¹ Entumwa na bene berhu baliri omu Yudeya bamenya okw'abapagani nabo bayemerere Omwazi gwa Nyamuzinda. ² Eri Petero azamukar'e Yerusalemu, abemezi bakembwirwe bamujisa buhaka, ³ n'okumubaza: Gurhe wajag'omu barhakembwirwe wamanalya nabo . ⁴ Petero arhonder'okubayereka oku byabere. ⁵ Aderha: naligwerhe nahun'omu chishagala chiderhwa Yopa nabonekerwa, nabona echiri nka mwenda gunene, gushwekerwe nyund'ene, gwagera, gwayandagala, gwanjako. ⁶ Nalolereza ogo mwenda, nabona ebinyama by'okugulu, bigenda n'amagulu mane, n'ebyelubala, n'ebibululuka, n'enyunyi z'omu chanya. ⁷ Nayunv'omulenge gwambwira, mpu: Petero, yumuka, obage onalye! ⁸ Aliko nani naderha, mpu: nanga, mani Nyamuzinda, nta kahemuka! Ntasagilya ebyagarhum'omuntu ahumana! ⁹ Ogw'omulenge, gwarheng'empingu gwayunvikana obwakabiri, mpu: Ebi Nyamuzinda ayagananwire, omenye wakaderha mpu byanahumanya. ¹⁰ Ebyola byabantyo kasharhu koshi; kandi bilala byoshi byashubir'omu mpingu. ¹¹ Mwako kashanji, bantu basharhu balamusa: zali ntumwa z'e kayizariya zintumirweko. ¹² Muka Ochere ambwira mpu ngende nabo buzira kurhindira. Bene berhu, oku bali ndarhu, nabo banshimba, rhwaja omu mw'oyola mulume. ¹³ Arhuganirir'okwabonaga malayika aja omu mwage n'okwa mubwiraga, mpu: ¹⁴ Orhume abantu e Yopa, baguhamagalire Simoni, oderhwa Petero. Akubwir'ebinwa by'oku kuchiza n'omulala gwawe gwoshi. ¹⁵ Amango narhonderaga oku babwira Muka Ochere abayandagalira, kuguma nerhu oku murhondero. ¹⁶ Nayibuk'eyo myazi ya Nyakasani aderhaga, mpu: Yohana ayinjaga adubik'omu menji, aliko mwabo nji mwadubikwa na Muka Ochere. ¹⁷ N'obo, bulala, Nyamuzinda abagabir'eyo nshokano nguma nerhu, rhwerhwa yemerere Nyakasani Yesu Kristu, kurhe nankachikula ku Nyamuzinda? ¹⁸ Eri bayunva ntyo, basira, bakuza Nyamuzinda, omukuderha: Nechi, abapagani nabo Nyamuzinda abaher'obuchiyunjuze bwabahisa oku kalamo . ¹⁹ Balala bayakaga enyanya y'okuyirhwa babonekana enyanya ya Sitefano, babalama kuja e'Foyiniki n'e'Kipro n'e'Antiyokiya, barha yigirizaga ogo mwazi arhali oku Bayahudi bonine. ²⁰ Na ntyo balirimo balume baguma b'e'Kipro n'e'Sirene n'abarhengag'e'Antiyokiya, bachimenyisa oku Bagiriki, n'oku babwira omwazi g'omurhula gwa Nahano Yesu. ²¹ Okuboko kwa Nahano kwa liri haguma nabo, n'oluganjo lunene lw'abantu bachunguka n'okuyemera Nahano. ²² Ogw'omwazi gwahik'omu marhwiri gw'aka Nyamuzinda k'e Yerusalemu, na Baranaba arhumwa e Antiyokiya. ²³ Amango ahikag'eyo, n'okubona eshokano ya Nyamuzinda, asima, abahanula mpu basere ku Nahano n'omurhima gwoshi : ²⁴ Bulala aliri muntu mwinja oyunjwire Muka Ochere n'obuyemere . Na ntyo bantu banene bashiga Nyakasani. ²⁵ Oku handi, Baranaba aj'e Taraso kulonza Saulo; ²⁶ aber'amubona amugalukan' e Antiyokiya. Bamala mwaka mugumaguma naye na kanyamuzinda bayigirizayo bantu banene, omu Antiyokiya okuburhanzi abigirizwa bayirikwa bakristu. ²⁷ Mw'ezola siku, abalebi barhenga e Yerusalemu, baja e Antiyokiya. ²⁸ Barhenga mu muguma ezino lyage ye Agabo, ayumuka, arhondera okuderha okubuhashe bwa Muka mpu eshali lyab'omw'igulu lyoshi. Elyo shali lyelila lyabag'oku mango ga Klaudiya ²⁹ Obw'abaganda bachihumako mpu ngasi muguma, nk'oku anagalire, arhumire bene babo b'e Yudeya oburhabale. ³⁰ Bahikiriza, bayohez'obo burhabale emw' abagula, babufumbika Baranaba na Saulo.