¹ Bantu baguma, kurheng'e Yudea, b'ayigiriza bene babo, omukuderha: Nkamurhakembwirwe nk'okw'emingezo ya Musa, murhankachunguka. ² Paulo na Barnaba baj'omunganiro y'obuhaka nabo bwenene; baguma babo barhol'omuhigo ku Paulo na Barnaba na baguma mubo, barharam'e Yerusalemu emund'entumwa n'abagula bali, kugera mw'echo chibazo. ³ Bamalire kuherekezwa n'eshengero, bagendera n'olugenzi lwabo kuger'e Fenisiya, n'e Samaria, balola gurh'abapagani bagwerhe bayankirir'obwemere, balerh'obushagaluke bunene mubene babo boshi. ⁴ Bagerer'e Yerusalemu, b'ayankirirwa n'eshengero, n'entumwa n'abagula, bashambal'engani yoshi Nyamuzinda akolere haguma nabo. ⁵ Lero baguma b'omu Bafarisayo, bayemeraga, bayumuka, n'okuderh'oku byalihemer'oku kembul'abapagani n'oku baseza bashimb'amarhegeko ga Musa. ⁶ Entumwa n'abagula bachihira haguma mpu balole gurhe bigendekere. ⁷ Babwen'obuhaka bwagendekere, Petero ayumuka, ababwira: Beneberhu, muyemere oku kurhenga mira Nyamuzinda achilondweze omumwabo, mpu, kugerer'obunu bwani, abarhayemerere bayunv'omwazi gw'Akalembe banayemere. ⁸ Na Nyamuzinda, oyinji emirhima, abah'obuhamiriza, omukubaha Muka Ochere kuguma nerhu; ⁹ arhajiraga kalondole ahakagarhi kerhu nabo, ashuk'emirhima yabo kuger'obwemere. ¹⁰ Lerho mw'enosa, chirhumire mwarhangula Nyamuzinda, omu kulonz'okubarhuza entumwa omuzigo gwayabiraga badarha nerhu rhwenyine rhurhagalaga kuyiheka? ¹¹ Alik'olukogo lwa Nahano Yesu rhuyemerer'okuchunguka, haguma nabo? ¹² Olubaga loshi lwasira, bayunviriza Barnaba na Paulo, elibagwerhe babashambalira ebisomezo byoshi n'ebisomerene bila Nyamuzinda abajiriraga omu kagarhi k'abarhayemerere. ¹³ Babere bamala kushambala, Yakobo arhol'omwazi, anaderha: Beneberhu, muyunve! ¹⁴ Simoni abashambalira gurhe Nyamuzinda alolere omu burhangiriza abapagani alondola m'olubaga lwahek'ezino lyage. ¹⁵ Haguma n'ebyo, byayunvikana n'emyazi y'abalebi, nk'okubiyandikirwe: ¹⁶ Buzinda by'ebyo, nji nayinja, njinafunulira, njinayumbak'echihando cha Daudi, chabaga chashandukire, nayumbaka ahashandukire n'okuhayimanza, ¹⁷ obuzinda bw'abantu balonze Nyamuzinda, n'olubaga loshi balal'oku zino lyani bahamegerwe, bajir'ebibyoshi Nahano aderhere, ¹⁸ akasi kage koshi kamenyikene kurheng'omu ntagiriro y'egulu. ¹⁹ Chechirhumire nabach'akalimi rhurhalonzag'obuhaka haguma kubala barhenger'omu bapangani bachihirire ku Nyamuzinda, ²⁰ aliko rhubayandikire oku bachihir'eburhambi n'emyazi ezingisizwe n'ebushushanyo, n'obuhushi, n'enyama zachifiraga, n'omwamba. ²¹ Bulala kurhenga mira Musa haguma n'abayalagaz'amarhegeko gage buli chizungu gasomwaga mu buli chigala ngasi lusiku lw'e sabato. ²² Nantyo byasimis'entumwa n'abagula, n'eshengero lyoshi, okulondol'omu kagarhi kabo abandi n'okubarhum'e Pasila, bantu bakulu omu bantu. ²³ Babayandikir'amaruba bagafumbasyabo gaderhere: ntumwa beneberhu, bagula, na beneberhu, omu bapagani, bali e Antiokiya, e Siriya n'e Silisiya rhwamabalamusa! ²⁴ Rhwayunvirhe oku bantu baguma barhenger'emwerhu rhurhanabarhumire, babalibwize n'emyazi barhindibwiz'emirhima yenyu balibaderha mpu mukembulwe n'okukeng'erhegeko, nabo rhurhanabarhumire. ²⁵ Rhwabwene bwinja enyanya b'ebyo, okuchihira haguma rhweshi, oku londol'abaganda n'okubarhumirabo beneberhu Barnaba na Paulo, ²⁶ ababalume bahanir'akalamo kabo okuzino lya Nahano Yesu Kristu; ²⁷ Rhwarhumire Yuda na Sila, njibababwira kugerer'oku bunu bwabo ebi bintu. ²⁸ Bulala byabonekana binj'emwa Muka kurhuh'ogwindi mulimo guli gw'engenzi. ²⁹ Murhayemerag'ebintu bihanirw'entereker'oku bishushanyo, n'oku shagama, enyama zachifiraga n'obuhushi. Muchilang'ebi bintu, mwaba mwakola bwinja. Mbalagire. ³⁰ Babere bayusa kuhabw'obulenganjira, bamanukir'e Antiokiya; bayusa kushimana ahabachigushire, babah'amaruba. ³¹ Bachisom'ago maruba, basima bwenene oku mpanulo zirimo. ³² Yuda na Sila, baliri balebi, babahanula n'okubagenderez'omu kugenderera bwinja. ³³ Enyuma ly'okuyikala haguma ebichanji, bahabw'obulenganjira n'aba bene babo bagaluk'emunda barhengaga. ³⁴ Aliko Sila abon'oku biri binja okubera eyomunda. ³⁵ Na Paulo haguma na Barnaba babera e Antiokiya, bali bayigiriza n'oku yalagaz'Omwazi gwa Nahano haguma n'abandi bantu banene. ³⁶ Esiku zimali rhaluka Paulo abwira Barnaba: rhugaluke lero, rhulole bene berhu bali mu buli chizungu abarhwayigirizag'Omwazi gwa Nahano, rhulole bali mu borhere buchi. ³⁷ Barnaba alonza kurhola Yohana oyirikwa Marko bagende naye. ³⁸ Aliko Paulo arhasimaga kugenda n'omuntu walekagabo e Panfiliya, alahira kugenda nabo kukola omulimo. ³⁹ Barhongana bwenene n'okulekana. Barnaba agenda na Marko, agenda n'enkuge kuger'e Kipuro. ⁴⁰ Aliko Paulo alondola Sila, arheng'e Panfiliya ahunirwe n'abo bene babo, ahabw'obonjo bwa Nyamuzinda. ⁴¹ Ager'omu Suria n'omu Kilikiya; ayimanz'amashengero.