¹ Omushengero ly'e Antiokiya haliri abalebi na bafuruma bakulu: Barnaba, na Simeoni ohamagalwa Niger, Lisiyusi w'e Sirene, Manahene, wakuliraga haguma na Herodi munizi, na Saulo. ² Amango balemaga bakolera Nahano omu chigusho chabo balema bachishalisa, Muka Ochere adarha: Muntolere Barnaba na Saulo, mubampebere eburhambi, bankolere omulimo nabahamagaliraga. ³ Nantyo, buzinda bw'okumala kuchishalisa n'okuhuna bahebabo kwamaboko, babaleka bagende. ⁴ Barnaba na Saulo, barhumwaga na Muka Ochere, bayandagalira e Selesi, n'eyola baja omu nkuge bagana oku chizimba ch'e Shipro. ⁵ Bahikire e Salamina, bayalagaza omwazi gwa Nyamuzinda omu bishagala by'Abayahudi. Na Yohane abagwasa. ⁶ Kandi babere bashabuka echizimba choshi kuhika ekashosi babugana omufumufumu muguma, mulebi mubi wa Bayahudi ohamagalwa Bara-Yesu, ⁷ owaliri haguma n'omulagizi Serijiyusi Paolusi, muntu w'obwenge. Oyola, ahamagala Barnaba na Saulo, achiyerekana nka muntu olonzeze okuyunva omwazi gwa Nyamuzinda. ⁸ Aliko Eliyamasi, mulaguzi, bulala ntyo kw'ezino lyage linaderhere, alema ahakana ebyabo n'okulonza okukula olala muntu mwenge omu buyemere. ⁹ Na ntyo ku Saulo, ohamagalwa Paulo, ayunjula Muka Ochere, amulola, aderha: ¹⁰ Muntu oyunjure ngasi bubi n'obwizi, mugala wa lyangobe, mwanzi w'okuli kwoshi, kw'orhakaleka okola kubihya enjira za Nahano nabo zikwanene? ¹¹ Lero jaga walola, okuboko kwa Nahano kuli enyanya zawe, njiwaba mpumi, n'omu kashanji kageke nj'orhabona ezuba, hanaho olwakungu n'omwizimya gwa muhumya, arhondera amamarha, n'okulonza owamu longola. ¹² Eri omulaguzi abona ebyabere, asomererwa enyigirizo za Nahano, ayemera. ¹³ Paulo n'abaliri nabo, berhenga e Pafo, bashabukira e Perga omu Pafiliya. Yohane achiberula okubo, agaluka e Yerusalema. ¹⁴ Bowe, babanguliza, barhaluka e Perga, banahika e Antiyokiya omu Pizidiya. Baja omuchishagala olusiku lw'e Sabato, bayikala. ¹⁵ Buzinda bw'obusomi bw'amarhegeko, na balebi, abakulu bechishagala babarhuma bajiderha: balume beneberhu, akaba kuherhe obuhamiriza mwabwira olubaga, muderhe. ¹⁶ Paulo ayumuka, ajira echimanyiso n'efune, aderha: balume b'e Israeli nenyu mwemuyubaha Nyamuzinda, muyunvirize! ¹⁷ Nyamuzinda w'olubaga lw'e Israeli alondwere badarha, akengesa olu lubaga amango lwaliri omuchihugo ch'e Misiri ana lukulayo n'okuboko kwage kw'obuhashe. ¹⁸ Abalisa hofi myaka makumi mane omu mpinga; ¹⁹ N'eri aba amabihya buko mushanvu omu chihugo ch'e Kanana, abahereza cho nka chabo. ²⁰ Buzinda bwaho, bachirha hofi myaka magana mane na makumi marhano, abahereza abazuzi kuhika oku mulebi Samweli. ²¹ Lero bahuna Nyamuzinda omwami, abahereza Saulo mwne Kise enyuma ya myaka makumi mane omu mulala gwa Benjamina; ²² Nakandi amuleke n'okubayereka Daudi, bulala yewayerekene ebijiro byage: namwene Daudi, mugala wa Yese, muntu oli oku murhima gwani, yenjiwajira obulonza bwani. ²³ Kurhenga omu mulala gwa Daudi, mu Nyamuzinda njakula omuchunguzi we Israeli yene Yesu. ²⁴ Embere yo kuhika kwage, Yohane ayigiriza obubatizo bo kuchikunamula, okubana be Israeli. ²⁵ N'emango Yoane amalaga olugenzi lwage, aderha: arhali nyolala muli mwaganiza, saliko, mulole enyuma zani hayinja olala intakagala ku