¹ Haliri muntu muguma ezino lyage Kornelio, murhegesi w'engabo ederhwa "Abataliyano". ² Oy'omuntu ali mwinja, aliyubahire Nyamuzinda, haguma n'enyumpa yage yoshi; agendaga ahan'entulo zinene oku bantu, anagendaga ahuna Nyamuzinda buzira kuhumuka. ³ Zali nka sa mwenda z'egolo, abonekerwa na Malayika wa Nyamuzinda aj'omu mwage n'oku mubwira mpu: Kornelio! ⁴ Naye amutirimulira, ayubaha ashubiza mpu: gurhe Nahano? na Malayika omubwira: amahuno gawe n'entulo zawe zagerer'enyanya n'a chibuso embere za Nyamuzinda. ⁵ Orhum'abantu e Yopa, bakuhamagalire Simoni, oyirikwa Petero; ⁶ ahandire omu m'omuntu ohamagalwa Simoni okwiz'empu, n'enju yage eli haguma n'enyanja nene. ⁷ Naye Malayika walemag'aderha naye agenda, Kornelio ahamagala bakozi babiri b'omu mwage, na musirika muguma, oyubahire Nyamuzinda, mubalala balemaga bamukoler'esiku zoshi. ⁸ Amalire kubashambalira byoshi, abarhum'e Yopa. ⁹ Bwacher'esezi, elibali omu njira bakala balinga kusheger'echizungu, Petero ashonera omu nju enyanya kuhuna, yaliri nka saa ndarhu z'ezuba, ajihuna Nyamuzinda. ¹⁰ Ayunv'eshali, alonz'okulya. Eyibali bamuyender'ebilyo alye, asisimuka. ¹¹ Abon'empingu zachinguka, n'echintu chili nka mwenda gufundikirwe kubishumiro bine, gwayerera gwayandagalir'okudaho, ¹² gwali mw'esimba, buli nyama ya magulu mane, enjoka n'ebibulubulu n'ebinyunyi byoshi bibalala omuchanya. ¹³ Ayunv'omulenge gwamubwira mpu; yimanga, Petero, baga, olye. ¹⁴ Naye Petero ashubiza: nanga, Nahano ntangahemuka! Ntamango nalire ebizingire by'okuhumanya. ¹⁵ Okubwakabiri, omulenge gwashubi yunvikan'emwage gwaderha mpu: ebi Nyamuzinda ahumanywire omenye wakaderha mpu byakahumanya. ¹⁶ Ebyo byamugerera kasharhu; na buzinda, n'echochintu chiri nkamwenda chashubij'emalunga. ¹⁷ Naye Petero agaya arhamenyaga yenyine byebichiby'abwene, abantu barhumirwe na Kornelio babere bamadosa ahamwa Simoni, bagera ahambuga, okulunvi, ¹⁸ bahamagala n'omulenge gunene n'okudos'akaba Simoni ohamagalwa Petero aly'aho. ¹⁹ Oku Petero achiri aganiza enyanya z'ebyabonaga, Muka Ochere amubwira; bantu basharhu yibakulonza; ²⁰ yimanga oyandagale haguma nabo buzira kuzindazinda, bulala nyenabarhumaga. ²¹ Petero ayandagala abwir'abobantu mpu: mulole, nyono nyimuli mwalonza, bichibyabalerhaga? ²² Nabo bamushubiza: Kornelio, murhegesi w'enfola miherho, muntu mwinja oyubaha Nyamuzinda, mukengwa omushanja ly'abayahudi boshi, ba Malayika bamubwirire mpwakuhamagale ahamwage ayunv'emyazi yawe. ²³ Petero abahir'omunyumpa, abayegereza abahandisa. Buch'esezi, azuka, agenda nabo. Benebabo baguma b'e Yopa bamuherekeza. ²⁴ Bager'e Kayisariya, olusiku lukulikireho Kornelio alemag'abalinga eyarhumize bene babo na bera bage b'oku murhima. ²⁵ Eri Petero achiri ajamo, Kornelio