¹ Yesus alu ngangau ka dua belas iko murid ngagai Iya, alu meri sida kuasa muru roh ti jai, sereta ngerai ka semua macam pemedeh nggau penyakit. ² To meh nama sida ke dua belas iko rasul nya: iya ke petama Simon, ke dikumbai Petrus, nggau menyadi iya Andreas; Yakobus anak Zebedeus, nggau menyadi iya Yohanes; ³ Filipus nggau Bartolomeus; Tomas, nggau Matius ke pengumpul cukai, Yakobus anak Alfeus, nggau Tadeus, ⁴ Simon ke digelar bujang berani,nggau Yudas Iskariot, ke nyual Yesus. ⁵ Sida ke dua belas iko nya alu diasoh Yesus bejalai. Ko Iya, “Anang bejalai ngagai urang bansa bukai, tauka ngagai nengri urang Samaria, ⁶ tang bejalai ngagai urang Israel ke tesat baka bedus. ⁷ Leboh kita bejalai, padah ka Berita Badas to: ‘Perintah surga nyau damping.’ ⁸ Gerai ka urang ke sakit, angkat ka urang ke parai pulai idup baru, gerai ka urang ke sakit kusta, buru antu. Kita udah nerima ngena cara pecuma, nya alai beri ngena cara pecuma. ⁹ Anang mai duit emas tau ka pirak tau ka duit alam ikat pinggang nuan. ¹⁰ Anang mai kambut leboh kita bejalai, tau ka baju kena besilih, tau ka selipar, tau ka tungkat, laban urang ke bekereja endang patut diberi utai ti dipeguna iya. ¹¹ “Leboh kita datai ba nengri tauka kampung desa, giga urang ke deka nerima kita, alu diau enggau iya datai ke kita angkat ari endur nya. ¹² Leboh kita tama ngagai rumah urang, beri jako tabe ngagai rumah nya. ¹³ Enti urang alam rumah nya nerima kita, awak ka jako tabe kita mengkang dia. Tang enti sida enggai nerima kita, ambi pulai baru jako tabe kita nya. ¹⁴ Alu enti urang enggai nerima kita tauka enggai mending ka kita, tesai debu ari kaki kita leboh kita angkat ari rumah tauka ari nengri nya. ¹⁵ Enggau bendar Aku madah ngagai kita, leboh hari Pecara ila, Allah Taala deka lebih agi kasih ka urang Sodom enggau urang Gomora, ari ke kasih ka urang ke di nengri nya! ¹⁶ “Aku ngasoh kita bejalai baka bedus ngagai raban uduk kampung. Nya alai kita nda tau nda pintar baka ular, sereta nelap baka burung acang. ¹⁷ Bejaga kita ari sida, laban sida deka nangkap kita, alu ngirit kita ngagai majelis agama, alu nyipat kita alam sinagoge. ¹⁸ Kita deka kena pecara di mua gebenor nggau raja ketegal Aku, ngambika kita besaksi ka pasal Aku ngagai sida enggau ngagai urang bansa bukai. ¹⁹ Lebuh sida nyerah ka kita ngambi ka kita kena pecara, anang irau ka jalai kita deka bejako tauka utai ti deka disebut kita, laban kita deka diberi utai ti deka disebut kita leboh maya nya, ²⁰ Laban ukai kita ke bejako, tang Roh Apai kita ti bejako ngena kita. ²¹ “Menyadi deka nyerah ka menyadi ngambika sida dibunuh, alu apai deka nyerah ka anak. Anak deka angkat ngelaban apai indai, alu ngasoh sida dibunuh. ²² Alu semua urang deka begedi ka kita ketegal nama Aku. Tang urang ke tan datai ke ujung, deka diselamat ka. ²³ Leboh sida merinsa ka kita ba nengri siti, rari ngagai nengri siti, laban enggau bendar Aku madah ngagai kita, kita nda uleh nembu ka pengawa kita alam semua nengri di menua Israel sebedau Anak Mensia datai. ²⁴ “Murid nadai kala lebih ari guru iya, alu kuli nadai kala lebih ari tuan iya. ²⁵ Nya alai, murid patut nemu puas ati enti iya sebaka enggau guru iya, alu kuli sebaka enggau tuan iya. Enti tuai bilik dikumbai Beelzebul, sida sebilik tentu deka dikumbai ngena nama ti jai agi ari nya! ²⁶ “Nya alai, anang takut ke sida, laban nadai utai ti di tudung nda di kerebakka, tauka dilalai ka alu nda ditemu. ²⁷ Utai ti dipadah ka Aku ngagai kita alam petang, nda tau nda ditusi kita leboh tawas hari, alu utai ti dipetelai ka Aku ngagai pending kita, nda tau nda disada ka kita ari pucuk perabung. ²⁸ Anang takut ka sida ke munuh tubuh, tang nda uleh munuh semengat. Tang kita patut nangi ka Allah Taala ti uleh ngerusak tubuh enggau semengat kita di neraka. ²⁹ Ukai nda rega dua iko burung pipit ka semina satu duit aja? Taja pia, nadai siko sida deka labuh ke tanah, enti Apai kita nda ngemendar ka nya. ³⁰ Indah semua lambar buk ba pala kita deh udah di itung magang. ³¹ Nya alai, anang takut. Kita berega agi ari pemayoh burung pipit! ³² “Nya alai genap iko urang ke ngaku diri nembiak Aku di mua mensia, deka diaku Aku di mua Apai Aku di surga. ³³ Tang barang sapa besangkal ka Aku di mua mensia, deka disangkal ka Aku di mua Apai Aku di surga. ³⁴ “Anang ngumbai Aku datai mai bebaik ngagai dunya. Aku ukai datai mai pemaik, tang mai pedang. ³⁵ Aku datai laban Aku deka nyabung anak lelaki ngelaban apai, anak indu ngelaban indai, menantu indu ngelaban mentua indu. ³⁶ Munsuh kita ke pemadu jai nya kita sebilik empu. ³⁷ “Urang ke rindu ka apai, tauka indai sida lebih agi ari sida ke rindu ka Aku, nda tau nyadi murid Aku. Alu urang ke rindu ka anak lelaki tauka anak indu sida lebih ari sida ke rindu ka Aku, nda tau nyadi murid Aku. ³⁸ Alu urang ke nda ngesan salib diri empu alu niteh ka Aku, nda tau nyadi murid Aku. ³⁹ Urang ke ngidup ka nyawa diri, deka ngenyau ka nyawa diri, alu urang ke ngenyau ka nyawa diri ketegal Aku, deka ngidup ka iya. ⁴⁰ “Barang sapa nerima kita, nerima Aku. Alu barang sapa nerima Aku, nerima Iya ke ngirum ka Aku. ⁴¹ Barang sapa nerima seruan Allah Taala, laban iya seruan Allah Taala, deka sama nggau seruan nya bempu upah iya. Alu barang sapa nerima urang ke badas, laban iya nya urang ke badas, deka sama nggau urang ke badas nya bempu upah iya. ⁴² Matthew 10:42 Alu barang sapa meri ai irup ngagai murid Aku ke pemadu mit to,taja pan segelas ai celap aja laban iya murid Aku, enggau bendar Aku madah ngagai kita, sida deka nerima upah sida.”