluganjo lw'abantu lwayushuka kuhika ku bihumbi birhano. ⁵ Bwachere sezi, abakulu bw'olubaga, abagula n'abashamuka b'ehano n'abandisi, babuganana e Yerusalemu, ⁶ na Ana, mudahwa mukulu, Kayifa, Yohana, Aleksandro na ngasi boshi bw'obuko bw'abajinji badahwa. ⁷ Bahira Petero na Yohana aha kagarhi kabo, banarhondera okubadosa: Oku buhashe buhe, chango oku zino lyande muli mwajira ebyola? ⁸ Aliko Petero, ayunjula Muka Ochere, ababwira: Mwe bakulu bw'olubaga, nenyu bagula b'e Israeli, ⁹ Obola rhuhamagerwe omu lubanja oku minja rhwajirire echirema, mpu rhuderhe gurhe afumire, ¹⁰ mumenye mweshi, n'olubaga lwoshi lw'e Israeli lumenye! Oku zino lya Yesu kristu w'e Nazareti, olala mwabambaga oku musalaba, na Nyamuzinda amufula omu bafu, yewe yerhumire oyu muntu ayimanga embere zenyu. ¹¹ Yesu, ly'ebale abumbasi benyu babonereraga, lya hindamuka nsimikiro ly'enju. ¹² Nta windi obuchire bwankarhenga ko, bulala ntaye hano gulu, nta lindi zino chiro n'eliguma lyahabirwe abantu, lyankarhuchiza. ¹³ Babere babona oburhwali bwa Petero na Yohana, basomerwa; bali bamenyere oku bali bantu konyine bw'olubaga babuzira nyigirizo, n'abalibamenyere oku baliri na yesu. ¹⁴ Aliko nk'oku babonaga aho hofi nabo olala muntu wafumaga, bahaba oku bashubiza. ¹⁵ Barhegeka mpu bahuluswe omu kagombe, baja omu hano bonyine, ¹⁶ baderha: gurhe rhwajira aba bantu? Bulala bamayerekana oku bantu boshi b'e Yerusalemu oku chisomerene babajiriraga, rhurhankanachihakana. ¹⁷ Aliko, ly'ogo mwazi gurhayeneraga bwenene omu lubaga, rhubahanze rhunabakalihire okuderha n'okuyigiriza kw'eryo zino. ¹⁸ Babahamagala, babahanza n'obukali okuderha n'okuyigiriza oku zino lya Yesu. ¹⁹ Petero na Yohana babashubiza: murhubwire akaba kukwanene, embere za Nyamuzinda, okubakenga ahali ha Nyamuzinda; ²⁰ bulala rhurhakabula okurhaderha ebi rwabonaga n'ebi rhwayunvirhe. ²¹ Bashubi bakalihira, babalika, babula gurhe bakabahana enyanya w'olubaga, bulala boshi bakazagi kuza Nyamuzinda kw'echola chijiro. ²² Bulala oyo muntu wafumaga oku bisomerene ali arhalukire myaka makumi mane y'okuburhwa. ²³ Babere bamashwekulwa, baja emunda ababo baliri, banababalira byoshi abajinji b'abadahwa n'abagula bababwirire. ²⁴ Babere bayunva, babwira Nyamuzinda n'omulenge gunene boshi, baderha: nahano, we walemaga, egulu, enyanja na ngasi byoshi bibamo, ²⁵ we waderhesaga Muka Ochere, omu bunu bwa darha Daudi, mukozi wawe: chirhumire amashanja gagaya n'eyo mihigo ya busha omu lubaga? ²⁶ Abami b'eno gulu bayumangire bakalihire, n'abarhwali bajirire ehano haguma balwisa Nyamuzinda n'omushigwa wage. ²⁷ Nechi kubinali, omu kulwisa omukozi muchesibwa wawe Yesu, oyu washigaga, Herode na Ponsiyo Pilato, bachiheba haguma omu chihugo haguma n'amashanja na haguma n'olubaga lw'e Israeli, ²⁸ bajira ntyo eby'okuboko kwawe n'ehano lyawe byabaga byarheganyizwe. ²⁹ Na kandi, Nyamuzinda, lolaga oku bayobohesa, ohereze abakozi bawe okuyalagaza omwazi gwawe buzira buba boshi, ³⁰ lambula oku boko kwawe, ly'abalwala bafuma, ebisomerene n'ebirhangazo bijirike oku zino ly'omuchesibwa mukozi wawe Yesu. ³¹ Bamala okuhuna ntyo, aha balichigushire hadirhimana, boshi bayunjula Muka Ochere, banalema bayalagaza omwazi gwa Nyamuzinda buzira buba. ³² Omurhima gw'olubaga lw'abemezi gwaliri muguma n'enkengero zabo zaliri ziguma. Ntaye walemag'aderha oku ehya herhe hyage, aliko ngasi hyoshi hyaliri hya boshi. ³³ Entumwa zaliherhe obuhashe bunene omu kuhamiriza obufuke bwa nawerhu Yesu, na boshi baliri barhonyi bwenene. ³⁴ Bulala omu bo ntaye walikenere: ngasi boshi baliherhe amashwa n'enju zabo, babiguza n'okulerha engulo yabyo, ³⁵ n'okuyihira oku magulu g'entumwa, n'okugabira ngasi muntu okw'amalagirire mage manali. ³⁶ Ntyo ku Yusufu, eyo ntumwa zayirikaga ezino lya Barnaba, k'okuderha mwana orhulerere, mulawi w'e Kipro, ³⁷ aligwerhe eshwa lyage aliguza, n'engulo ayilerha, ayihira oku magulu g'entumwa.