shwekula ebirato by'omu kugulu kwage. ²⁶ Balume, beneberhu, bene eshushano lya Abraham, nenyu mwemuyoboherhe Nyamuzinda, enyanya zenyu ogo mwazi gw'entulo gwarhumwagwa. ²⁷ Bulala, kubalala ba bera e Yerusalemu n'abakulu babo, barhamenyaga Yesu, bamulahira, bahikiriza emyazi ya balebi yakazagi somwa ngasi lusiku lwe Sabato. ²⁸ Nachakaba ntahyo bamubweneko ehyakarhuma bamuyirha, bahema Pilato amuyirhise. ²⁹ N'enyuma yokuhikiriza byoshi bya yandikwagwa enyanya zage, bamuyandagaza okumusalaba n'oku mubika omu shinda. ³⁰ S'aliko nyamuzinda amufula omumifu. ³¹ Akazi rhengerera mubalala barheremeraga naye e Galilaya omu Yerusalemu. Bobalala lero biri bimenyiso okulubaga lwage. ³² Nerhu, rhubamenyeseze ogu mwazi muhyahya oku y'endagano yajirwaga oku badarha: ³³ Nyamuzinda abihikiriza ku rhwabano rhuli bana babo, omu kufula Yesu nk'oku byaliyandikirwe omu nanga za Daudi za kabiri: oli mugala wani, nakuburha oku lusiku lwene. ³⁴ Nk'okwamufulaga omu mifu, konoko arhakakigaluka mpu abole aderha, mpu: njinakuha olukogo lu chesizwe lw'e ndagano ya Daudi, olo luli lukogo lokuli. ³⁵ Chechirhumire aderha kandi: orhakaleka omucheswa wawe abola. ³⁶ Nabo Daudi enyanya yokuhikiriza obulonza bwa Nyamuzinda, omu kukolera omulala gwage afa, ahirwa haguma na beshe n'oku bola. ³⁷ S'aliko oyu Nyamuzinda afulaga arhabolaga. ³⁸ Mumunyerere oku, balume, beneberhu, kugerera oyula, rhwayigirizwa oku babalirwa kw'ebyaha. ³⁹ Kon'oko, ngasi yeshi wa yemerere, aganjirwe okuli ku ngasi hyoshi, rhurha chinganjirwe nk'amango g'erhegeko lya Musa. ⁴⁰ Mulole, bwinja, bya kabagerere ebya lebwagwa n'abalebi: ⁴¹ Mulole, mwe mulema mwa bonerera, musomezwe, munaherhe, bulala omu siku zenyu najira omukolo, n'ogwo mukolo murhankaguyemera eri bankabashambalira gwo. ⁴² Amango Paulo na Barnaba bahulukaga, babashigirira mpu oku lwindi lusiku lw'e sabato bashubi babwira eyo mwazi; ⁴³ n'embuganano yabo yabere yahwa, abayahudi banene n'abaharamya Nyamuzinda banene bakulikira Paulo na Barnaba, nabo bababwira n'okubahanula mpu basere omu lukogo lwa Nyamuzinda. ⁴⁴ Olusiku lw'e Sabato lwakulikiraga, hofi ekishagala choshi chachihira haguma mpu chiyunve omwazi gwanyamuzinda. ⁴⁵ Abayahudi babere babona olubaga lw'abantu lunganaho, bayongwa, baanzi hakana emyaziya Nyamuzinda Paulo alemaga aderha, n'okumulerha kw'obuhaka n'okumujachira. ⁴⁶ Paulo na Barnaba abwirabo n'obwalagale, ntya: mwabo, mwemwalikwanene okurhangibwirwa omwazi gwa Nyamuzinda; aliko, bulala mugulahire, n'obola mwachiyazize mwenyine okumurhakwanene akalamo k'esiku n'amango, mulole, rhukolachijira emwa abapagani. ⁴⁷ Bula ntyo ku Nahano arhurhegekaga: Nakujiraga obe bulangashane bw'embaga, n'okuheka obuchunguke kuger'okunyukizo z'egulu. ⁴⁸ Abapagani basim'okuyunva ntyo, basingiz'izekinwa cha Nahano, naboshi balirheganyizwe akalamo k'esiku n'amango bayemera. ⁴⁹ Omwazi gwa Nawerhu gwayalira omuchihugo choshi. ⁵⁰ Aliko, Abayahudi bashumika abakazi b'okuli na ab'olukengo n'abakulu be chishagala, bazusiza Paulo na Baranaba amalibuko banabahiga omu chihugo chabo. ⁵¹ Paulo na Baranaba, bakungurha akachulo oku magulu mabo bachijir'e Ikoniyo. ⁵² Abigirizwa bayunjula obushagaluke na muka Muchesibwa.