amubugana, achirhimba oku magulu gage, aharamya. ²⁶ Aliko Petero amuyimanza amubwira: nani ndi muntu kuguma nawe. ²⁷ Bashambala haguma naye, baj'omunju bashimana mw'abantu banene bachigushire haguma. ²⁸ Ababwira: kamuyemerere, oku bihanzibwe omu bayahudi okushangira n'omunya byaha, chiro n'okuja omumwage, aliko Nyamuzinda nyono wambwirire ntabwirag'omuntu mpw'arhashinganene changw'okwazingire. ²⁹ Checharhumaga nayinja buzira buhaka dubaduba emango mwampamagalaga; njire nababaza, bichi mwampamagaliraga? ³⁰ Kornelio aderha: zikala siku ene nka gano mango kandi, naliri omu mwani nahuna Nyamuzinda omu sa mwenda, nabon'omuntu oyamber'emyambalo eliyabaraganya anj'embere zani ambwira: ³¹ Kornelio amahuno gawe nagayunvire, na Nyamuzinda ayibukir'entulo zawe. ³² Orhum'abantu e Yopa bakuhamagalire Simoni, oderhwa Petero. Ahandire omu nju ya Simoni okwiz'empu haguma n'enyanja nene. ³³ Honaho namakurhumiz'entumwa nawe wajirire bwinja okuyinja. Mweno saa rhuli mbere za Nyamuzinda, kuderh'oku rhuyunv'ebi Nahano akubwirire. ³⁴ Okuhandi Petero arhondera okubabwira oku nechi kubinali, nabwene oku Nyamuzinda arhajira kabol'oku bantu, ³⁵ alik'omu mashanja goshi, ngasi yeshi omuyubaha n'okujir'ebishinganene, ayemererwe naye. ³⁶ Bene Israeli abarhumir'Omwazi gw'Akalembe, kugerera Yesu Kristu, Ye Mwami na Muchunguzi w'abantu boshi. ³⁷ Mumenyere ebyabere omu Yudeya yoshi oku Yesu arhangirirag'e Galilaya eri Yohana amamala kuyigiriza enyanya w'obubatizo. ³⁸ Mumenyer'oku Nyamuzinda ashigaga Yesu w'e Nazareti, amuhemisi ya Muka Ochere ngasi ahageraga ajirahamenja afumya boshi balilwalire n'abalishwekere n'omushombanyi Lyangombe bulala Nyamuzinda aliri haguma naye. ³⁹ Nerhu rhuli bahamiriza b'ebyajirire omuchihugo choshi ch'abayahudi na Yerusalema, aliko bamuyirha, bamuhanik'oku murhi. ⁴⁰ Nyamuzinda amufula oku lusiku lwa kasharhu, anamuh'obuhashe b'okubonekana oku bantu, ⁴¹ arhachiyerekag'abantu boshi, aliko oku bahamiriza Nyamuzinda abaga achishogere, rhwerhwalyaga n'okunywa naye, amalire kufuk'omubafu. ⁴² Arhurhuma mpu rhujiyigiriz'abantu, rhuhamirize oku Yi Nyamuzinda ajirire muchi w'emanja z'abazene n'abafire. ⁴³ Y'olala abalebi boshi baderhere oku ngasi yeshi omuyemerere akulirwa ebyaha byage omuzino lyage. ⁴⁴ Oku Petero achigwerh'aderh'eyo myazi, Muka Ochere ayandagalira boshi balemaga bayunviriz'omwazi. ⁴⁵ Abemezi boshi b'ebuyahudi baliherekeze Petero, basomerwa babere balol'empano z'amuk'Ochere zayandagalir'abapagani. ⁴⁶ Bulala bayunva bali baderh'oku ndimi n'okukuza Nyamuzinda. ⁴⁷ Okuhandi Petero ababwira okw'abamahabwa Muka Ochere kuguma nerhu rhwankalahira oku barhabatizwaga? ⁴⁸ Arhegeka mpu babatizwe, omuzino lya Yesu. Bamubwira okw'abere siku zigeke haguma nabo.